Yohanna 19 - Alkawali Woiwoyi

¹ Nsayi Bilatus wa la Yesu wa zhin wo bulala.

² Asoja ɓa zhin lawanyi aknawuyi nya, ɓakun wo n tukwo; ɓa kep wo eje dnagmayi.

³ Ɓa lo ɓai ci wo ge, “Zaci saraci. A Yahudiyi ʼSu!” Ɓai kni Wo apmi nna wyeba.

⁴ Bilatus wa je gmiya lo bmi, wa gna a Yahudiyi ge, “Mɓe ga fye Yesu, ama fye kpe ge mi to sun wo n laifi ho yi m.”

⁵ Yesu wa gmiya lo n lawanyi aknawuyi nyai kun, n eje yakwoi kpe. Bilatus wa ci ɓa ge, “Ofye ʼza nfyei shi nyi.”

⁶ Shi amalami dnagmayi, ɓedo a Yahudiyi ɓo gye wo wye, ɓa ɓowyi, ɓai gnage, A zun-wo du! A zun-wo du! Ama Bilatus wa gna ɓa ge, fye la wo fya zun-wo du, ama mi to sun wonlaifiyim.

⁷ Ɓa ci ge, “Yi nna wyidnayi lo, n ya vi awyidnahi wo kunce lo wa fi, ntu ge wo yi wohin ge Shekwoyi Nugun nu.”

⁸ Shi Bilatus ɓo wo lo nu, wa wo dna ndu-du.

⁹ Wa jeze lo n Yesu yi, n wada-bokun, wa nya wo ge, “Ho gmi nna?” To Yesu wa dna wo ɓegbe m.

¹⁰ Bilatus wa ci wo ge, “Ho ta dna mi ɓogbe n? Ho ta kpe lo ge mi iko yi lo ma ya ho, njesun mi iko yi lo ma zun ho du n?”

¹¹ Yesu wa gna wo ge, “Ho to ikoi lo tu nmi tukwo m, akpe a ga ho kwo nshe. Oza n wa ɓe n mi yi nho aba nyi wo du lo n laifi.”

¹² Bilatus woi ye wa ya wo, ama a Yahudiyi atukwoda ɓa ci wo ge, N ha wo ya, agye ho to zhin Kaisar nugundo nu m. Oza nwa gna ge wo Izhin esu nu, wo zhin Kaisar nuwunyi nu.

¹³ Shi wo ɓo wo lo nu, wa gmi Yesu ɓe ɓa cei njesun, wa lo wa sase tu n shinkpegye-wada nya, aba aɓei cei lu-lu-yi na kutayi.

¹⁴ Nyipyei kwoi ye kwa gun atukwo, Paska yi ce shi ge nsu. Bilatus wa gna a Yahudiyi ge, “Fye gwoi fye ʼsu.”

¹⁵ Ɓa kni aku kpe wo, ɓai gna ge, “A lo nwoi, a lo nwoi, azun-wo du.” Ca wo Bilatus, wa nya ge, “Fyei wu ofye ʼsu?” Ɓa gna ge, “Yi to nsu yi lo m, sai Kaisar gmanyi.”

¹⁶ Bilatus wa Yesu ga ɓa ntu ge ɓa zun-wo du.

Ala Yesu Zundu

¹⁷ Ɓa lo n Yesu yi, woi la owohin zundu, ɓa lo aba a yi kwo, “Tukwo Bmila” n Yahudiyi ge Golgota.

¹⁸ Nɓo nu nɓa ɓo zun-wo du, nna zado yi ngun aba, gmanyi n bwapmi, gmanyi n bwai-zhe, n Yesu yi dna nna tasin.

¹⁹ Bilatus wa ku nya ka, wa ce kwo ma n zundu. Nyanyi nkwo ɓo ka kpe, “yesu nazaratiyi za a yahudiyi ʼsu.”

²⁰ Aba nna ɓo zun Yesu du nyi, kwo to ɓo mwakpa n zhimi yim. Aza nmwa begye ɓa rubutuhi ba, kwo ɓo kakpe nna-byei ngun ata nu. Helleni, n Roma yi ɓedo na Yahudiyi byei.

²¹ A Yahudiyi amalami adnagma yi, ɓa gna Bilatus ge wo la rubutuhi shan do, wa ci ge, Yesu a gna, “Omi nu zhin a Yahudiyi ʼSu.”

²² Bilatus wa gna ge, “Enya nmi ku ka, mi ka, kwo ɓa bwa kpe lo nu.”

