Yohanna 17 - Alkawali Woiwoyi

Yesu Aduwa-zhin Ntu Aza Bo

¹ Esa nu wo ɓo la pwo aɓeda ye da ɓo, Wa kpe awye shi nshe wa gna, “Dada! Esa la si ha la ho Nugun tu. Nabai, Nugun nwohin wa la ho tu.

² Gama Ho la iko ga wo tu naza tukwo vinya, ntu ge wa ga wye-wyeyi nyalo-nyalo nya nna aza ba nho ku ɓa ga wo nyi.

³ Zokwo wye-wyeyi nyalo-nyalo nya nu nyi, ɓa kpe ge ho nu zhin Shekwoyi gaiciya nya gmanyi, ɓedo n Yesu Kristi yi n ha tnu nwoi dna anyi nyi.

⁴ Mi la ho latu dna nanyi, ngye shi mi ku aɓo zhin vinya nha tnu mi ge mi zhin nyi.

⁵ Nsaiye, Dada, la mi tu nho aba, n latu pyai nmi ɓei cei shin sun nhoi, tunyi to ai zhin anyi nyim.

⁶ “Mi ku ho ɓo gna aza vinya nha ga mi fi nanyi nyi. Ɓa ɓei zhin ha nyanu, hoi ga mi ɓa, ɓai ku gaiciya gaho ɓeda.

⁷ Nsaiye ɓa kpe lo ge, anya vinya nmi cei lo, ho naga mi.

⁸ Ntu ge mi ku ho awyidna ga ɓa vinya, ɓai la gwo. Ɓa kpe lo ge ma gmi nho aba nu, Oho na tnu mi.

⁹ “Mita gyiwye ntu aza vinya ɓo nu m. Ama mi gyiwye ntu naza ɓo nu nha ga mi nyi. Ntu ge ɓa nu zhin oha nya.

¹⁰ Anya vinyan n mi cei, ɓa zhin oha nya nu, Oho anya omi anya nu, Mi-i la latu bwa nɓa aba.

¹¹ Miye ma fa anyi nu, ma ce ɓa fi ʼya, ma ɓe ho aba. Dada Gyi-gyi-yi, oɓa nu nho ku ga mi nyi, mi ye ha kna ɓa nho ikoyi, ntu ge ɓa ze gmanyi, ngye shi yi zhin gmanyi nyi.

¹² Esa nu mi ɓei dna cei nanyi nyi mi ɓei la ɓa kna, mi-i gu ɓa, dna n eyehi n ho ɓei ga mi nyi. Nabai to ɓa bwim akpe ena ɓi ntu ge wanu Littafi Gyi-gyi-yi ɓeda.

¹³ “Nsaiye, mi ɓe ho aba nu, esa nmi ɓei kunsun nɓai, ma ku aɓo gna ɓa n mwa ntu ge oɓa agmada kwa nu.

¹⁴ Mi ku ho ɓeda ga ɓa, anyi wun ɓa nu, ntu ge ɓa to zhin anyi nya nu m, ngye shi mihin to zhin anyi nya nu nyim.

¹⁵ Mi ta zhin aduwa ge ɓa kun ɓa nanyi num, ama ha kna ɓa n shetan iko.

¹⁶ Ɓa to zhin anyi nya nu m, ngye shi mi to zhin anyi nya nu nyi m.

¹⁷ Ze ɓa gyi-gyi-yi n gaiciya yi, oho ɓeda nu zhin gaiciya.

¹⁸ Ngye shi ha tnu mi dna nanyi nyi, elo nu mihin mi tnu ɓai fi nanyi.

¹⁹ Mi la mihin ze gyi-gyi-yi ntu ɓa ɓo, nnabai ɓahin ɓa ze gyi-gyi-yi dna n gaiciya.

²⁰ “Mi ta zhin aduwa ntu aza deye ɓo nu gmanyin, ama mi zhin aduwa ntu ɓa ɓo nɓa ɓa ga mi gaiciya ntu aza deye saida zhin ɓo nyi.

²¹ Mi zhin aduwa ge ɓa ze gmanyi, Dada, ngye shi mi dna nho, ohohin ndna nmi. N lo nu ɓa fi n yi mi, ntu ge anyi ɓa ga gaiciya ge oho na nu mi.

²² “Mwa-mwa nha ga mi nyi mi la ga ɓa. Mwa-mwa gmanyi ze nya, ntu ge ɓa ze gmanyi.

²³ Omi ndna nɓa mi, ohohin ndna nmi. Fwa ɓa ze gmanyi dei-dei, anyi ɓa kpe ge oho na tnu nmi-i, Mi ku ye nɓai ngye shi hohin ha ye mi nyi.

²⁴ Dada, mi ye aza no ku ga mi nyi, ɓa sase aba nmi nyi, ɓa gye mi mwa-mwa wye, mwa-mwa n ha ga mi ntu ge, ho ye mi tunyi to ai zhin anyi m.

²⁵ “O, Dada ɓefyeceyi, anyi ta kpe ho ye lo m. Ama mi da kpe ho ye lo, abara ye njesun ɓa kpe lo ge ho na tnu nmi yi dna na nyi.

²⁶ Mi ku ho wu ɓa, mi-i ɓo wu ho ɓa, n nabai yeye dnagmayi nho cei nmi aba nyi kwa dna nɓa mi, omihin njesun nɓa mi.”