Yohanna 11 - Alkawali Woiwoyi

Liyazaru La Fi

¹ Oza ɓei nyi ai yi wo ge Liyazaru nyasan san wo. Wo ɓei dna n Baitanya nu ɓedo nwo amapui yi, Maryamu n Marita yi.

² Maryamu ye nwo mapui ɓei shi n nyasan yi nyi, owo nu ɓo ze omi sin-dayi ya kpe n Yesu apita, wa wun kwo ya nwo tukwo yi-i.

³ Ntu cenu, Liyazaru mapui ɓa tnu tnu-tnu ga Yesu ge, “Dagayi gye nyasan oho ʼza ye-ye-yi lo.”

⁴ Shi Yesu ɓo wo lonu, wa gna ge, “Ai Liyazaru nyasan to zhin efi nya num, ama ntu Shekwoyi latu ɓo nu; njesun Shekwoyi Nugun ɓa bwa latu.”

⁵ Yesu ɓo zhin woi ye a Marita n, Maryamu yi ɓedo n Liyazaru yi.

⁶ Esa Yesu ɓo wo Liyazaru nyasan ɓo ncei, wa dna nnaba nwo ɓo dnanyi anyipyei ngun aba kpa to wa lo Baitanya m.

⁷ Avun wa gna wo abara ge, “Yi lo Yahudiya kni.”

⁸ Ama owo abara to ɓo ce pma ɓa lo m. Ɓa gna wo ge, “Dagayi nbwasun n yahoi nu to, nɓa ɓo ye ɓa kni ho akuta n Yahudiya kni n, Hoi ye ha je lo ɓo?”

⁹ Yesu wa ci ɓa ge, “Awa to nyi awo-cei-aba nu nyipyei buzangna nyan? Zan-zan yi ta ce bwonyi m, ntuge wo gye wyeba lo sarai.

¹⁰ Ama n Sukwoyi oza zhin wa cbwonyi ntuge wyegma dna lo.”

¹¹ Wa gna ɓa ge, “Eyi nugundo Liyazaru la wangye, ama mi ɓa lo mi kun wo agyewyi ya.”

¹² Owo abara ɓa ci ge, “ngye wo wan egye nu ai wo ɓa kun agyewyi.”

¹³ Yesu ɓo da efi nu ɓo, owo abara ɓai gye ngye egye gam nu.

¹⁴ Ntu ce Yesu wa gna ɓa pei-pei ge, “Liyazaru lafi.”

¹⁵ A da mi lo ntu fye ɓo, shi mi to ɓo gni nwo afi bam, deye ɓa ga fye sa fya ga mi gaiciya.

¹⁶ Toma, nna ɓei zhin ai je wo yi ge aza-aba nyi, wa gna wo abara aje ge, “Yi lo yo fi nknusun nwoi.”

¹⁷ Shi ɓa ɓo si Baitanya, a gna ɓa ge, Liyazaru ku anyipyei bwa ngun-anyi dna nvingwo.

¹⁸ Baitanya ɓei bwasun ngye mil ngun-aba nu n Urushelima yi.

¹⁹ A Yahudiyi nmwa begye ɓa ɓe ɓa gye Marita n Maryamu yi ntu oɓa mapui fi ɓo.

²⁰ Esa nu Marita ɓo wo ge Yesu ɓe lo n zokwo, wa lo shegun Wo, ama Maryamu wa ce dna napi.

²¹ Marita wa ci Yesu ge, “Ho ɓei gna ho gni, omi mapui to ɓei ɓa fi m.

²² Ama mi kpe lo ge kwo nsaiye Shekwoyi ɓa ga ho nyaho-nyahoi nha gyi wo wye.”

²³ Yesu wa gna wo ge, Oho mapui ɓa laka njesun.

²⁴ Marita wa dna wo ɓegbe wa ci ge, “E mi kpe lo ge wo ɓo laka n nyippyei kmaknayi.

²⁵ Yesu wa gna wo ge, Mi zhin maku aza fi ka, ma je a wye-wyeyi ga, oza nwa ga mi gaiciya kwo woi fi, wo ɓa je wye-wyeyi bwa;

²⁶ Oza nwo n wye-wyeyi, wa ga mi gaiciya wo ta shan fim. Ho la gaiciya ga deye?”

²⁷ Marita wa ci ge, Dagayi mi la gaiciya ga ge, Ho nu zhin Kristi Shekwoyi Nugun nwo ɓe anyi ye lo nyi.

²⁸ Marita wa lo da Maryamu nnapi, wa yi wo gni fya-a, wa gna wo ge, “Dagayi la ɓe, woi nya ho ɓo lo.”

²⁹ Nsayi-sayi, Maryamu wa lo da Wo.

Yesu La Liyazaru Lakala

³⁰ Yesu to ɓei lo dna n zhinmin, ama wo ɓei ye gni nnaba nu Marita ɓo shegun wo nyi.

³¹ Shi abwiwanyi ɓo gye Maryamu woi gmiya lo nnawyei ya, ɓa gye ge wo lo wo cibwi nu n Liyazaru vingwo. Ntu cenu ɓa vi wo lo.

