YOHANNA ƁEWYEGYE 4 - Alkawali Woiwoyi

Oshe A Bokunmi Nguyagni

¹ A Shi mi ɓei shi awye ma gye abokunmi n guya gni n she, mawo begye n mi ɓei shinwo nyi, kwo ɓei wo n gye abye knaknaci yakwo, kwa daɓo n miyi kwa ci ge, “Ɓe ya ma wu ho aɓo nɓa ɓa zhin n na abye.”

² Nsayi-sayi, mi dna n zafun, n ɓo n eshe ma gye, okwo mwa-mwa, esushikpe-gye n zahoi sasetu nkwo.

³ Ena buzangna yakwo ɓei kun n owo n gye ɓa kun n diamond na bmiya yi, n Shanyin-pmana yi kwoi bmiyana n shewo shinkpegye gun.

⁴ Esu ashinkpegye a ɓiyi n gun shiba cei anyi n she Esu Shinkpegye dnagmayi gun, n na atukwodai ʼshiba-cei-anyi n sase kpe n ɓa, n na ajei kpe n bui-bui n rawani zinariya nya yi wan n ɓa tukwo.

⁵ O gma-na bmiya n ogma-wyisai ɓei kun n wo Shinkpegye, a begye ɓei fi n ogmawyisai. Nwo shikpegye abye, afitila n gun tnaba n wan enazhi, ɓa zhin misali Zafun ngun tnaba Shekwoyi anya.

⁶ N nuwan yakwoyi n wu ngye cristal kwoyi kun n shinkpegye-esu nya. Anya awye-wyeyi n gun anyi n zhi n wo shinkpegye aba, n na aba ngun anyi, ɓai ɓe n na awyei, avun n abye yi.

⁷ Nya wye-wyeyi kmisunyi ɓei wu ngye gaba, bayi ɓei wu n gye nakwo ɓiyi, tayi ɓei n na awyebai n gye gbagyiza. Nyiyi n wu n gye zunkwo n na abminai laya ngye kwo gye afu.

⁸ Doho-dohoi n na anya a wye-wyeyi ye n na abminai gyi ngun tnanyi, oɓa abmina atasinya n fuya n na awyei, sukwo n nyipyei ɓai ci ge Gyi-gyi-yi, gyi-gyi-yi, gyi-gyi-yi Dagayi Shekwoyi ikoda, oza n wo ɓei nyi, n wo lo, owoi nu zhin ɓeɓeyi.

⁹ Esa n na Anya a wye-wyeyi a ga mwa-mwa, latu n godiyai n oza aba nwo tu n esu-shinkpegye, n wo n wye-wyeyi nyalo-nyalo nyi.

¹⁰ A tukwoda shiba cei anyi ye, ɓa miya zhi n wo abye ɓa gawo mwa-mwa, wye-wyeida nyalo-nyalo nya ɓa ya oɓa a rawani zhi n wo abye, ɓai kwo anyi ɓai cige.

¹¹ O, Dagayi ho k uncelo ha gwo mwa-mwa n latuyi n ikoyi, gama ohonu na zhin anya vinya. Aɓei zhin ɓa ɓa bwa wye-wyeyi dna n ho ɓeye nu.