Yohanna 7 - Alkawali Woiwoyi

Aɓona Tu N Yesu Tukwo

¹ Ndeye avun, Yesu wa fa Yahudi ya wa lo Galili, woi zan nazhi aɓi-ɓi-yi, wo to ɓo ye wa dna n Yahudiya m, ntuge ɓa ɓo ye ɓa wu wo.

² A Yahudiyayi awyefan, alubui nyagyi nya ʼsa ɓei la ga si.

³ Yesu amaje ɓa gna wo ge wo lo Yahudiya ntu awyefan ɓo. “Lo aba n aza lo, ntuge ho zhin aɓo wo-woyi nabai oho abara ɓa gye.

⁴ Ndei ho ye a kpe ho ye, sai ha hohin gmi wu, to zhin aɓo n so-son, shi ho mi lo hoi zhin aɓoye nyi, wu hohin n anyi vinya aba.”

⁵ Ntu ge ko owo amaje nɓahin, ɓa to ɓo ga wo gaiciya m.

⁶ Yesu wa ci ɓa ge, “Omi sa to si kpam, ama nfye aba esaho-sahoi wu lo dei-dei.

⁷ Anyi ta wun fye nu lom, ama ɓa ta ye mi lon, ntuge mi gna ge oɓa atnu-tnu zhin anukwoyi nu.

⁸ Fye lo fye nya awyefanhi, shi esa si mi nʼɓa ɓe.”

⁹ She wo ɓo ku da lo nu, wa wo nya ce dna n Galili.

¹⁰ Esa nwo amaje ɓo ku lo, wa kma ɓa nya lo n so-so.

¹¹ Nna awye-fan ʼba a Yahudiyi ɓai zan wo shin ɓai nya ge, Zahi gni na?

¹² Aza ɓai da aɓeda gbo-gbo tu nwo tukwo, azaho ɓa gna, Wo zhin oza manayi nu, azaho ɓa gna, awo, Wo zhin aza-kwoce-dnayi nu.

¹³ Ama zaho-zahoi to ɓo mi, wa da wo ɓo pei-pei m, ntuge ɓa wo a Yahudiyi edna.

¹⁴ Dna n awyefan atan-tasin, Yesu wa lo dna nu aduwa-nyakun, wa ya ɓa nya wu.

¹⁵ Ce awo a Yahudiyi, ɓa nya ge, “Oza deye wa bwa ɓeyekpe n na to woi lo makaranta ma?”

¹⁶ Yesu wa gna ɓa ge, “Omihin ɓeyekpe nu to nmi wu fyem, ama Shekwoyi nya, owo nu n wa tnu mi nyi.

¹⁷ Ndei oza la kni, wa zhin Shekwoyi ɓeye, wo ɓa kpe nya ye n mi wu nyi, ko kwo zhin Shekwoyi nya nu, ko omihin nya nu.

¹⁸ Oza nwa da ɓeda ntu wohin tukwo ɓo, wo ye mwa-mwa n wohin ɓo nu, ama, oza nwo zhin tnu-tnu ntu oza latu ɓo nwa tnu wo nyi, wo nu zhin oza gaiciya da nza manayi.

¹⁹ Musa to ɓo ga fye awyidnan? Zaho tolo n wo shi ɓa bwa lo nfyem. Knihi nu zhin fyei ye fya wu miʼa?”

²⁰ Begyehi kwa ci wo ge, “Tukwo laho pmiya! Nyika nu ye wa wu hoʼa?”

²¹ Yesu wa dna ɓa ɓegbe wa ci ge, “Ma zhin ɓo wo-woyi gmanyi ca wo fye.”

²² Musa ɓo gna fye ge fye zhin aɓi kaciya, (yi kpe lo dei ko to ya nwo sa num, kwa ya n yi azakwoi sa nu) ama fye ta kni Satiwyim.

²³ Ndei fye ɓa zhin kaciya n Satiwyi, ntuge fya nu Musa awyidna, ntu kniɓeyi nu fyei gyi minagyi ge, ma ka oza gna n Satiwyiʼa?

²⁴ Nfya dnawye peceye, fye ɓa gye, ma zhin ɓe manayi nu.

²⁵ Azaho nɓa fi n Urushelima mi, ɓa nya ɓo ge, “Ozaye nu to nɓa ye ɓa wu n?

²⁶ Ai wo gni nyi woi daɓo pei-pei, zaho-zahoi ta da nya ho lon. Kwo atukwoda ɓa ku kpe nu ge Wo nu zhin Kristiʼa?

²⁷ Ama yi kpe aba lo nzadeye gmi, esa Kristi ɓa ɓe, ai zaho-zahoi to ɓo kpe aba nwa gmim.”

