Yohanna 2 - Alkawali Woiwoyi

Mulapa N Kana

¹ Shi anyipyei ngun aba ɓo la, diya, Yesu ʼya wa lo mula pa n Kana Galili nya.

² Yesu ɓedo nwo abara ɓei nyi ce n mula pa ʼbahi.

³ Esa nu nya sin-sin yi ɓo ku zo na mula pa ba yi, Yesu ʼya wa gna Yesu ge, “Gye nyasin-sin yi ku zo.”

⁴ Yesu wa ci wo ʼya ge, mita zhin nyaho-nyahoyi n saiye m. Ai omi sa to sin n mi ɓa zhin oɓo wo-woyi nyi m.

⁵ Yesu ʼya wa gna atnu-tnui ge, “ɓo wa gna fye ge fye zhin, fya zhin.”

⁶ A shakun yakwo ɓei zhin ɓo n gun tnanyi, a shakun akuta nya nu ɓei. Ɓaɓo zhin ɓai gyi a garuwa-kanazuru nya ngye shiba (20) ko kuwa shita (30), a Yahudiyi ɓei zhin amula ɓo n ɓai nu.

⁷ Yesu wa ci ge, “Fye nu ɓa n nuwan yi.” Nsayi-sayi-i yi, ɓa nuɓa.

⁸ Yesu wa ci ɓa ge, “fye lo cei fye ga mula-tukwoda.” Ɓahin kwa ɓa lo n cei.

⁹ Shi wo ɓo to wo, to wakpe aba n kwa gmi m, ama atnu-tnuyi da ɓei kpe. Ntu cenu mula tukwoda wa yi mula ɓa.

¹⁰ Wa ci wo ge, “Nyasin-sinyi ye dalo sosai. Knihin nu na zhin ai ɓei n deyeyi so shi a? Azaje zhin ɓa ɓe n nyasin-sinyi manayi nu na bye. N kwa ku zo, a kma ɓe n nukwoyi yi.”

¹¹ Deye nu ɓei zhin ɓo wo-woyi kmisunyi, n Yesu ɓo zhin dna n Kana Galili nya. Shi owa bara ɓo gye wo mwa-mwa, ɓa ga wo gaiciya.

¹² Shi na ɓo knu na mula ɓo zhin ba, Yesu wa lo Kafarnahum n wo ʼya yi n wa zaje yi, n wa barai, ama ɓa to ɓo mwasa n ɓom.

Aduwa Nyakun To Zhin Gniko Num

¹³ Esa nu Paska ɓo la wu viyi, Yesu wa lo Urushelima.

¹⁴ Wa gye aza fi n na duwa-nyakun ɓai kun anya. A nakwo, akni, ɓedo n na lukpe yi. Agyiwye shanyi ɓo nyi ce.

¹⁵ Wa pmi knalufin wa nya ɓa ya na duwa nyakun, Wa nya anyakunyi ya, Wa kni atebur nyikun.

¹⁶ Wa gna alukpe kunyi ge, “fye kun anya ye ya n ya. Fye to ze ʼmi Dada nyakun a gnikwo gni ba m.”

¹⁷ Owo abara ɓa pa ge, Littafi Alkawali kwo-kwoyi ɓo ku da ge, “Wyenyi ntu ho nyakun ɓo, kwo nu ɓa gyi mi ngye ona.”

¹⁸ A Yahudiyi ɓa nya ɓo ge, “Nyika ga ho iko yeʼa? Ngye Shekwoyi iko nu, gna yi ya wo. Zhin aɓo wo-woyi ya gye.”

¹⁹ Yesu wa cige, “To, miɓa zhin ga fye. Fye la aduwa-nyakun ye ya, miɓa mi kwo n na nyipyei ngun ata kawai.”

²⁰ Nsayi ɓa ya aɓoda, “Yi ɓei mi nyakun ye n na ye shinyi nu, Hoi gna ho ɓa mi kwo na nyipyei ngun ata kawai? Kwo ta ye zhin.”

²¹ Ama Yesu ɓei da wo nayi nu ɓo.

²² Sanu n wo ɓo laka n vingwo, Owa bara ɓa pa nya wo ɓei gna ɓa nyi. Ɓa ga Littafi Gyi-gyi-yi gaiciya. Ɓa ga Yesu eda gaiciya njesun.

²³ Aza n mwa begye n paska ɓa gawo gaiciya, ntu naɓo wo-woyi ɓo n ɓa ɓei gye nyi. Kwa wu ɓage, wonu zhin aza gniyi.

²⁴ Yesu to ɓei ga ɓa gaiciya m, gama wo kpe zanyi-kwoci bugba ye lo sarai.

²⁵ Zaho-zahoi ta mi wa gna wo zado ɓon. Ntu ge wo kpe aza bugba lo sarai. Zado nu to ɓei ɓa gna wo zanyi-kwoci ɓon. Wo ɓei kpe shi za bugba pye doshan yi.