Yohanna I 1 - Alkawali Woiwoyi

Shekwoyi Zhin Buzangna Nu

¹ Kristi ɓei n wye-wyeyi kafin a zhin anyi, har emi n mihin tukwo maku gyewo nmi awyei, maku wo wo woi daɓo, ma wo to bwa nmi abwai, Wo zhin Shekwoyi ɓeda wye-wyeyi nya nu.

² Oza deye n wo zhin wye-wyeyi nyi, woi gmi n Shekwoyi aba nyi, aku wo wuyi, yi zhin seida ge yiku gye wo. Mi da Kristi nu ɓo, n wo zhin wye-wyeyi nyalo-nyalo nya nyi, wo ɓei kunsun n Dadayi a wuyi wo.

³ Ma gnafye njesun, yi gnafye oɓo nu n yi ku gye yi ku to bwa, nna abai fya bwa jedoɓe n na gmadai n yi cei lo n Dadayi n Yesu Kristi owo Nugun.

⁴ Nfya zhin shi ma kafi n wasika ye, efyehince fya ku nu n bugba buyi, n yihinɓe.

⁵ Ɓeda nyi n Shekwoyi wa da nge yi gnafye, nge Shekwoyi zhin buzangna nu wyegma to nyi n wo aban.

⁶ Ntucenu n ya ci ge yi zhin owo anugundo nu, ama ya gyi abye n zan-zan yi fi n wyegma n laifi yi, yi ce akatanu.

⁷ Ama n yi zan-zan fi n buzangna Shekwoyi nya, shi Kristi ɓei zhin nyi, yi n jedoɓe yi lo n bugba buyi n na ajei, Yesu owo Nugun ami ɓa zhanyi ya na laifi vinya.

⁸ Nyacige yi to n laifi yi lon, yi dna yihin kwoce nu, yi na gaiciya aɓo.

⁹ Ama n ya da eyi alaifi nwo aba, yi ɓa mi ya kpema wo wa zhin yi gafara. Wa zhanyi ya n ɓenukwoyi vinya. Kwo wulo cewo n Shekwoyi aba, wa zhinyi lonu ntuge Kristi ɓei lafi ntuge wa zhanyi alaifiya.

¹⁰ N ya gna yi to zhin laifin, yi ce akata nu yi-yi Shekwoyi ge zakata, gama wa ci ge, yi ku laifi zhin.