Yohanna 12 - Alkawali Woiwoyi

Mi Ta Mwasa Nkunsun Nfye Yim

¹ Paska kwoi ce anyipyei ngun tnanyi, Yesu wa lo Baitanya, Liyazaru ayi, oza n Yesu ɓo la wo kala n vingwo nyi.

² Ɓa ku nyagyi zhin ntu Yesu ɓo. Marita woi gni woi zhin nyagyi ɓo, Liyazaru wa sase shi na nyagyi ɓa n Yesu yi.

³ Maryamu wa la omi sundayi wa zekpe Yesu nna pita, wa wun kwo ya nwo tukwoyi-i.

⁴ Ama gmanyi nwo abara, wato Yahuda Iskariyoti, nwo ɓo kun Yesu nyi to ca da wom, wa ci ge,

⁵ “Ai omi ye ɓa ku lo a naira tagyi-tagyi. A ɓei ɓa kun kwo nnabai a ce agyiwye a ga awyekwoyi.”

⁶ Yahuda to ɓo da lo nu ge, wo ye wa ku awyekwoyi nu bmazhin m, ama ntuge wo nu ɓei zhin woi shi agyiwye, wo ɓei zhin woi kni fya-fya.

⁷ Yesu wa ci ge, fa wo, wa zhin kwo ntu nyipyeyi ɓo nu nna ɓei bi mi ncei nyi.

⁸ Fye ɓa mi fya bma awyekwoyi zhin nɓa kunsun nfyei cici nyi, ama fye ta bwa mi cicim.

⁹ Eas nu aza ɓo wo ge, Yesu la ɓe zhimi, yewa kwa knaɓe ntu ge kwa gye wo njesun ɓa gye Liyazaru n Yesu ɓo la wo kala n vingwo nyi.

¹⁰ Amalami adnagmanyi ɓa zhin shaula ntuge ɓa wu Liyazaru ce.

¹¹ Gama ntu wo ɓo nu Ayahudiyi ɓa fa ɓa kunnu ɓa ga Yesu gaiciya ge owo nu zhin Gniyi.

Deji La Yesu Gwo Nna Gmadayi

¹² Shi efye ɓo gyi, aza begye nɓa ɓei ku ɓe ntu Paska ɓo nyi, ɓa wo ge Yesu ɓe Urushelima lo, woi ɓe lo n zokwo.

¹³ Ɓa ku abala afintolo, ɓa shegun wo n zokwo, ɓai ɓowyi ɓai gna, Hosanna! Anabarkada nu oza nwo ɓe dna Dagayi eye! Anabarkada nu Esu a Israilayi nya.

¹⁴ Yesu wa gun Zhagawyi ɓiyi, ntu ge Shekwoyi ɓeda kwa nu ge,

¹⁵ “Fye to wo Ofye Esu dnam a Israilayi, gama wo ɓa ɓe n tukwo-gbayi, n sase tu n zhagawyi ɓiyi.”

¹⁶ Nsahi owo abara to ɓei kpe aɓo nɓa ka fi n Littafi Gyi-gyi-yi ge ɓa nu num. Sai sanu Yesu ɓola jeze lo eshe ai la wo latu, ɓai kpe ge aɓo nmwa begye ɓei ku nu nɓa wye.

¹⁷ Aza nɓa zhi n vingwo aba, ɓa gye ngye shi Yesu la Liyazaru kala nyi, ɓa ɓo laɓa ɓai gna azaje aɓo nwo ɓo zhin.

¹⁸ Ntu deye ɓo aza nmwa begye ɓa kun lo ntu ge ɓo gye wo, ntu aɓo wo-woyi ɓo nɓa wo ge wo ku zhin nyi.

¹⁹ A Farisiyi ɓa gna aje ge, “Wo ku nasara zhin n yi tukwo, gye aza vinya du dawo.”

²⁰ A Helleniyi ho nɓa ɓo ɓe Urushelima ntu Paska ɓo,

²¹ Ɓa lo Filibbus aba, nwo gmi n Baiseda nyi n Galili kni, ɓa gna wo ge, “Male yi ye ya gye Yesu.”

²² Filibbus wa gna Andarawus, ɓa kuka ɓa gni lo ɓa gna Yesu.

²³ Yesu wa gna ɓa ge, “Esa la si nna ɓa ga Oza Nugun mwa-mwa.

²⁴ Ma gna fye gaiciya, ndei Owyibyegye to kaya dna nkni kwa fim, kwo ɓa bwa kwo nya shi lo nu gmanyi, ama nkwa fi, kwo zhin kwa ga wyishin nmwa.

²⁵ Oza nwo ye wohin wye-wyeyi wo ɓa bwi, ama oza nwo wun wohin wye-wyeyi nu, wo nu ɓa pwo.