³² Shi Maryamu ɓo si Yesu aba, wa ya shi n Yesu apita ʼba, wa gna wo ge, “Dagayi ho ɓo gna ge ho gni omi mapui to ɓei ɓa fim.”

³³ Esa wo ɓo gye Maryamu ɓedo na Yahudiyi ɓai ci bwi, bugba wun wohin n kalayi.

³⁴ Wa nya ɓa ge, “Fye woi ɓi shi nna?” Ɓa gna wo ge, “Dagayi ɓe ha gye.”

³⁵ Yesu wa ci bwi.

³⁶ A Yahudiyi ɓa ci ge, “Ai owo nugundo nu sosai, ɓo kwo la sun woi ci bwi nyi.”

³⁷ Azaho ɓa ci ge, “Ashe oza nwo ɓo kpe wyebuayi awye ya, to ɓo ɓa mi wa zhin ozaye to wa fim?”

³⁸ Yesu nsun-sungye yi mwa, wa lo vingwo aba. Vingwohi ɓo zhin kuta-bmi nu, nkuta dnagmayi gu nkwo egbe.

³⁹ Yesu wa gna ɓa ge, “Fye kpe kuta ya!” Ama Marita wa ci ge, “Dagayi aɓa gye wo la casin, ntuge nyipyei nyihi nu nyi shi wo ɓo fi.”

⁴⁰ Yesu wa gna wo ge, “Mi to ku gna ho ge ndei ha ga gaiciya ho ɓa gye Shekwoyi mwa-mwa wye m?”

⁴¹ Aza ɓa kpe kuta ya. Yesu wa kpe awye wu ʼshe wa zhin aduwa, “Dada ma gode shi ho wo mi aduwa.

⁴² Mikpe lo ge ho zhin ha wo mi cici, ama mi da deye lonu, ntu aza ɓo nu nɓa zhi ya nyi, ntuge ɓa ga gaiciya ge oho na tnu mi.

⁴³ She wo ɓo ku da lonu, wa yi nbegye kalayi ge, ‘Liyazuru gmiɓe.’ ”

⁴⁴ Nsayi-sayi, Liyazuru wa gmi ɓe, n papyi, dna na zafi aje, Yesu wa gna ɓa ge “fye lo wo ya, fya ga wo zokwo wa duya.”

⁴⁵ A Yahudiyi nmwa begye, nɓa ɓo ɓe Maryamu gye, ɓa gye oɓo n Yesu ɓo zhin, ɓa ku gaiciya ga wo.

⁴⁶ Ama azadoho ɓa kuka ɓa lo ɓa gna Afarisiyi ɓo Yesu ɓo zhin.

⁴⁷ Ntucenu, amalami dnagmayi nna Farisiyi ɓa yezhi ntuge ɓa dna aɓo wye. Ɓa nya aje ge, “Yi ɓa zhin wuna? Ntuge Ozadeye zhin aɓo wo-woyi lo.

⁴⁸ N ya fawo wa gyi abye, aza ɓa ku zo wo vi. A Romayi ɓo ɓe ɓa la yi aduwa nyakun ya, ɓo wu yi vinya.”

⁴⁹ Ama ozadoho nɓa mi ai yi wo ge, Kayafa, Malami Dnagmayi nu, wa gna ge “Fye zhin atukwo gbolo danu, fye ta kpe ɓo ye lom.”

⁵⁰ Gwoma zaknayi wo fi, cei ya cici ge begye kwo bwi. Tile zaknayi ye wa fi ntu yi ɓo.

⁵¹ Oɓo n Kayafa ɓo da ge Yesu ɓa fi ntu aza vinya ɓo nyi, Wo ɓo da kwo ntuge wo nu ɓo zhin Malami dnagmayi, ama Shekwoyi nu ɓo wu wo kwo, wo to ɓo da kwo n wohin nubo zhin num.

⁵² Shekwoyi ɓo ku lu da ge Yesu ta-a fi, ntu a Israilayi ɓo nu gmanyim, ama ntu nna aza vinya ɓo.

⁵³ Tunyi nwyihiyi a Yahudiyi atukwoda ɓa ya wo zan shin ntuge ɓa wu wo.

⁵⁴ Yesu to ɓo je zan dna n Yahudiya knin Wo ɓei la Urushelima fa wa lo wa dna n zhi ɓiyi ho Ifraimu nya ɓedo nwo abara yi.

⁵⁵ Paskasa kwa wu vi, begye kwa ɓe Urushelima sapa to wyihi kwoi sim, ntuge ɓa ze ɓahin gyi-gyi-yi, paska wyi kwa kpesi.

⁵⁶ A Yahudiyi atukwoda ɓa ya Yesu zan shin, esa ɓa ɓo fi n aduwa nyakun, ɓa nya aje ɓo ge, “Fye gye lo ngye wo ɓa ɓe paska ye.”

⁵⁷ A Malami dnagmayi ɓedo a Farisi yi ɓei la egbe lu ga ge zahozahoi nwa gye Yesu wa da npye, ntuge ɓa wan Wo.