YOHANNA ƁEWYEGYE 18 - Alkawali Woiwoyi

Ezhi Yakwo La Miya

¹ N deye avun vinya, ma gye malaika woi ɓe n She n begyi yakwoi, anyi ɓa bmiyana nwo mwamwayi.

² Wa sawyi n kalai, “Babila Dnagmayi nla miya, kwola miya, wola ze alijanu fiba, a guzhenyi a fazan zan ba, n zafun nukwoi dohodohoi.

³ Gama abye vinya n ku nuwan nukwoyi efinya owo aɓo nukwoi nya sin. Asu anyi nya n ku ɓahin dagma n woi, anyakunyi n ku ze anyanbwai ntu n wo nayida kala ɓo.”

⁴ Mawo begye kwoi gmi n eshe kwoi gna, “Fye la kun n wo aba emi aza, fyeto ye ɓedo n wo alaifiyin, kada a tafe ɓedo n woi.

⁵ Gama owo alaifi n la tugbaga n lawu n eshe, Shekwoyi nku shiri zhin wa tawo ntu wo aɓe nukwoyi ɓo.

⁶ Zhin wo shi wa zhin ho, nduɓo, gbawo aɓe zhin-zhin nukwoyi ta zun ɓa. Wa ga aza ebwe bugba wunya, gawo lonu zunɓa.

⁷ Wola sase dna n nanyi do n agmadai, mwi kwo do n kasu n ibugbawunyi n anyi. Nsayi woi gma nge, ‘Mi zhin Sarauniya nu tu n mi esu-shinkpegye, mito zhin anyigbai banzanya nun, mi ta kpe bugba wun yen.’

⁸ Ntuce nu bugba wun efi nya n bwiciyi, n mikunyi ɓei ɓefye aba n nyipyeyi gmanyi nu, ena yi gyiwo n sagmanyi yi, gama Dagayi zhin iko da nu n wo dawo owa nyi.

⁹ “Anyi tukwoda nɓa dnabwa n wo aɓo nukwoyi a wyebwo nya zhinyi, ɓai dagma n wo alheri nyi, ɓa ɓei ciwo ebwi shi ɓa ɓei gye awu ɓai gmi n wo agusa.

¹⁰ Ɓa ɓei zhi n kpayi, ɓai vin n ednai, ɓai cibwi ge, ‘Owyi, Babila ezhi dnagmai n esa gmanyi nu n kwo kni zun aɓe.’

¹¹ “Anya siyi anyi nya ɓei cibwi, ɓai wun bugba ntu nwo ɓo, gama zaho to cegni lo wa si oɓa akayan.

¹² Owonu ɓei zhinɓa anya siyi dnagmayi n zinariya, azurfa, akuta manayi, luʼu-luʼu yi, linen manayi, siliki, n eje byei-byei yi, n na shinwan sundayi, n na akaya yi n na zhin n dagba nyi-kna yi, n na shinwan nakwoyi, akaya yi n sinkna byei-byei yi, n sunkna zhiyi-zhiyi, n kuta manayi yi.

¹³ N yaji yi, ntulare yi, n emi yi, n luban yi, n anab nuwan yi, zaitun emi yi, n wyiluku luku-luku yi, n alkama yi, anakwo, na adoko, karusai n na afyenuyi, har ɓedo n na a zanyikwoci wyewyeyi.

¹⁴ “Anya amanayi vinya n ɓa ɓo daho ɓa du, anyida n mwa-mwai n ɓa daho nyi ɓa ta jeho aba ɓen, ɓa du nyalo-nyalo.

¹⁵ “Ntucenu anyakunyi, nɓa ze a nyabwai ntu n na anya deye kun ɓo nyi, ɓa ɓei zhi n kpai, ɓai wo wahala dna n ɓahin tukwo, ɓai cibwi ɓai fi aku.

¹⁶ ‘Aiya, ezhi dnagmai, n bmiya ngye nyikwoza, n zhi-zhinyi n linen putu-putu yi, n eje bye-byei ciwu, n zhin-zhin yi n zinariya yi, n na a kuta manayi, n luʼu-lu-uyi.

¹⁷ N esa gmanyi yi ezhi yi nyabwa vinya n la wunya.’ Ayada vinya n aya tukwodai, n aya dnayi ɓa ɓei zhi n tagni.

¹⁸ Ɓai cibwi shi ɓa gye awu ɓai gmiya gun eshe, nge, ‘Nknibwayi nu n ezhi dnagmayi lo ngye deye pya?’

¹⁹ Ɓa kpe abwitukun n ɓa tukwo, dna nɓa bugba wun, ɓai gna, ‘Ewyi, Ewyi, n ezhi dnagmayi aba, kwa zhinyi yi ze anyabwayi ntu n kwo nyabwa ɓo. Nʼsaiye n esa gmanyi yi ɓa ku bwi vinya.

²⁰ “ ‘Amma oho, O eshe, dagma n owo bwi-bwi, efye Shekwoyi aɓi, n na anabiyi n na amanzaniyi, gama Shekwoyi ku owa dawo gafye n sayi.’ ”

²¹ Navun malaika yakwo, wala, kuta n wu n gye ata wyigwonya, wa shekwoya dna n nuwan yakwo, wa sawyi, “Babila ezhi dnagmai aɓa she kwoya, shi ma she kuta ye ya nyi. Kwa bwi n awyeba nyalo-nyalo.

²² Ata shan anyi begye wo n kwon, kwo amolo kwo amwayin, ata shan abwa ze doho-dohoi ze n ezhi yin, ata shan ewyi gwon.

²³ Wyegma, wyegma okwo asukwo vinyal kwo fitila ato ɓei gye n kwo atagan n I jesun ato ɓei je amula a shan won, n na amula ɓa n na amula anyikwoyi begye dadayin. A kpe owo anyansiyi ye vinya n anyi, n wa dna anyi kwoce n wo aɓeyi-sunyi

²⁴ Anabi n aza gyi-gyi-yi vinya n na aɓei wu ɓanyi, oɓa ami tulo n wo tukwo.”