Yohanna 8 - Alkawali Woiwoyi

Oho Abwiyi Zhi Nna?

¹ Ama Yesu wa gun tu n Zaitun ʼpe.

² N labmi-labmi yi, wa je aduwa nyakun lo, esa fyewyi aza ɓa yezhi n wo aba, wa sase wa ya ɓa nya wu.

³ Shi wo ɓei shi woi daɓo, a Yahudiyi atukwoda ɓedo na Farisiyi, ɓa ɓe n nyikwoza hoi nna ɓei wan wo dna n anagbai zhin, ɓa wo gni naza abye.

⁴ Ɓa gna, “Male, nyikwoza ye, ya wan wo dna nu anagbai zhin nu.

⁵ Musa ʼwa gna ge, ya wu wo, Ha gna ge na?”

⁶ Ɓa ɓo nya wo lonu, ntuge ɓa mwi wo gye nu. Ɓa ɓei ce pma wa da ɓo ho nabai ɓa wan wo nu. Ama Yesu wa yagni, wa ka nya zhi nkni nwo bwanyi yi.

⁷ Ɓa ku gnawo gna-gna ge wo dna ɓa ɓegbe, wa kpebye gni wa gna ɓa ge, “Oza nwo to zhin laifin, wo ya wo kuta ce.”

⁸ Wa je ya gni wa je nya ka zhi n kni.

⁹ Esa nu ɓa ɓo wo deye lo nu, ɓa ya kalaku gmanyi-gmanyi. Shi ɓa ɓo ya nzadnagmayi har kwa lo ɓinawyi. Ɓa ce Yesu ya gni n nyikwozahi yi.

¹⁰ Yesu wa kpebye gni wa nya nyikwozahi ge, “Azahi ma? Zaho to ce ho kutan?”

¹¹ Nyikwozahi wa ci ge, “Awo” Yesu wa gna wo ge, “Mihin ta zun ho knim, lo ho nya, ama to je laifi zhin m.”

¹² Yesu wa je gwodu n nyawuyi wa cige, “Omi nu zhin buzangna anyi nya, oza nwa vi mi wo ta zan-zan dna n wyegmam, ama wo ɓa bwa buzangna wye-wyeyi nya.”

¹³ Afarisiyi ɓa ciwo ge, “Ho mwa hohin tukwo nu, hoi ce akata njesun.”

¹⁴ Yesu wa gna ɓa ge, “Ko mi-i zhin saida tu n mihin tukwo ɓo, omi saida zhin gaiciya nu, ntuge mi kpe aba lo mi gmi, mi-i kpe aba lo n mi lo njesun, ama fye ta kpe ɓohoye lo tu nmi tukwom.

¹⁵ Fye da mi owa zanyikwoci nya pya nu, ama mi ta da zaho-zahoi owa m.

¹⁶ Ama kwo mi-i da, omi owa da ɓa zhin gaiciya nya nu, ntuge Dada nwa tnu mi nyi, wo kunsun lo n mi-i.

¹⁷ Ofye owa gnage, saida n aza ngun-aba gbe, a gwo kwo ge kwo zhin gaiciya nu.

¹⁸ Omi n mihin mi zhin mihin tukwo saida, omi Dada nwa tnu mi nyi, wo nu zhin mi saida-da bayi.”

¹⁹ Ɓa nya wo ge, “Oho Dada gni na?” Yesu wa gna ɓa ge, “Fye ta kpe oza ye nwo zhin omi Dada m, Fye ɓo kpe mi ye lo, fye kpe wo ye ce.”

Nmwa Begye Ɓa Ga Gaiciya Ɓa Gni Aɓona

²⁰ Yesu ɓo da aɓeda deye, dna aduwa nyakun, n sopa nu a ya agyiwye fi. Zaho-zahoi to ɓo wan wom, ntuge owo sa to ɓei si m.

²¹ Wa gna ɓa njesun ge, “Mi ye ma fa fye ma lo minya, fye ɓa zan mi shin, fye ɓa fi fi n fye alaifi. Fye ta mi fya lo aba nmi ye ma lo nyi m.”

²² A Yahudiyi ɓa nya ge, “Wo ye wa wu wohin nu? Wo da kniɓei nu ge, aba nmi lo nyi, fye ta mi fya ɓe ma?”

²³ Yesu wa gna ɓa ge. “Fye kun anyi ye nu, ama mi gmi n ʼshe nu. Fye zhin anyi nya nu, ama mi zhin ʼshe nya nu.

²⁴ Ce na zhin mi-i gna fye ge, fye ɓa fi fi nfye alaifi. Nfye to ga gaiciya ge omi nu zhin Kristi m, tile fya fi fi n fye alaifi.”

²⁵ Ɓa nya wo ge, “Ho nu zhin nyika?” Yesu wa gna ɓa ge, “Mi zhin oza nu nmi shin fye gna ci-ci ge mi zhin nyi.”

²⁶ Aɓo lo mwa n mi ɓa da, har ma zun fye kni n owa yi, ama oza nwa tnu mi nyi wo zhin gaiciya da nu, aɓo nma wo nwo aba Imi ku gna anyi.

²⁷ To ɓai kpe ge, wo gna ɓa Shekwoyi ɓo num.

²⁸ Ntu cenu Yesu wa gna ɓa ge, Esa fye ɓo wu Kristi ncei, fye ɓo kpe nsahi nu ge omi nu zhin Wo. Njesun ge Mi ta da omihin ɓo num, ama oɓo n Dada wa wu mi.

²⁹ Oza nwa tnu mi nyi wo kunsun lo nmiyi, wo ta ya min, ntuge mi zhin oɓo lo n wo ye nsaho-sahoi vinya.

