Yakubu 2 - Alkawali Woiwoyi

To Kni Aza Awyem

¹ Omi aza ye-yeyi fye ɓa gna n wuna nu ge fye zhin Dagayi Yesu Kristi nya nu, Dagayi latu nya, fye gna ye n na anyabwayi nu fyei zhin awyekwoyi nukwoyia?

² N oza loɓe efye aduwa nyakun, n na aje nakwoyi kpe, n zinariya abwanyayifi, njesun ozado wa loɓe n wo naje sakunyi kpe.

³ Fya gnaye n nyabwayi nu, fya ga wo aseseba manayi fya gna wyekwoyi ge, “La gni n bwai kwo ha sase.”

⁴ To, fye ye n zayi n tu n wo nyabwa ɓo kwa wanu ge fye kni aza kni-kni le nu.

⁵ Fye wo, emi azaje, Shekwoyi nla awyekwoyi kni ɓa ze anyabwayi dna n gaiciya ga, Eshebemi zhin ɓa nya nu, gama cauta nu n Shekwoyi zhin aza alkawali nɓa ye Wo.

⁶ Ama dna n na aza ngun abahi fye la wyekwoyi ci wyegba, fyei dnawo vinyikwo. Fye ta palo ge anyabwayi nu lo n fyei n na awada ban, ai gyi fye tara ai gu fye fi n wyegma nyakun.

⁷ Nsai mwa begye oɓanu ma Yesu Kristi esan. Oza n na yi fye n woye manayi nyi.

⁸ E, ɓehin-hin, kwo bmiya fya shi Dagayi wyidna bwa, “Tilas ha ye nho kunzhinyi ha bmawo zhin shi ho ye hohin tukwo.”

⁹ Ama fye ta shi Dagayi owa ye bwa lon, nfya gnaye n na anyabwayi fya laɓatu, kwo zhin ɓenukwoyi nu.

¹⁰ Oza n wa shi awyidna bwa vinya wa fa gmanyi wo n iaifiyi lo ngye oza nwo to shiɓa bwan vinya.

¹¹ Gama Shekwoyi n wa ci ge hota la nyikwo n wo eɓayilon, wo na ci ge hota wu zan, ntucenu kwo ho to zun mula owa gnanan ha zhin anagbayin, ama ho la oza wu, ho la Shekwoyi owa zungna-na vinya, hola ze owa gnazunyi, laifida nu nwa bye.

¹² Aɓei da fye owa, kwo fya zhin kwo to fya zhin oɓo n Kristi yen. Ntucenu fye zhin peceye n nyayi n Ifye zhin n nyayi n fye da.

¹³ Gama ato ɓei gye aza sun-sun n ɓa to gye aza sun-sun. Ama nha gye oza sun-sun Shekwoyi ɓei gye ho sun-sun esa n wo ɓei da ho wa cei.

Gaiciyaga Nna Tnu-tnu-yi

¹⁴ Emi azaje ye-yeyi, mi gye kwo apma, nfye cige fye n gaiciya gailo, fyei zhin a Yesu-viyi nu, ama to fyei bma azaje zhin. Gaiciya-ga yi pya ɓa gni oza?

¹⁵ Ndei ho nugundo yilo n wo to n nyagyi yi lo na jekpeyin.

¹⁶ Ha gna wo ge, “To, lohonya Shekwoyi tu ho anabarka, ha bwa jekpe, ha gyi nyagyi n bugbai gmanyi,” To ha gawo ajekpe kwo nyagyin, mi gye kwo ampanyi?

¹⁷ Ntucenu fye gye, gaiciyaga to kunlo n kwo gmanyin, Tilas ha zhin bemana ha wu ge ho n gaiciya gailo. Gaiciya ga n kwo to wu kwohin n na tnu-tnu manayin, kwo to zhin gaiciya ga nun, kwo zhin gbeloyi nu, fi-fiyi njesun.

¹⁸ Ama zaho ɓa naɓo ge “Fye gna, zokwo n kwo lo Shekwoyi aba gaiciya ga nu gmanyi, to ma cige atnu-tnu n na pmailo n mwa, gama n tna atnu-tnu manayi, ho takpe kwo ho n gaiciya gai lo, kwo ho to n cei lon. Ama zaho-zahoi ɓakpe ge mi n gaiciya gai lo ngye shi mi zhin aɓo n wu.”

¹⁹ Aza lo n fyemi n ɓa ye n cei shilo ge gaiciya ga gmanyi nu kun lo? Gaiciya ga n Shekwoyi gmanyi, To, pa ge aljanu ga gaiciya lo nu ce, n kalayi, har ɓei vin n dnayi.

²⁰ Azacije, fye ɓei tumwi n kniwyiyi nu ge, gaiciya ga to n na pmayi lo ntna aɓe zhin n Shekwoyi yen ma? Gaiciya ga n kwo ta wu kwohin n na tnu-tnu manayin kwo to zhin gaiciya ga nun.

²¹ Fye to ye palo ge kwo Ibrahim eyi dada aɓei yiwo oza manayi ntu n wa tnu-tnu manayi ɓo nu n wo ɓei zhin nyin, n wo ɓei ye wa zhin Shekwoyi ɓeye, har wa ga owo nugun Ishaku ɓigba gmanyi, wa fi tu n bagadi n?

²² Ho ku gye, wo ɓei kpema Shekwoyi, n mwa har woi cei pma wa zhin oɓo n Shekwoyi wa gna wo ge wo zhin, owo gaiciya ga ɓei nunuyi ntu n wo atnu-tnu manayi ɓo n wo ɓei zhin n Yi

²³ Ntucenu kwo ɓei zhin shi Shekwoyi ɓeda da n ge Ibrahim ɓei kpema Shekwoyi. Dagayi wa yiwo oza manayi n Shekwoyi abye, har ayiwo nge, “Shekwoyi nugundo.”

²⁴ Ntucenu ho ku gye, agni oza ntu n nya bo nu n wa zhin, n nyayi n wo ga gaiciya.

²⁵ Rahab Karuwa zhin misali deye nya nu. Aɓei gniwo ntu nyaɓonu n wo ɓei zhinyi, oza n wo ɓei so atnutnuyi fi, wa tnu n ɓai n zokwo do gbo.

²⁶ Shi nayi n kwo to n zafun yi n zhin fi-fiyi nu nyi, elonu gaiciya ga n kwo to n na atnu-tnu manayin, zhin fi-fiyi nu.