²⁶ “Oza nu nwo ye wa ze mi ʼbaratile wa vi mi n saho-sahoi. Oza nu nwo ɓa ze mi bara, Dada ɓa ga wo mwa-mwa.

²⁷ Bugba wun mi lo nmwa sosai, nɓa gna Dada nu wa gni mi n wahala nu n kwo ɓelo nmiyi dna anyi.

²⁸ Dada la oho ye tu!” Ɓa wo begye nshe kwoi gna, “Mi la mi ye latu, Mi-i ɓa la kwo tu njesun.”

²⁹ Esanu aza ɓo wo begye ɓa wo ngye ogma na jewyi, azaho ɓa ci ge malaika ku ɓo da nwoi.

³⁰ Yesu wa gna ɓa ge, “Begye nfya wo nyi kwa ɓe ntu fye apma ɓo nu, to ge ntu nmi ɓo m.

³¹ Esa la si ada anyi owa. Esa la si a wan shetan, yerima anyi ye nya, a she wo ya nbmi.

³² Esa nu aɓo la mi tu nshe (tu n zundu) nɓo yi aza vinya ɓe cei nmi aba.”

³³ Wo ɓo da lo nu, ntu ge wa wu shi wo ɓa fi nwu.

³⁴ Aza yezhi ɓa dna ɓegbe ɓa gna, “Ya kpe lo ge Kristi ta fim. Wo zhin wye-wyeyi da nu nyalo-nyalo. Knihi nu zhin hoi gna ge wo ɓa fi-a? Kristi knidoyi nu n ho da wo ɓo a?”

³⁵ Yesu wa gna ɓa ge, “Emi buzangna ɓo kunsun nfyei nsai fyewyi. Fye zan-zan dna nkwo, ntu ge esa ɓe lo, wyegma ɓa dna, fye to ɓo je zokwo wyegyem.

³⁶ Fye ga buzangna ye gaiciya, kwo kunsun nfyei, ntu ge fya ze abuzangna aɓi.” Shi Yesu ɓo ku aɓo deye zo da vinya wa laka wa lo bwaho, to ɓa je wo wyegyem.

³⁷ Yesu ɓo ku aɓo wo-wo-yi zhin ɓai gye, dudu lo nu, aza nmwa begye to ɓa ga gaiciya ge wo nu zhin Kristi m.

³⁸ Anabi Ishaya ɓeda ɓo ku nu, nwo ɓo gna ge, “N nyika ba nu Dagayi wa wu wo iko-a?”

³⁹ Ɓa to ɓo mi ɓa ga gaiciya m, gama ntu ge Ishaya ɓo ku je da ge,

⁴⁰ “Shekwoyi ku awye bua ɓa. Woi la bugba dna ɓa kala, ntu ge, to ɓa mi ɓa gye wyeba ko ɓa bwa awyega dna nɓa bugba ko ɓa ɓe mi aba, ma ka ɓa gnam.”

⁴¹ Ishaya ɓo da lo nu, ntu ge wo ɓo ku gye Yesu mwa-mwa, wa da ɓeda tu nwo tukwo.

⁴² Dudu lo nu a Yahudiyi atukwoda nmwa begye ɓei ku gaiciya ga ge Owo nu zhin Kristi. Ama ɓa to ɓo ye ɓa wu ɓahin tukwo pei-pei m, ntu odna ɓo ge kada Afarisiyi ɓa nya ɓa ya nna duwa nyakun;

⁴³ Ɓa ɓo zhin ɓai gna ye aza nu ɓa ci ɓa, to ge Shekwoyi m.

⁴⁴ Yesu wa daɓo n begye kalayi wa gna “Oza nwa ga mi gaiciya wo ga Shekwoyi nu gaiciya nwa tnu nmi-i nyi.

⁴⁵ Oza nwo ku mi gye, wo ku Oza gye nwa tnu mi nyi.

⁴⁶ Ma ɓe ngye buzangna anyi nya, ntu ge Ozaho-zahoi nwa ga mi gaiciya wo ta zan-zan dna nwyegmam.

⁴⁷ Oza nwo wo mi ɓeda to woi ga gaiciya m, mita da wo owam, ntu ge ma ɓe ma gni anyi nu, to ge ma da anyi owam.

⁴⁸ Ama oza nwo na mi aɓo, to woi gwo mi ɓeda m, aɓo da wo owa nʼwadawyi.

⁴⁹ Gama ɓeda nmi da nyi omi ɓeda nu tom, Mi da ɓo nu n Dada wa tnu mi ge mi da.

⁵⁰ Mi kpe lo ge Owo ɓeda ɓa ga za wye-wyeyi nyalo-nyalo nya. Ntu ce nu, Enya wa gna mi ge mi da, ma da.”