³⁰ Shi wo ɓo da lo nu, aza nmwa begye ɓa ku gaiciya ga Wo.

³¹ Yesu wa gna aza nɓa ɓo ga Wo gaiciya nyi ge, “Nfya zhin ɓo n ma gna fye agye fye zhin Omi abara gaiciya nya nu.

³² Fye ɓa kpe gaiciya ye, gaiciyahi kwo ɓa lo fye ya.”

³³ Ɓa gna wo ge, “Yi zhin Ibrahim aɓi nu, yi to shin zaho-zahoi bauta zhin m, ho ɓa gna nwuna nu ge gaiciya ɓa lo yi ya?”

³⁴ Yesu wa gna ɓa ge, “Ma gna fye gaiciya, oza nwo zhin laifi, wo zhin laifi fyenu nu.

³⁵ “Fye kpe ge fyenu to iko yi dna n puwan sai nugun.

³⁶ Ntu cenu, oza n Nugun la wo loya, wo la ze lo-loiya nyalo-nyalo.

³⁷ Mi kpe lo ge fye zhin Ibrahim ayawyi nu, ama fyei ye fya wu mi, ntuge omi aɓeda ta bwa asese ba lo nfye abugbam.

³⁸ Mi gna fye aɓo nu nma gye nmi Dada, ofyehin ce fye zhin aɓo nu nfya gye nfye dada.”

³⁹ Ɓa gna ge, “Ibrahim nu zhin eyi dada. Yesu wa ci ɓa ge, Awo! Ndei wo nu ɓo zhin fye dada, fye shan wo aɓemanayi zhin.

⁴⁰ Ama fye ye fya wu mi, ntuge ma gna fye gaiciya nma wo nmi Shekwoyi. Ai Ibrahim to ɓo zhin aɓo nwu lonu m.

⁴¹ Fye zhin aɓo lo ngye of ye dada nu.” Ɓa gna ge, “Yi to zhin akaruwa ʼɓi num, Shekwoyi nu zhin eyi Dada nwohin tukwo.”

⁴² Yesu wa gna ɓa ge, Shekwoyi nu ɓei gna wo zhin fye Dada, fye ye mi, ntuge ma gmi n Shekwoyi aba nu. Mi to ɓe n mihin tukwo ɓo nu m, Owo na tnu n mi-i.

⁴³ Knihin nu zhin to fyei kpe ɓo ye nmi da nyin ma? Ntuge fye to cei pma lo fya gwo mi ɓeda m.

⁴⁴ Ntuge fye zhin ofye dada aɓi nu, shetan, ntu cenu fye cei pma fya zhin aɓo nukwoyi ngye wo. Wo ɓei zhin zawuyi nu tunyi nsapa, wo ta ye gaiciyam. Wo dami nna katayi, ntuge wo nu zhjn akata cei ʼsu.

⁴⁵ Ntu cenu, shi mi gna fye gaiciya, fye ta ye lo fya ga kwo gaiciya m.

⁴⁶ Nyikanu ku mi gye mi-i zhin laifiʼa? Ndei fye to gyen, knihin nu zhin to fyei ga mi gaiciyan ma?

⁴⁷ Oza nwo zhin Shekwoyi nya, wo wo Shekwoyi ɓeda. Nya kwo zhin to fyei wo nyin, ntuge fye to zhin Shekwoyi anya nu m.

⁴⁸ A Yahudiyi ɓa gna ge, Ai yi ku gaiciya da ge, Ho zhin Samariya yi zanu, Hoi nna aljanuyi lo?

⁴⁹ Yesu wa gna ɓa ge, Awo! Mi to na aljanu yi lon. Mi ga mi Dada mwa-mwa, ama fye ci mi wyegba lo.

⁵⁰ Mi ta ye ma ci mihin m, Shekwoyi nu ɓa ye kwo ga mi owo nu zhin wa dahi.

⁵¹ Ɓehin-hin ma gna fye. Oza nwa ga mi gaiciya wo ta fi m.

⁵² A Yahudiyi ɓa ci wo ge, lalei n sayi yi ku kpe ge Ho nna aljanu yi lo! Ibrahim ɓedo anabi adnagmayi ɓo ku fi, ama oho da gna ge Oza nwa ga ho aɓeda gaiciya wo ta fi m.

⁵³ Ho du eyi dada Ibrahim lo? Wo ɓo la fi, elonu anabi aje. Ho gye ge ho zhin nyikana?

⁵⁴ Yesu wa gna ɓa ge, nma ci mihin omi cici to zhin nyaho nun, ama Omi Dada nfye gna ge wo zhin fye Shekwoyi nyi, Owo nu ga mi mwa-mwa ye.

⁵⁵ Fye ta kpe wo ye lom. Nma gna mi ta kpe wo ye lo cen, mi la ze zakata. Ama mi kpe wo ye lo, mi-i zhin ɓo wa gna mi jesun.

⁵⁶ Ofye dada Ibrahim ɓo dagma wa gye omi nyipyeyi. Wo ɓo kpe ge mi ɓe lo ai da wo.

⁵⁷ A Yahudiyi ɓa ci wo ge, “Ho to lo aye shitnu, hoi gna ge ho ɓo ku Ibrahim gyewye!”

⁵⁸ Yesu wa gna ɓa ge, “aɓo sun nna ma Ibrahim nyi mi-i nyi!”

⁵⁹ Shi ɓa ɓo wo lo nu, ɓa ku akuta ntuge ɓa kni wo, ama Yesu wa wyi ɓa ya, wa gmi ya nna aduwa nyakun.