Yohanna 1 - Alkawali Woiwoyi

Buzangna Dna N Wyegma

¹ N kmisunhi Ɓeda ɓei nyi, Ɓedahi ɓei kunsun n Shekwoyi, Ɓedahi ɓei zhin Shekwoyi nu.

² Kafin a zhin nyaho-nyahoi wo ɓei kunsun n Shekwoyi.

³ Owo ɓeda na zhin anya vinya. Nyaho-nyahoi to lon n wonu to zhin m; anya vinya owo nu na zhin.

⁴ Wye-wyeyi nyi nwo mi, wye-wyeyi kwa ko zhin anyi buzangna nu.

⁵ Buzangnahi kwoi kna aba ya n wyegma. Wyegma kwa kwo ta mi kwa gyi kwo sun m.

⁶ Oza ɓo nyi ai yi wo ge Yohanna, Shekwoyi nu ɓo tnu n woi a mawo.

⁷ Wo ɓo ɓe ntu ge wa zhin saida ntu buzangnahi ɓo nu. Wato Yesu nu zhin buzangnahi.

⁸ Yohanna nu to ɓei zhin buzangna m, wo ɓo zhin saida buzangna nya nu kawai.

⁹ Nwo avun, buzangna gaiciya nya kwa ɓe kwa knaya na ʼza vinya aba nɓa fi nanyi.

¹⁰ Owo nu ɓo zhin anyi ye, Wa ɓe anyi n wa Zhin nyi. Ama anyi ye to ɓei kpe wo yen.

¹¹ Wa ɓe a Yahudiyi aba, n wo hin kni, ntu ge ɓa nu zhin wo aza, ama to ɓa gwo won, akpe aza fyewyi kawai n ɓa mi.

¹² Ama zaho-zahoi nwa gwo wo, wo ɓei la iko ga wo wa ze Shekwoyi ɓi. Onya nyi kawai n za ɓa zhin Wo la gaiciya ga, Yesu ɓa gni wo.

¹³ Aza nɓa ga wo gaiciya ɓa ku zhin aza n na la ɓa shan ma. Toge nayi nami nu, kwokuwa n za ɓemwi m, ama Shekwoyi na ma ɓa dna n wo ɓe ye.

¹⁴ Yesu ɓo la ze Oza wa dna n anyi ye n yi atasin. Yi ku wo latu gye wye. Latu Shekwoyi ɓi gba nya nu. N nunuyi na alheri n gaiciya yi.

Yohanna La Yesu Gmiwu

¹⁵ Yohanna ɓo zhin wo saida wa gna aza vinya ge, “Oza nyi n mi ɓo gna fye wo ɓo nyi. Mi ɓo gna fye ge wo ɓe lo n ma avun. Wo hin kwa wo dumi lo kpolo-kpolo, wo ɓei nyi tunyi sapai, wo kwo mi lo. Kafin a ma mi wo ɓo nyi.”

¹⁶ Eyi vinya yi ku ampariyi bwa, n alheri dnagmayi nwa ɓe yi n cei woi tu yi anabarka mwa-mwayi.

¹⁷ Gama Musa ɓo ga yi owa n kwo gmanyi yi, ama Yesu ɓei ɓe yi n gafara zhin yeye nya yi ɓedo. Alheri gna owa Musa nya bmiya lo, ntuge owa ɓo gna ɓo dna, n na ɓe yi kpakpeyi gbo-gbo nduwyi.

¹⁸ Ozaho to shin Shekwoyi wye gyem, sai Yesu gmanyi n wo nu kunsun n Shekwoyi nyi. Yesu, owo ɓi-gba, Shekwoyi zabayi, owo nu gna yi Shekwoyi ɓo.

¹⁹ A Yahudawayi ɓo tnu na priest yi ɓedo na Levi yi n Urushelima. Ɓa ɓe Yohanna ʼba ntu ge ɓa gye za n wo zhin Yohanna. Ɓa lo ɓa nya Yohanna ɓo ge, Ho zhin Masihu nu?

²⁰ Yohanna gna ɓa gaiciya, ge “Mi to zhin Kristi nu m.”

²¹ Ɓa je wo ɓo nya n ge, “Ho zhin Iliya nu?” Wa gna ba ge, “aʼa.” Har saiye ɓa nya wo ɓo, “Ho zhin anabi ho nu?” Wato n Shekwoyi ɓo zhin alkawali nyi, wa cige, “Aʼa.”

²² Ɓa nya wo sayi ge, “Ho zhin nyikanu? Yi ye ya gna aza n ɓa tnu yi tnu-tnu nyi. Wu yi hohin ɓo vinya?”

²³ Yohanna gna ɓa ge, “Mi zhin begye nu kawai dna zhabui. Mi zhin zokwo ga Dagayi nu wa ɓe shi Anabi Ishaya ɓei da nyi.”

²⁴ A Yahudiyi n na Farisiyi ɓa nya wo ɓo n jesun ge.

²⁵ “Shi ho to zhin Kristi nu nyi m, ko kwa Iliya kwo anabi nyim, Nyika ga ho iko hoi zhin batisma?”

