Timatawus II 4 - Alkawali Woiwoyi

Bulus Shaula Zafun Nya

¹ A Ntuce nu mi zhin ho gargadi n Shekwoyi abye, n Kristi Yesu yi, n wo ɓei da aza wye-wye yi n na azafiyi owa n wyihoi nyin. Esa n wo ɓei ɓe nwo begyi-yi.

² Zhin Shewoyi ɓeda waʼazi n esayi vinya, Esa n ha bwa bednu n sayi vinya. Zhin eho aza aba, esa n bednu nyi kwo n tna bednu, ha gnakni ɓa esa vinya n kwo kunce, gaɓa kala ɓa zhin ɓemana n esai vinya, nu ɓa n Shekwoyi ɓedayi.

³ Ntu ge esa ɓelo n aza to ɓei shan gaiciya tnubua knan, ama ɓa ɓei zan laɓa ɓai zan a malami zanshi n ɓa ɓa gna ɓa oɓo n ɓaye ɓa wo.

⁴ Ɓato ɓei kna ɓeda tnubua n Shekwoyi ɓeda dan, ama ɓa ɓei vi oɓa anubo zhin zokwo bwi-bwi nya.

⁵ La mi gni to wo wahala dna n ho ɓa sin ntu n Dagayi ɓo m. Gni aza je ɓe n cei n Kristi aba. To fya ɓeho n tna zhinyi n kwo kunce ha zhin.

⁶ Mi da ɓeye gama mi to gnilo n mi ɓa bmaho zhin, Emisa la gasi, Esa fyewyi mi ɓa wan zokwo maloʼshe.

⁷ Miku okun sun n mwa ntu n emi Dagayi ɓo, Dna n kwo vinya miku ɓefyece zhin. Nsaiye esa lasi n mi ɓa fa kun sunɓo ma sun.

⁸ N Eshe mi rawani pmi milo n Dagayi Alkali gaiciya da ɓei gami ewyi n wo ɓei jezeɓe n cei. To ge emi n mi gmanyin ama har na zai ɓe n ɓa sase n wyetuyi ge ɓa pmi owo jezeɓe lo n Jesun.

Zokwodna kmaknayi

⁹ Mi gyi ho wye ɓe npye.

¹⁰ Gama Dimas nla miya, wa wo anyi nya shakpe wa lo Tassalunika, Kiristis wo du Galatiya, Titus wa lo Dalmatiya.

¹¹ Luka nu bwa ce gnilo n miyi, Gniɓe n Markus yi esa n ha ɓe n cei gama mi n wo apmayi lo.

¹² Mila Tikiku tnu n Afisus.

¹³ Esa n ha ɓe, to ɓo ze amwi ha ɓemi n jekpeyi n mi ɓei ya zhi n Taruwasa nyi m N mi ɓei yazhi n Karbus emi zado aba nyi, njesun n mi a litafiyi, tun-baga a takarda opa nya.

¹⁴ Iskandari Epyada sinknabyeyi nya waku mi wu anyi n mwa. Dagayi ɓa tawo.

¹⁵ Ama zhin peceiye n woi, gama wo ɓei la gni apa-pa n nya yi n yi ɓei da.

¹⁶ Esa kmisunyi n na aɓei ɓe n mi na alkali abye ada mi owa ezaho-zahoi to ɓei gni n, aza vinya ɓola busi, mi n na awyetu yilo ata ba laifi ye n ɓa tukwon.

¹⁷ Ama Dagayi ɓei gnisun n miyi wa gna mi esa ma zhin waʼazi tna edna anyi vinya ɓa wo. Wa gni mi n na agaba ʼgbe.

¹⁸ E, Dagayi ɓa gni mi n na aɓo nukwoyi vinya, wa lo mi dna n wo ebemi eshe nya. Mwa-mwa kwo kunsun n Shekwoyi nyalo-nyalo. Amin.

¹⁹ Ɓi, Biskila gna n Aikla yi n na aai n ɓa fi n Onisifurus puwa nyi.

²⁰ Arastus dnalo n Korintus, mafa Turufinus dna n Militus nyasayi sanwo.

²¹ Zhin atna ha ɓe n ya kafin vinyikwo, Afbulus saho ami lo ɓedo n Budis yi n Linus yi n Kalafidiya yi n na azayi vinya.

²² Dagayi Yesu Kristi wo kunsun nfye zafun yi.