YOHANNA ƁEWYEGYE 12 - Alkawali Woiwoyi

Nyikwoza Nwo Ɓi Yi

¹ A gye oɓo wo-woyi n eshe n kwo wu aɓo n ɓa ɓa zhin, Magye nyikwoza n nyipyeyi kpe, n epyai zhi n wo apita sinta, n na a kpasu rawani yi kun ngun awo cei aba. N wo tukwo.

² Woi gni n nuboi woi fi aku, nyasan kagna nyai sanwo, woi pmi owo kagna.

³ Esa fyewyei Dragon byei-byei kwa gmiɓe n na tukwo yi gyi ngun tnaba, n na amwayi gyi ngun awo, n na a rawani yi kun n kwo atukwo agun tnaba.

⁴ Owo sesi kwa gni akpasu ajegna ngun ata wa yaɓa fi n anyi, wa gni agni n nyikwozayi abye, woi laga oɓi ma, n shiri yi zhin wa gyi oɓi yi n sahoi-sahoi n na mawo n cei.

⁵ Wa ma oɓi nugbayi n wo ɓa gyi ebe tu n na aza tukwo vinya, n ebwa kalayi a cewo pa, ga Shekwoyi n wo esu-shinkpegye yi.

⁶ Nyikwoza yi wa busi lo bmana, aba n Shekwoyi n cei zhiwo, wa shiwo bwa har anyi-pyeyi dubu gmanyi n tagyi gun aba n cei kpe shi tnanyi (1,260).

⁷ Asun okun n eshemi, Mikaʼilu n na a malaikayi nɓa fi n owo sinta ɓa sun kun n Dragon yi n wo amalaika anukwoyi.

⁸ A gyi Dragon n okun yi, a nyawo ya n eshemi.

⁹ Dragon yakwoye, owa kwo-kwoi n na yiwo Guzhenyi n satan yi nyi, n wo dna anyi vinya kwoce nyi, a shewo ya dna n anyi ɓedo n wo amalaika yi.

¹⁰ Navun, mawo begye kwoi sawyi dna n eshe, kwo-ku kma zhin, “Shekwoyi gni-gni, n ikoi, n ebei, n fukunci Kristi nyayi la ɓe n ya, gama owo n wo zhin ɓa sara n Shekwoyi abye n sukwoyi n nyipyeyi, alawo sheya dna n anyi.

¹¹ Ɓa gyi nasara n wo tukwo n kugya ami yi nu, n ɓa seidayi gama ɓato ye ɓa wye-wyeyi m, ɓa gakwo ntu wo ɓo.

¹² Fye dagma o, eshemi, ofye n fye zhin eshe aɓinyi. Ama aiya n fye aba aza nfye fi n anyi nyi, gama shetan n la ɓe dafye n minagyi yakwoi, Ntuge wo kpelo owo esa to ye kun lon.”

¹³ Esa n shetan ɓei gye alawo sheya dna n anyi, wa nya nyikwozayi n wa ma oɓi nyi.

¹⁴ Ama a gawo a bwase n gun aba ngye zunkwo, wa gye afu lo bmana, aba n na cei zhin gni wo, aba n na ɓei shiwo bwa, ai guwo n owayi, Dragon, aye ngun ata n tokunyi.

¹⁵ Nuwan yakwo kwa kun n owa yi egbe, kwa zhe yalo nge kwo wan nyikwozayi, n na abai kwa wu wo.

¹⁶ Ama ekni kwa bma wo zhin kwa lo egbeya kwa sin nuwan yakwoyi.

¹⁷ Nnavun Dragon kwa gyiminagyi kwa nya owo aɓi-aje vinya n ɓa vi Shekwoyi owa ɓai gna ɓa zhin Yesu anya nu. Wa gni woi pmi n ola gbe.