Yohanna 6 - Alkawali Woiwoyi

Yesu Wa Ga Aza Dubu Ngun Atnu Nyagyi

¹ Ndeye avun, Yesu wa piya lo Galili nuwan kma, wato Tibariya nuwan zundna.

² Aza yezhi nmwa begye ɓa vi wo lo, ntu ge-ɓa ɓo ku gye aɓo wo-woyi nwo ɓo zhin tu nanyasan-yi tukwo.

³ Yesu wa gun lo ʼpe, wa sase tu ngnisun nwo abara yi.

⁴ Sahi ɓo la wu vi n paska yi, wato a Yahudiyi nyagyi sa.

⁵ Shi Yesu ɓo kpe awye shi wa gye aza yezhi nmwa begye, wa nya Filibbus ge, Yi ɓa bwa nyagyi nna ya si, ya ga aza yezhi yeʼa?

⁶ Wo ɓei ye wa wo nya nu n Filibbus ɓa da, ntuge wo ɓei kpe ɓoye nwo ɓa zhin.

⁷ Filibbus wa dna wo ɓegbe wa gna, Kwo yi si buredi naira tagyi ngun aba nya (₦200) ko ta kun ɓam.

⁸ Andarawus, Bitrus zado, wa ci ge,

⁹ Oɓiho gni lo ya n buredi yi shi ngun atnu, n abmiya yi ngun aba. Ama kwo ɓa zhin knihin nu n begye yeʼa?

¹⁰ Yesu wa gna ɓa ge, ɓa gna aza ɓa ku sase. (Gbegbe ɓei nyi ɓo) aza vinya ɓa ku sase. Azanugbayi ɓei nyi adubu ngun atnu. (5,000).

¹¹ Yesu wa gwo buredihi, wa zhin godiya ga Shekwoyi wa ga aza. Wa je abmiya gwo wa je godiya zhin wa ga ɓa.

¹² Shi nubo ɓei ku ɓa fu, Yesu wa gna wo abara ge, “fye ye awyi-woyi zhi, to nyaho kwa wun yam.”

¹³ Awyiwoyi-hi nɓa ɓei ce nyi, ɓa ɓei ku nu acekun ngun awocei-aba.

¹⁴ Shi aza ɓo gye lonu, ɓa gna ge, “Behin-hin oza deye zhin anabi nu, n yi nwo awyetuyi nyi.”

¹⁵ Shi Yesu ɓo ku kpe ge, ɓa ye lo ɓa wan wo ɓa dna wo ʼbe nna kala, wa laka wa gun lo ʼpe-sepa nwo gmanyi yi.

¹⁶ Sanu wyeshe ɓo la she, owo abara ɓa lo ednagbe.

¹⁷ Ɓa lo fi n ʼya, ntuge ɓa piya lo Kafarnahum. Sukwo kwa zhin, to Yesu woi ɓe ɓa abam.

¹⁸ Ese ci nkalayi, har nuwan kwoi ce nya.

¹⁹ Ɓa ɓei bwa zan-zan ngye milu ngun ata ko ngun anyi, ɓa gye Yesu woi ɓe, woi zan-zan tu nuwan woi ɓe ʼya ba. Ɓa ya edna wo.

²⁰ Yesu wa gna ɓa ge fye to wo dna m, Omi nu.

²¹ Ɓa ye ɓa gwo wo dna eya, safyewyi ɓa piya kpe nkma.

²² She ʼfye ɓei gyi, aza-yezhi ɓa gye eya ce shi gmanyi kawai, Yesu kwa to ɓo lo dna nwo abara yim, ama ɓa ɓei lo ɓahin-ɓahin nu.

²³ Aza ho ɓa kun n Tibariya, ɓa piya kpe vivi aba yi aza ɓai gyi buredi, n Dagayi ɓei tu kwo anabarka nyi.

²⁴ Shi aza-yezhi to ɓo gye Yesu ko owo abara fi n aya him, ɓa lofi aya ɓa lo Kafarnahum ɓai zan Yesu shin.

²⁵ Shi ɓa ɓei gye wo nkmahi, ɓa nya wo ge, “Male, ha ɓe ya n knisayi ya?”

²⁶ Yesu wa gna ɓa ge, “Ma gna fye gaiciya, fye ta zan mi shin ntu aɓo wo-woyi ɓo nu nfya gye nyim, ama ntuge fye ɓo ku buredi gyi lanubo ku fye fu.