²⁶ Yohanna ci ge, “Mi zhin batisma n nuwan nu kawai ama za gni nyin n fye atasin, fye ta kpe wo ye lon.

²⁷ Esa to ce lo nkun, wo ɓa ya tnu-tnu n fya ba. Mi to kunce lo ma, ma ze wo baran.”

²⁸ A ɓei zhin aɓo deye n Baitanya nu. Kwo nyi n Urdun kma nu, aba n Yohanna ɓo zhin aza batisma nyi.

²⁹ Sa n fye ɓei gyi, Yohanna gye Yesu woi ɓe, wa cige, “Fye gye kugya ɓiyi Shekwoyi nya nwo nu la alaifi anyi nya vinya nyi.

³⁰ Fye pa lo? Owo nu n mi ɓo gna fye wo ɓo nyi, nge oza ɓelo n ma vun, nwo du mi, ntuge wo ɓei nyi na bye-abye, wo gyi n mi abye.

³¹ Mihin to ɓei kpe wo yem, ama mi zhin batisma n nuwan yi, ma wu a Israilayi wo nu.”

³² Yohanna gna, “Ma gye Zafun Gyi-gyi-yi wo gmi n She ngye lukpe, kwa yatu n Yesu.

³³ “Mihin to ɓei kpe wo yem, sai dai Shekwoyi nu ɓei gna mi nge, ‘Shi ho ɓo gye Zafun woi yatu n zaho, Owo nu. Owo nu zhin aza batisma n Zafun Gyi-gyi yi.’

³⁴ Ma gye Zafun Gyi-gyi yi woi yatu nwo. Ma ga gaiciya ge zeye nu zhin Shekwoyi ɓi.”

Yesu Nla Anugundo Kni

³⁵ Of ya gyi, Yohanna yi gni n kun-sun n wa barayi, oɓa aba.

³⁶ Wa gye Yesu woi ɓe. Wa shi wa wye daidai, wa cige, “Gye! Shekwoyi Kugya ɓiyi lonu.”

³⁷ Yohanna bara ba ya Yesu vi.

³⁸ Yesu wa bmiya awye wa gye ɓai viwo, wa nya ɓa ge, “Fye ye kninya?” Ɓa gawo amsa ɓa cige, “Maigida, ho dna lo n na?”

³⁹ Wa ciga ge, “Fye ɓe fya gye.” Ɓa ɓe ɓa gye aba n wo ɓei dna. Wyeshe ɓei la she, ntu ce nu ɓa Ku gye wan n woi.

⁴⁰ Zaknayi nɓa, ai yiwo ge Andrawus, wo nu zhin Siman Bitrus mado.

⁴¹ Andarawus wa lo wa zan Siman shin, wa gna wo ge, “Yi ku gye Kristi wye.”

⁴² Wa ɓe n Siman yi n Yesu aba. Yesu wa ci Siman ge, “Oho nu zhin Siman, Yohanna nugun. Ama aɓa yiho ge Kefas wato apma nu.”

⁴³ Ofye a gyi, Yesu wa laka wa ɓe Galili wa gye Filibus wa gna wo ge, “vi mi.”

⁴⁴ Filibus ho ɓo gmi n Basaida nu. Basaida kwa kwo zhin Andarawus ayi nu, edo n Bitrus yi.

⁴⁵ Filibus wa ɓe da Natanailu wa ciwo ge, “Yi la gye gniyi wye, n Musa ɓedo n anabi yi ɓei da wo ɓo, n Alkawali kwo-kwoyi nyi Owo nu zhin Yesu n wo gmi Nazareti. Wo nu zhin Yusufu ʼɓi.”

⁴⁶ Ce ɓei wo Natanailu n gaiciya yi. Wa gna ge, Nazareti! “Enya manayi ɓa gmi n Nazarati?” Filibus wa gna wo ge “ɓe ha gye n hohin yi.”

⁴⁷ Shi Yesu ɓo gye Natanailu ɓai ɓe wa ci ge, “Gyewye, wo nu zhin Israilayi ɓehin-hin nya, wo ta zhin awyebui m.”

⁴⁸ Ce ɓo wo Natanailu n gaiciya yi, wa nya Yesu ɓo ge, “Ha kpe mi ye nna?” Yesu wa ci wo ge, “To na ɓom, sanu n ho ɓei shi n shinwa gna nyi, ma ku gye ho kafin Filibus wo yi ho.”

⁴⁹ Natanailu wa gaiciya ga, wa ciwo ge, “Maigida, Oho nu zhin Shekwoyi nugun, ho nu zhin Esu Israila nya.”

⁵⁰ Yesu wa nyawo ge, “Ho gami gaiciya shi ma gna ho ge, ma ku gye ho n shinwa gna?” Ho ɓa gye aɓo mwa-mwa yi n dudu ɓo.

⁵¹ Ho ɓa gye eshe kwoi guya, ho gye a mailaika ɓai shin zhi ɓai je gun, dami, Oza nugun.