Yakubu 5 - Alkawali Woiwoyi

Pmagna Ga Anyabwayi

¹ Dnawye, ofye anyabwayi, esa nyi nfye ɓa cibwi fyei do mi, nbugbawun yi ntu n wahala ɓo n kwo ɓelo nfye abye nyi.

² Ofye nyabwa nkubo ofye aje manayi anya ku gyi, ɓaku ze aje sakun.

³ Ofye zinariya n azurfayi ampanyi nla kniya, kwo zhin efye ɓenukwoyi saida. Kwa gyifye abu ngye na, Nyanu n fye ku sozhi fyehin, fya ɓei gwo n wada nyipyei n kwo ɓelo nyi.

⁴ Fye kna tnubua fya wo atnu-tnuyi bwici, nfye la ɓa gyifi to fyei gba ɓa nyin. Oɓa bwici kusi Dagayi azabegye nya atnubua.

⁵ Fye ku sun fi n na anyi, dna n anyida, fyei fu fyehin bugba, nsaiye efye abugba awye-wyeyi zhin ɓa pmi shazun nyipyeyi nu.

⁶ Fye ku aɓo manayi-zhin-yi zun kni, fyei ku aza wu n ɓa to n kalayi lo ɓa gni ɓahin n fye akun.

⁷ Nsaiye n fye aba omi azaje, nfye zhi fyei pmi Dagayi jezeɓe nyi, fye zhin hakuri, ngye shi fwai-za zhin wa pmi har mikegye wa do wo ofwa ampanyi nyi.

⁸ E, fye zhin hakuri, fya bwa bugba kala gama Dagayi la ga ɓe.

⁹ Fye to da gunnu-gunnu tu n na je tukwon, omi azaje, Ho du laifi akpeya lo nu? Gama gye, Owadayi dnagmayi ɓelo, wo la gaɓe, (Fye fa wa wan wyebwo doho-dohoyi n kwo kunce.)

¹⁰ Ntu hakuri ɓo dna n wahala, fye shi Dagayi anabi wye kwa ze fye ɓesisi.

¹¹ Yi kpelo shi ɓa dagma lo n saiye, ntu ge ɓa bei la kpema wo nsahi yi, kwo dayake ɓa bei ku wahala sin n mwa. Ayuba zhin misalinu oza n wo ɓei kpema Dagayi dna n wo azhin-gye, dna n wo wahala, yi ku gye shi Dagayi shiri bei zofi n ɓemana, gama wo nu-nuyi n sun-sungye yi.

¹² Ama dna aɓo vinya omi azaje, fye to si nyasi n ʼshe yi kwo anyin, bwaci ge e, kwo aʼa nnabai n ho ta zhin laifi a zun ho kni n.

Kagna n bmazhin yi

¹³ Zaholo n fyemi woi sin wahala? Wo zhin aduwa ntuce, Aza n ɓa n ɓei lo n ɓa ɓa sa Shekwoyi ami ɓa gyi abye ɓai kwo anyi ga Dagayi, bai la Wo tu.

¹⁴ Nyasan san Zaho lo? Wo yi a ikklisiya atukwoda ɓa zhin aduwa gawo, ɓa shin wo emi, ɓai yi Dagayi wa kawo gna.

¹⁵ Oɓa aduwa nɓa zhin n gaiciya yli ga, ɓa ɓa kawo gna, gama Dagayi ɓa ka wo gna, ndei nyasan n kwo sanwo nyi laifi nu na bewo n kwoi, Dagayi ɓa zhin wo gafara.

¹⁶ Fye zhin aje gafara fyei zhin aduwa ga je, n na bai fya bwa lafiya Ɓefyece zhinyi aduwa ɓa zhin ikoyi mwa, kwa ɓe n amsa manayi.

¹⁷ Iliya ɓei zhin oza nu n gye yi, ama wa mi wa zhin aduwa nge ogma to zhin, to kwa zhin har eye ngun ata n na pyai kpe ngun tnanyi.

¹⁸ N navun wa je aduwa zhin ge ogma kwo zhi, agbe-gbe ɓa je ya pa, anya ya pa njesun n na fwa.

¹⁹ Omi azaje, ndei zaho la bma n Shekwoyi zokwo to woi ye kpema Dagayin, oza ho wa bma wo zhin wa gye Gaiciya.

²⁰ Ozahi n wa jezeɓe n woi n Shekwoyi aba nyi, wo la wyewyeyi bwi-bwiyi gni n efi, kwoi ɓe n owo a laifi gafara zhin yi n mwa.