²⁷ Fye to zhin tnu-tnu ntu nyagyi ɓo nkwo ɓa wun Iyam, ama ntu nyagyi wye-wyei nya ɓo, okwo nu n Oza Nugun ɓa ga fye. Ce na zhin Shekwyi Dada woi tnu n woi.”

²⁸ Ɓa nya wo ge, “Yi ɓa zhin nwuna ya zhin Shekwoyi ɓeyeʼa?”

²⁹ Yesu wa gna ɓa ge, “Shekwoyi ɓeye nu nyi ge, fye ga oza gaiciya nwa tnu n woi nyi.”

³⁰ Ɓa nya Yesu ge, “Ho ɓa zhin kni atuzeyi nu ntuge ya gye nabai ya ga ho gaiciya? Ho ɓa zhin knihi na?

³¹ Littafi Gyi-gyi-yi, kwa gna ge, eyi Adada ɓei gyi manna n zhabui Wa ga ɓa buredi nkwo gmi n ʼshe.”

³² Yesu wa gna ɓa ge, “Musa nu to ɓei ga ɓa buredi hi m. Omi Dada nu. Nsayi wo ga fye buredi gaiciya nya nkwo gmi n ʼshe nyi.

³³ Buredi gaiciya nya, okwo nu zhin oza n Shekwoyi wa tnu n woi dna anyi woi ga aza wye-wyei nyi.”

³⁴ Ɓa gna wo ge, Dagayi ga yi buredi ye fyegyi-fyegyi.

³⁵ Yesu wa gna ɓa ge, “Omi nu zhin buredi wye-wyeyi nya. Oza nwa ɓe mi aba mikun ta gun wo m, oza nwo ga mi gaiciya nuwan mikun ta wo wom.

³⁶ “Ama, ngye shi mi ku gna fye, fye ku mi gyewye, dudu lonu fye ta ga mi gaiciya lon.

³⁷ Aza n Dada ku gami nyi, tile ɓa ɓe mi aba. Mihin kwa mi ta nya ɓa yam.

³⁸ Mi to gmi n ʼshe mi-i ɓe ya ntu ge ma zhin mihin ɓeye num, ama ma zhin Shekwoyi ɓeye owo nu nwa tnu mi nyi.

³⁹ Shekowyi ɓeye nu nyi ge, To zaknayi wa bwi, dna n na aza n wa gami nyi m. Ama ma ku ɓa kala lo wye-wyeyi nyalo-nyalo nya, n nyipyei kmaknayi.

⁴⁰ Omi Dada ɓeye nu nyi ge, Zaho-zahoi nwa gye Nugun, wa ga wo gaiciya wo ɓa bwa wye-wyei nyalo-nyalo nya. Omihin n ɓei la wo kala n vingwo n nyipyei kmaknayi.”

⁴¹ A Yahudiyi ɓa ya gunnu-gunnu da, shi ɓa ɓo wo Yesu woi gna ge, Omi nu zhin buredi nkwo gmi n ʼshe.

⁴² Ce a wo ɓa ɓa gna, Kninyia! Yesu, Yusufu nugun nu to bwa gnin, owo dada nwo iya yi n yi kpe ye lo nyin. Knihi nu zhin woi gna ge wa gmi n ʼshe nuʼa?

⁴³ Yesu wa dna ɓa ɓo gbe, wa ci ge, “Fye ku fa gunnu-gunnu da ɓo shi ma da lo nu.

⁴⁴ Zaho-zahoi ta mi wa ɓe mi abam, sai Dada gna wo ge wo ɓe. Mihin mi ɓei la wo kala n vingwo n nyipyei kmaknayi.

⁴⁵ Alkawali kwo-kwoi ku da ge, ʼShekwoyi ɓo wu aza nya vinya, Oza n wa wo Dada ɓeda wo ɓa ɓe mi aba.

⁴⁶ Ozaho-zahoi to shin Dada wyegyem, sai dai emi nma gmi nwo aba nyi.

⁴⁷ Ɓehin-hin ma gna gye, oza nwa gami gaiciya wo wye-wyei nyalo-nyalo nya yi lo.

⁴⁸ Emi nu zhin buredi wye-wyeyi nya.

