YOHANNA ƁEWYEGYE 19 - Alkawali Woiwoyi

Aza Yezhi Agmada Nshe Mi

¹ Ndeye avun mawo deji kwoi ɓewyi n eshe, “Haliluya, la Dagayi tu, Gnigni gmi n Shekwoyi aba nu. Mwa-mwa n begyi zhin owo nya nu gmanyi.

² Gama owo wada zhin ɓefyece nu n gaiciya yi. Wola karuwa yakwoi ta n wo ɓei tu anyi cegye n wo alaifi nyi, woi gba ta ga wo afyenu n na ɓei wu nyi.”

³ Oɓa begye aiwo njesun cici, ɓei kwo anyi ge, “La Dagayi tu! Awu owo nagyi nya ɓa gunlo eshe nyalo-nyalo.”

⁴ Atukwoda shiba cei anyi, n awyewyeyi dayi ngun anyi ɓa yazhi n kni ɓai ga Shekwoyi mwa-mwa, n wo sasetu n Esu-shinkpegye ɓai gna, Amin, Haliluya la Dagayi tu.

⁵ Begye a gmi n Esu-shinkpegye kwa gna, “La eyi Shekwoyi tu, ofye owo abara vinya, dnagmayi n nawyi yi, n fye wowo edna nyi.”

⁶ Mawo aɓoci n jesun ngye aza begye ɓeda, kwo n gye anuwan yakwo n ɓaluya n na adnagbe, kwo ngye ogma wyisa yakwo, “La Dagayi tu. Gama Dagayi eyi Shekwoyi iko da vinya gyi ebe lo.”

⁷ Yi dagma ya nya agmada, ya gawo mwa-mwa, gama esa n lasi n na ɓa zhin buki kugya nya, owo mula nyikwo n la wohin zhin shiri.

⁸ Ala ye wo wa kpe linen n kwo du n gyi-gyi n bui-buyi n bmiya-bmiya yi. (Linen manayi zhin aɓe mana nu n Shekwoyi aza zhin).

⁹ Malaika wa ba ɓeda ye gami, “An, abarka da nu aza n na la ɓa yi ɓa ɓe kugya a buki aba.” Wa kma ɓeda ɓe nge, “Shekwoyi nu na dace.”

¹⁰ Ma yashi nwo apita ma ga wo mwa-mwa, ama wa gna, lafa to zhin. “Gama mi zhin Shekwoyi fyenu nu n gye ho ce, n ho azajei a Yesu viyi, n ɓa zhin seida n ɓa gaiciya gayi n Yesu nyi.” Delili anabci ye nya vinya, n na ɓoi n ma wu ho nyi, ɓa zhin seida nu tu n Yesu tukwo.

Asu Aje Su

¹¹ Nnavun ma gye eshe n guya gni n dokwo buyi gni agni gni n ɓo, ayi oza n wo ɓei sase tu n dokwo yi nyi ge, “Gbenuyi n Gaiciya yi” Oza nwo ta aza nyi, woi sun okun.

¹² Owo awye wu ngye ena go-goyi n na rawani yi kpe nwo tukwo n mwa, n wo yei katu n nyikunmi n zaho ta kpe kwo yelon sai owo.

¹³ Wo n na ajei kpe n dafi n ami, ayiwo ge, “Shekwoyi Ɓeda.”

¹⁴ Akun sunyi n eshe vinya n na linen manayi kpe bmiya-bmiya yi vinya, ɓai viwo n kpe n adokwo buyi.

¹⁵ Wo n ebe yakwo gyi-gyi-yi shi nwo egbe wa zun abye kni n cei, wa gyi ebe tu nɓa tukwo n sinkna bwayi, wa dna anab nuwan-piba Shekwoyi ikoda minagyi nya.

¹⁶ Nwo eye yi kakpe n wo jekpe n buzhi-kwo nge, “Esu aje Esu, Dagayi a dagayi aje nya.”

¹⁷ Magye malaika gni agni gni n nyipyeyi za-za, woi sawyi ga alu vinya nge, “Fye ɓe, fya yezhi ntu Shekwoyi Dnagmayi buki ɓo!

¹⁸ Fye ɓe fya gyi asu abu, n na akun atukwoda abuyi n na bezhe yakwo yi, n na adokwo yi, n ɓa gunyi-i, n na azanyi-kwoci yi, adnagmayi n na ɓiyi-i alo-loi ya n na apapayi.”

¹⁹ Nnavun magye, Nyawye-wyei Nukwoi, woi ye a gwomnati anyi nya zhi nɓa asojayi, ɓa sunkun n zai nwo tu n dokwo buyi nyi n wo akunsun yi.

²⁰ A wan Nyawye-wyei n Anabi Katayi, n wo zhin aɓo wowoi esa n Nyawye wyei nukwoyi gni n cei nyi, aɓo a wo-woi nɓa dna aza kwoce n ɓa ɓei gwo Nyawye-wyei Nukwoyi zetu, n ɓa ga owo nya zhin-zhin mwa-mwa nyi, Oɓa ba Nyawye-wyeyi nukwoyi n wo anabi Katayi a sheɓa yafi n wye-wyeyi yi n ena zundna n kwo gyina n suffa yi nyi.

²¹ A wu ɓa akun sunyi vinya, n ebe yakwoyi n kwo dna n oza egbe n wo tu n dokwo buyi nyi. Alu anyi bmanaya vinya ɓa gyi ɓa abu nuboʼa kuɓa fu har eshakpi.