²⁸ Yesu woi gni woi wu ɓa nya, wa ci ɓa ge, “E fye kpe mi ye lo, fye kpe aba lo nmi gmi njesun. Ama mi zhin tnu-tnuyi nu, oza nwa tnu mi nyi wo zhin gaiciya nu. Fye ta kpe wo ye lo m.

²⁹ Ama mi kpe wo ye lo, ntu ge ma gmi nwo aba nu, owo na tnu mi.”

³⁰ A Yahudiyi atukwoda ɓai ye ɓa wan wo, ama zaho-zahoi to ɓo to wo bwam, ntuge owo sa to ɓei sim.

³¹ Ama aza nmwa begye n aduwa nyakunhi, ɓa ku gaiciya ga wo. Ɓa nya ge, “Esa n Kristi ɓa ɓe ncei, wo ɓo shan aɓo wo-woyi ho zhin ndu oza deye?”

³² Esanu Afarisiyi ɓo wo lo nu, ɓa tnu adogagyi ntuge ɓa wan Yesu ɓe cei.

³³ Ama Yesu wa gna ɓa ge, “Esa ye mi ce lo fyewyi ma kun-sun nfyeyi, ma kpe je ze lo oza aba nwa tnu mi nyi.

³⁴ Fye ɓo zan mi shin ama fye to ɓei gye mi wyem. Fyei to ɓo mi fye ɓe aba nmi nyi m.”

³⁵ A Yahudiyi atukwoda ɓa nya aje ge, “Wo ye wa lo nna nu to ya gye wo wyem ma? Ko wo ye wa lo eyi azaje aba nu nɓa gnami fi nna abyedo, wo zhin abyedo waʼazi a?

³⁶ Kniɓeyi nu nwo dage, ʼFye ɓo zan mi shin ama fye to ɓo gye mi wyem, njesun ge, ‘Aba mi nyi, fye ta mi fya ɓem ma’?”

³⁷ N nyipyei kmaknayi awyefan nya, Yesu wa je ɓeda nazayi ge, Oza n nuwan mikun wo wolo, wo ɓe mi aba wa sin.

³⁸ Ntuge Littafi Gyi-gyi-yi ku da ge, oza nwo ga mi gaiciya, nuwan ɓa kpe nwo mi ngye dnapa.

³⁹ Wo ɓei da Zafun Gyi-gyi-yi nu ɓo, nna ɓa ga ozaho-zahoi nwa ga Yesu gaiciya nyi. Ama nsahi Zafun to ɓei ɓem, ntuge Yesu to ɓei jeze lo Dada aba n ʼshe min.

⁴⁰ Sanu ɓa ɓo wo woi da lo nu, azaho ɓa ci ge, “Oza deye zhin anabi nu ɓehin-hin.”

⁴¹ Azaho ge, “Wo zhin Kristi nu.” Azaho ge. “Kristi ɓa gmi n Galili nu?”

⁴² Ntu ge Littafi Gyi-gyi-yi ku da pei-pei ge Yesu ɓa gmi n Esu Dauda ebye nu n Baitalami aba naɓo ma Dauda nyi.

⁴³ Aza ɓo la gnaje ngun aba ntu wo ɓo.

⁴⁴ Azaho ɓai ye ɓa wan Wo, ama zaho-zahoi to ɓo to wo bwam.

⁴⁵ Adogagyi n na ɓei tnu, ɓa jeze ɓe ntna wo shi yi. Aduwa nyakun tukwoda ɓedo a Farisiyi ɓa nya ɓa ge, kninya zhin to fyei ɓe nwoi ma?

⁴⁶ Adogagyi-hi ɓei gna ge, ɓa to shin oza wo woi daɓo ngye shi Yesu da nyi m.

⁴⁷ Afarisiyi ɓa nya ɓa ge, “Aku fye dna kwoce nuce?”

⁴⁸ Atukwoda ho lo ko a Farisiyi, nɓa ku gaiciya ga ge, wo zhin Gni-yi nu?

⁴⁹ Aza nɓa ta kpe owa ye nyin, oɓa nu ku gaiciya ga, okni tu lo nɓa.

⁵⁰ Nikodimu, nwo ɓo lo Yesu aba n sukwoyi nyl, wo ɓo dna nɓa, wa nya ge,

⁵¹ “Ko wu lo dei-dei a ga za laifi to ai da wo owa n?”

⁵² Ɓa nya wo ge, “Hohin gmi n Galili nu ce? Lo ho shan Shekwoyi ɓeda baba, ho ɓa gye ge anabi to lo nwo ɓa gmi n Galili m.”

⁵³ Ɓa kuka, zaho-zahoi wa lo wo puwa.