⁴⁹ Of ye azakwoyi ɓei gyi manna fi n zhabui, ama ɓa ɓo ku fi.

⁵⁰ Eminu zhin buredi n kwo gmi n ʼshe, nza gyi ko wo ta fim.

⁵¹ Eminu zhin buredi wye-wyei nya, nkwo gmi nshe nyi. Ozaho-zahoi nwa gyi buredi ye wo ɓa bwa wye-wyei nyalo-nyalo. Buredi ye emi nayi nu, nmi ye ma ga kwo ntu anyi gni-gni ɓo nyi.”

⁵² A Yahudiyi, ɓa ya aɓona na jei, ɓai gna, Oza deye ɓa mi nwuna wa ga yi owo nayi ya gyiʼa?

⁵³ Yesu wa gna ɓa ge, “Ɓehin-hin ma gna fye, nfye to gyi Oza Nugun nayi m, fyei sin owo amin, fye ta bwa wye-wyei dna nfye mim.

⁵⁴ Ama oza n wa gyi mi nayi, wa sin mi ami wo ɓa bwa wye-wyei, njesun mɓei lawo kala n vingwo n nyipyei kmaknayi.

⁵⁵ Omi nayi kwo zhin nyagyi nu ɓehin-hin omi ami njesun ɓa zhin nya sin-sin yi nu.

⁵⁶ Oza nwa gyi mi nayi, wa sin omi ami njesun, wo zhin ozanu nwo sase dna nmi mi, Emihin ndna nwo mi.

⁵⁷ Ngye shi Dada wye-wyei nya wa tnu n mi-i, mi n wye-wyei lo ntu wo ɓo. Elonu oza nwa gyi mi nayi wohin wo ɓa bwa wye-wyei ntu mi ɓo ce.

⁵⁸ Eminu zhin buredi gaiciya nya nkwo gmi n ʼshe; kwo to wu lo ngye odo nu nfye azakwoyi ɓo gyi fi n zhabui, ɓa fi nyim. Oza nwa gyi deye wo ɓa bwa wye-wyeyi nyalo-nyalo nya”.

⁵⁹ Yesu ɓo da aɓo deye dna n a Yahudiyi aduwa nyakun nu, n Kafarnahum.

⁶⁰ Shi ɓa ɓo wo deye, owo avi-yi nmwa begye ɓa gna, wu-wu ye dnaɓo lo, nyikanl ɓa mi wa gwo kwoʼa?

⁶¹ Yesu wa ku kpe ge ɓa da gunnu-gunnu lo; wa nya ɓa ge, “Deye wun fye bugba ya lo?

⁶² Fye ɓei zhin wuna, shi fye ɓo gye Oza Nugun woi jeze lo ʼsheʼa?

⁶³ Zafun Gyi-gyi-yi nu ga wye-wyeyi nyalo-nyalo nya, ama nayi nya ta ga za kwom. Mi ku wu fye shi fye ɓa bwa wye-wyeyi zafun nya.

⁶⁴ Ama azaho nfye mi, ta gami gaiciya lon.” (Ntuge Yesu ɓo kukpe oza n wo to ɓo ga wo gaiciyam, n za yi nwo ɓo kun wo.)

⁶⁵ Wa gyi abye wa gna, “Ntu cenu ma gna fye ge, ozaho to lo nwo ɓa mi wa ɓe mi abam, akpe Dada gni wo ɓe cei.”

⁶⁶ Nsahi, owo aviyi nmwa begye ɓa jeze nnavun yi to ɓa je wo vim.

⁶⁷ Yesu wa nya abara awo-cei-aba hi ge, fyehin ɓa lo ce?

⁶⁸ Siman Bitrus wa dna wo ɓegbe wa gna, “Dagayi, yi ɓa lo da nyika? Oho nu gmanyi nna ɓeda yi nɓa ɓa mi ɓa ga wye-wyeyi nyalo-nyalo nya,

⁶⁹ Njesun yi ku gaiciya ga yi kpe lo ge ho nu zhin Nugun gyi-gyi-yi Shekwoyi nya.”

⁷⁰ Yesu wa gna ɓa ge, Mi la fye kni awo-cei-aba, ama oza gmanyi zhin shaitan nu.

⁷¹ Wo ɓo da Yahuda, Siman Iskariyoti nugun nu ɓo, gmanyi n awo-cei-aba hi, nwo ɓa kun Yesu nyi.