Yohanna 20 - Alkawali Woiwoyi

Yesu N Wye-wyeyi Lo Njesun

¹ N Labmi-labmi yi, n Ladiwyi; Maryamu Magaliya wa lo vingwo aba, wa lo wa gye a la kuta kpeya a vingwo gbe.

² Wa jeze ɓe woi busi, wa lo da Bitrus n bara do yi, n Yesu ɓo zhin woi ye nwoi nyi. Wa gna ɓa ge, “Ba la Yesu nayi gmi n vingwo, yi-i ta kpe aba lo nɓa woi ya shi m.”

³ Sai Bitrus ɓedo n bara dehi yi, ɓa kuka lo vingwo aba nsi.

⁴ Oɓa ngun aba ɓai busi, ama bara dehi wa du Bitrus ya wa si nabye.

⁵ Wa ya awyeshi, wa gye azafije nzhi, ama to wa lo dna nmin.

⁶ Shi Bitrus da nwo ɓo kma ɓe nyi, ɓo si ɓo wa ce wa lo dna nvingwo. Wa gye azafije n ya fi.

⁷ Eje nna ɓei cei puwo n tukwo nyi, n yazhi n tukwo bwa. Odo n na ɓei ce pawo n nayi nyi, n yazhi n kwo bwai.

⁸ Bara dehi ce wa lo dna n vingwo wa gye wa gaiciya ga.

⁹ Har nsayi to ɓai dudu ɓa pa Littafi ɓeda ɓo ge, Yesu ɓo je kala la n vingwo m.

¹⁰ Abarahi ɓa je ɓa nya ze lo ɓa puwa.

¹¹ Maryamu woi gni woi cibwi. Shi wo ɓo ya awye fi n vingwo.

¹² Wa gye amalaika zhi ngun-aba, n naje bui-bui kpe, n sase fi aba n Yesu nayi ɓo shi nyi, zaknayi n tukwo bwa, zaknayi njesun n apita bwa.

¹³ Ɓa nya wo ɓo ge, “Nyikwoza knihin nu zhin hoi cibwi a?” Wa gna ɓa ge, “Ɓa la mi Dagayi la, mi ta kpe aba lo nɓa woi ya shim.”

¹⁴ Wa bmiya awye wa gye za gni nwo avun, ama to wa kpe oza ye m, ashe Yesu nu gni.

¹⁵ Yesu wa nya wo ge, “Knihin nu zhin hoi ci bwi a? Ho ye nyikana?” Maryamu wa gye ngye lambu zhin yi ho nu dna, wa ci wo ge Puwada ngye ho la wo la ho la so, wu mi aba, ma lo mi la wo ɓe cei.

¹⁶ Yesu wa yi wo, “Marymu!” Maryamu wa lo da wo, wa yi wo n kala yi, “Malam.”

¹⁷ Yesu wa ci wo ge, to to mi bwa m, ntu ge mi to gun lo mi Dada aba kpam. Ama lo da omi azaje ho gna ɓa ge, mi du gun da mi Dada nfye Dadayi, omi Shekwoyi nfye Shekwoyi.

¹⁸ Maryamu wa gye Yesu abara, wa gna ɓa ge, “Mi la gye Dagayi wye,” wa pmi wa gna ɓa owo tnu-tnu.

¹⁹ Nwyeshe-bwai n Ladiwyihi, owo abara ɓai ye fi n nyakun, n na bai gu-gu-yi ntu ge ɓa ɓo wo a Yahudiyi atukwoda dna. Nwyekpatayi ɓa gye Yesu gni nɓa tasin. Wa sa ɓa mi wagna, “Bugbafu nfye aba.”

²⁰ Shi wo ɓo ku ɓa sa mi, wa wu ɓa owo abwa, ɓedo n wo apita yi n nabmayi. Aɓo da ɓa n mwa shi ɓa ɓo je ɓa Dagayi wyegye.

²¹ Wa je ɓa ci ge, “Bugbafu kwo kunsun n fyei!” Ngye shi Dada wa tnu mi, mihin mi tnu fye.

²² Shi wo ɓo da lo nu, wa ya sun kpe ɓa, wa gna, “Fye gwo Zafun Gyi-gyi-yi.

²³ Aza nfya zhin ɓa gafara, a ku gafara zhin ɓa ama aza nfye to zhin ɓa gafara m, a to zhin ɓam.”

Toma Bugbaʼba Da

²⁴ Zaknayi nwo abara, ai yi wo Toma wo ɓo zhin aza ʼba nu, to woi da dna n na zaje yim.

²⁵ Shi abara aje ɓo gna wo ge, “Yi ku gye Dagayi wye,” Wa gna ɓa ge, mi ta ga gaiciya m, sai mi ku gye akusa ci wye nwo abwada ma to bwa, ɓedo nwo abmayi ma to bwa njesun.

²⁶ Anyipyeyi nyimwa-nyimwa avun, abara ɓai ye fi n nyakun, Toma ɓo dna nkunsun n ɓai i wyihi. Abokunmi ɓo gu-gu-yi, ɓa Igye Yesu dna gni n ɓa tantasin, wa sa ɓa mi, “Bugbafu kwo kunsun n fyei.”

²⁷ Wagna Toma ge, Dna ho bwanyi n mi abwada. Ha to mi abmai bwa, to zhin shaka zhin m, la gaiciya ga.

²⁸ Toma wa ci wo ge, “Omi Dagayi nmi Shekwoyi.”

²⁹ Yesu wa gna wo ge, “Ho ga gaiciya shi ha gye mi wye. Anabarka da nu aza nɓa to gye mi wye nyin ama ɓai ga gaiciya.”

³⁰ Yesu ɓeiku aɓo wo-wo-yi zhin nmwa nwo abara awyeba, nɓa to kafi lo n Littafi yem.

³¹ Ama aka adeye ntu ge, fya kpe ge, Yesu nu zhin Kristi Shekwoyi Nugun, nfya ga wo gaiciya fye ɓa bwa wye-wyeyi nyalo-nyalo nya dna nwo eye.