Yohanna 9 - Alkawali Woiwoyi

Yesu La Za Kagna Nna Ɓei Ma Nna Wyebua Yi

¹ Esa nu wo ɓei lo n zokwo, wa gye wyebua-yi ho, nna ɓei pma wo ma nna wyebua-yi.

² Owo abara ɓa nya wo ɓo ge, “Male, nyikado laifi nu ɓo zhin a ma oza deye n zhin wyebua yiʼa? Owo azamayi, laifi na?”

³ Yesu wa gna ɓa ge, “Zaho-zahoi laifi nu to n, ko owo ko owa zamayi m, ama ntuge a wu Shekwoyi iko.

⁴ Tile ya zhin omi Dada tnu-tnu, nwa ga yi nyi, nyipyei ye tu sukwo la ga zhin n zaho-zahoi ta mi wa je tnu-tnu zhin m.

⁵ Mi ye dna anyi mi, omi nu zhin buzangna anyi nya.”

⁶ Shi wo ɓo zo da lonu, wa kni akni zhin nkni, wa fu owun wa pmiya wyebua-yi nawye,

⁷ Wa gna wo ge, “Lo Siluwan nuwan zundna ho fu nuwan.”

⁸ Wa jeze ɓe to aza ɓai kpe wo yem. Du nwo azajeyi to ɓai kpe wo yem. Ɓai nya aje ge, “wyebuayi, nyaɓayi hi nu bwa lo ya?”

⁹ Azaho ɓa gna ge, “Owo nu, azaho ge owonu to m, zadogbe nu,” ama wa gna a ge, “Omi nu.”

¹⁰ Ɓa nya wo ge, “Kwa ze wuna hoi gye wyeba?”

¹¹ Wa gna ɓage, “Oza nna yi wo ge Yesu nyi, owo na fu amwi woi tna mi nawye woi gna mi ge mi lo Siluwan nuwan zundna mi fu nuwan, awye yi kpe mi ya, mi-i gye wyeba.”

¹² Ɓa nya wo ge ozaho gni na? Wa gna ɓa ge, Mi takpe lo m.

¹³ Ɓa la wo lo cei, nna Afarisiyi aba.

¹⁴ Aɓo deye vinya ɓo zhin n Satiwyi nu.

¹⁵ Afarisiyi ɓa nya wo ɓo, shi kwa ze woi gye wyeba. Wohin wa wu a, shi Yesu Bo zhin wo n wu.

¹⁶ Azaho nɓa mi, ɓa gna ge, “Woto zhin oza nu n Shekwoyi wa tnu cei yim. Ntu kniɓeyi nu woi zhin tnu-tnu n nyipyeyi sun-sun yiʼa?” Azadoho ɓa gna, “Ai laifi da ta mi wa zhin aɓo wo-woyi yem.” Deye kwa ɓe ɓa n naje-gna-yi.

¹⁷ Ɓa nya wo ɓo ge, “Oza nwa kpe ho awye ya nyi ho gye ge wo zhin nyikanuʼa?” Wa gna ɓa ge, “Wo zhin anabi nu.”

¹⁸ To a Yahudiyi ɓa ga gaiciya ge wo ɓo zhin wyebuayi num. Ntu cenu ɓa yi wo azamayi, ɓa nya ɓa ɓo.

¹⁹ Ɓa nya ge, Ofye ɓi nu gni ya? Wo ɓo zhin wyebuayi nu? Kwa ze nwuna woi gye wyeba?

²⁰ Ɓa gna ge, “Eyi ɓi nu gni, Wo ɓei zhin wyebuayi nu tunyi nwo mama-wyi.

²¹ Ama, shi kwa ze woi gni woi gye wyeba nyi, ko oza nwa kpe wo awyeya, yi ta kpe lo n. Wo la sun za, nwo ɓa daɓo n wohin, fye nya wo ɓo!”

²² Ɓa to ɓo ye ɓa da m, ntuge ɓa ɓo wo Ayahudiyi ʼdna nu, ntuge ɓa ɓo ku da ge, Oza nwa gna ge Yesu zhin Kristi nu, a ɓa wo gmi ya aduwa nyakun.

²³ Ce nu ɓo zhin owo azamayi ɓa gna ge, ɓa ta kpe lon, wo la sun za, fye nya wo ɓo.

²⁴ Ayahudiyi ɓa je zahi yi ɓa gna wo ge, “Ga Shekwoyi mwa-mwa, to ge Yesu m, yi kpe lo ge Yesu zhin laifi da nu.”

²⁵ Wohin wa gna ɓa ge, “Mi ta kpe lo ko wo zhin laifi da nu ko oza manayi m. Ama onya gmanyi nmi kpe, okwo nu ge mi ɓei zhin wyebuayi nu, ama nsayi ye mi gye wyeba lo.”

²⁶ Har sayi ye ɓa je wo ɓo nya, “Wa zhin ho wuna? Wa ka ho gna n wuna?”

²⁷ Wa gna ɓa ge, “Ɓe ma shin fye gna nyi fye to won? Knihi nu zhin fyei je mi ɓo nya? Fye ye ge ma je da nu? Fye ye ge fya ze owo aviyi nu ce?”

²⁸ Ɓa kni wo akmi, ɓa gna, Ho nu zhin wo viyi, ama yi zhin Musa aviyi nu.

²⁹ Yi kpe lo ge Shekwoyi ɓo ku ɓoda n Musa yi, ama oza deye da yita kpe aba lo n wo gmi m.

³⁰ Ozahi wa ci ɓa ge, “Ko zhin ɓo wowoyi nu! Fye ta kpe aba lo n wo gmi m. Ama wo la awye kpe mi ya.

³¹ “Yi kpe lo ge Shekwoyi ta wo laifi da aduwa m, ama oza n wo wo Shekwoyi dna, Shekwoyi zhin wa wo wo.

³² Shi Shekwoyi ɓo zhin anyi, fye shin gye ozaho woi kpe oza awyeya, nna ɓo ma wo nna wyeibua yi?

³³ Wo to ɓei gna wo zhin Shekwoyi za nun, to wo mi wa zhin deye m.”

³⁴ Ɓa kni wo akmi, “Oho n ho zhin laifi da, ho nu ɓa wu yi?”

³⁵ Shi Yesu ɓei ku wo aɓo vinya nna ɓo zhin wo, wa gye wo wye, wa nya wo ge “Ho la gaiciya ga oza Nugun?”

³⁶ Wa nya Yesu ɓo ge, “Nkanu n woiʼa? Mi cei pma ma ga wo gaiciya.”

³⁷ Yesu wa ci wo ge, “Ho ku wo gye wye, owo nu daɓo n hoi.”

³⁸ Wa gna wo, “E, Dagayi mi la gaiciya ga,” wa ya shi wa ga wo mwa-mwa.

³⁹ Yesu wa gna wo ge, “Ma ɓe anyi ntuge ma ga aza wyeba gye Zafun nya. Aza nɓa gye lo ge ɓa gye wyeba lo, ma wu ɓa ge, ɓa zhin awyebuayi nu.”

⁴⁰ Afarisiyi nɓa ɓo zhi ɓo, ɓa wo ɓa nya ge, “Ho gna nu ge yi zhin awyebuayi nu?”

⁴¹ Yesu wa gna ɓa ge, “Fye ɓo zhin awyebuayi nu, to fye n laifi yi lon. Ama fye gna ge fye gye wyeba lo, ntu cenu fye n laifi yi lo.”