²³ Esa nu ɓa ɓo la wo zun-du, asoja ɓa ku wo aje ɓa kpa ɓa zhi aku ngun-anyi, ɓa ga zaho-zahoi wo nya. Ama ejekpe yakwo ho ɓo nyi to gun-gun yi m, n lu-luyi nya kwo laka nbegye har kwa lo sinta.

²⁴ Ɓa gna aje ge, “Yi to sa kwo yam; ama yi she ca-ca n kwo tukwo agye oza nkwo ɓa zhin wo nya.” Deye ɓo ku Littafi Gyi-gyi-yi ɓeda nu nkwo kafi ge, “Ɓa gna mi aje ga aje tu nmi jekpe tukwo ɓa she ca-ca.” Enya nu na soja ɓo zhin.

²⁵ N Yesu zundu aba, Maryamu, owo iya ɓei gni, ɓedo nwo iya mado yi, n Maryamu Kilyobas nyikwo yi, n Maryamu Magadaliya yi.

²⁶ Esa Yesu ɓo gye wo iya gni ɓo, n bara hoi nwo ye wo n gni ɓo, Wa gna wo iya ge, “Oho nugun gninyi.”

²⁷ Wa gna barahi ge, “Oho iya gninyi.” Tunyi nsahi, barahi wa la wo iya lo cei nwo puwa.

²⁸ Shi Yesu ɓo ku kpe ge aɓo vinya nku nu njesun ntu ge Littafi Gyi-gyi-yi kwa nu, Yesu wa ci ge, “Nuwan mikun wo Milo.”

²⁹ Nna bahi nuwan mamayi ɓo shi n nyikun yi, ɓa la soso ɓa da kwo dna, ɓa gyi soso hi n busi, ɓa lo nkwoi n Yesu ʼgbe.

³⁰ Shi wo ɓo la nuwanhi gwo, Yesu wa ci ge, “Aku zo.” Wa ka tukwo dna wa fi.

³¹ A Yahudiyi to ɓei cei pma a ya aza kpe n zundu har Satiwyin. Ntu ge Satiwyin nu ɓei zhin Paska gyi nya. Ɓa lo ɓa gna Bilatus ge a bma ɓa apita-ya ntu ge ɓa da fi a bi ɓa.

³² Asoja ɓa ɓe ɓa bma avihi apita-ya, nna ɓo zun ɓa du ngnisun n Yesu yi nyi.

³³ Ama esa nu ɓa ɓo ɓe Yesu aba, ɓa gye wo la fi, to ɓa bma wo apita-yam.

³⁴ Sai soja gmanyi wa fin wo mashi nna-bmayi, ami n nuwan yi ɓa zeya nsayi-sahi yi.

³⁵ Oza n wo ɓe gye ɓeye nyi, owo nu ga saida ge, owo saida zhin gaiciya nu. Wo kpe lo ge wo da gaiciya nu, woiga saida ye nnabai fya ga gaiciya nu njesun.

³⁶ Aɓo deye ɓo zhin ntu ge Littafi Gyi-gyi-yi ɓeda kwa nu nu: “A to bma wo a sunkun yan kwo gmanyi.”

³⁷ Littafi kwa je da nnabado ge, “Ba ɓei shi wo awye oza nɓa ɓo la wo fin mashi.”

³⁸ Nna ɓedeye avun Yusufu Arimatiya nya, Yusufu ye ɓei zhin woi vi Yesu n so-so nu, ntu ge wo ɓei zhin woi wo a Yahudiyi dna. Wa lo Bilatus aba ge, wo ga wo iko wa shin Yesu nayi, wa ga wo.

³⁹ Nikodimu nwo ɓo ɓe Yesu aba nkmisunyi nsukwoyi nyi, wa ɓe n kunsun n Yusufu yi. Nikodimu wa ɓe n omi sundayi shi, okwo Shanwo ɓei ɓa sun ngye pam tagyi.

⁴⁰ Oɓa ʼngun aba ɓa la Yesu nayi ɓa kmi kwo dna naje, ngye shi a Yahudiyi kun-nu zabi nyanyi.

⁴¹ Vivi aba yi aɓo zun Yesu du, ofwa ho ɓei gni ɓo, n ofwa hi vingwo ɓo nyidna nna to ɓo shin ʼza bi nkwo m.

⁴² Ntu ge nyipyeyi shiri zhin nya nu ɓei ntu Paska ɓo, ɓa wo bi dna n vingwohi nkwo ɓei wu vivi nvi.