YOHANNA ƁEWYEGYE 22 - Alkawali Woiwoyi

Ola Nuwan Wye-Wye-Yi nya.

¹ Wa wu mi ola gyi-gyi-yi Nuwan wye-wyeyi nya, n tna cegye dnayi n gye crystal, kwoi zhe n Shekwoyi shinkpegye, n Kugyayi.

² Kwoi diya n zokwo yakwo a tasin, N ola kma a sepa aba-aba shinwan wye-wyeyi nya n pazhi kwoi gyi abye awo-cei-aba, kwoi gyi woiwoyi epya doho-dohoi, okwo afintolo ai zhin apma n cei ntu n na abye kagna ɓo.

³ Nya nukwoyi doho-doho yi to ɓei lo ezhi yin, gama Shekwoyi shinkpegye n kugya nyai ɓei fi n ɓo, Owo abara ɓei ga wo mwa-mwa.

⁴ Ɓa ɓei gyewo awyeba, ai ka wo eye kpe n ɓa anyikunmi.

⁵ Sukwo tolo n ɓom, ato n fitila apmayi lo n ɓom, kwo nyipyei m. Gama Dagayi Shekwoyi nu zhin buzangna nɓo wo ɓei gyi ebe nyalo-nyalo.

^6-7 Malaika wa gnami ge, ɓeda ye zhin gbenu yi nu n gaiciya yi. “Mi ɓelo esa fyewyi.” Shekwoyi n wo gna owo anabi oɓo nkwo ɓelo n na abye nyi, wo na tnu n-wo malaika yi wagnaho ge abyeye ɓelo esafyewyi. Anabarka da nu oza n wa gakwo gaiciya, n na anya yi vinya n ɓa kafi littafi.

⁸ Omi Yohanna, magye ma wo aɓeye vinya, ma yashi ma ga malaika mwa-mwa n wa wumi ɓa nyi.

⁹ Ama wa gna, “Awo, to zhin oɓo n wu lo nun, emihin ce, mi zhin Yesu bara nu n gye ho, n ho azajei anabi, n na azai n ɓa wo ɓeda n na cei kafi n littafi, ga Shekwoyi nu mwa-mwa n wo gmanyi yi.”

¹⁰ Wa gnami, To gu enya n ha kan, gama okwo anusa nla wo viwyi.

¹¹ Nsa si, aɓenukwoyi zhinyi ɓei gyi abye n ɓenukwoyi zhin yi. Cegye da ɓei gna cegye tu-tu nu. Aɓo manayi zhinyi ɓei gyi abye n ɓemana zhinyi aza n ɓa gyi-gyi-yi ɓa ɓei gyi abye n gyi-gyi-yi.

Mi Ɓe Lo Esa Fyewyi

¹² “Shi awye, miɓelo esa fyewyi, emi lada n kunsun lo n miyi magba ozaho-zahoi shiwa zhin n wu.

¹³ Ominu zhin A n Z yi, ayaba n azo bayi, kmisunyi n kmaknayi.

¹⁴ Anabaraka da nu nyalo-nyalo aza nɓa zhan oɓa ajekpe, n na bai ɓa bwa Izini, ɓa lo ezhi yi n na abwokunmi, ɓa gyi shinwa wye wyeyi nya nɓo.

¹⁵ “Aza nɓa bma Shekwoyi zokwo ya to ɓai vi won, n na aɓeyi, n na a shan-gbayi, n na azai n ɓa ye akata, ɓai ce ɓa.

¹⁶ Omi Yesu, mi la tnu n mi malaika yi, wa gna a eklisiya aɓeye, e mi nu zhin Dauda abye tukwo n wo yawyi. Ominu zhin kpasu labmi nya.”

¹⁷ Zafun n mulaɓayi ɓa gna ge, “Be” Fa azaho-zahoi n wa wo wa gna ɓe, oza ho-zahoi nwo n cei pma wo ɓe wa sin nuwan Wyewyeyi nya cauta.

¹⁸ Mi gna ozaho-zahoi n wo ba Litafiye, ezaho-zahoi n wa ɓe nyado ndu odo nkwo kafi n ya nyi, Shekwoyi ɓa ɓewo azhin n ɓa kafi n ya nyi.

¹⁹ Ozaho-zahoi n wa ce enya kniya n kwo kafi n anabci ye Shekwoyi ɓa gmi wo robo ya n shinwa wye-wyeyi nya, n Ezhi Gyi-gyi-yi n na dakwo ɓo n ya nyi.

²⁰ “Oza n wa da aɓeye vinya nyi wa gna, E, Mi ɓelo esa fyewyi!” Amin Ɓe, Dagayi Yesu.

²¹ Alheri eyi Dagayi Yesu Kristi nya ɓa kunsun n fyei vinya. Amin.