Timatawus I 5 - Alkawali Woiwoyi

¹ To daɓo n minagyi yi n zayi n wo kwo hon, ama daɓo n woi peceiye ngye oho dada, da ɓo n na za nawyi yi ngye oho azaje ye-ye yi.

² Zhin anyikwoza anyigbakwoyi ɓo ngye oho aya, aɓi anyikwoyi n gye oho amapui, hoi zhin nubo manayi n ɓa tukwo.

³ Ikklisiya kwo shi anyikwoza bwa n oɓa aɓa n kufi, ndei ɓato n zayi lo n wo ɓa zhin.

⁴ Ama ngye ɓa n na ɓiyi lo kwo ayawyi, oɓanu ɓa bma ɓa zhin, gama kwo bmiya ɓemana zhin kwa ya na api nu. Hoi bma a zakwoyi awyekwoyi zhin. Ɓo nu n kwo da Shekwoyi n mwa.

⁵ Ikklisiya kwo bma a nyigbai zhin n ɓato n nyahoi n, ɓai to na zayi lon, ndei ɓa kmi awye shi Shekwoyi ɓai zhin aduwa n esai vinya.

⁶ Ama to ge ɓai gyi esa, ɓai zan laɓa, ɓai zhin agnagbain, kwo ɓai da aza ɓon, ɓai zan anyi gmada shin ga ɓahin, n lonu ɓai wu ɓahin wyewyeyi n.

⁷ Deye kwo la ze ofye ikklisiya wyidna n na bai aviyi ɓa kpe, ɓa zhin oɓo n kwo bmiya.

⁸ Ama oza n wo to kula n wo azai esa n ɓa gyi san, tun baga aza n ɓa fi n oza puwan, woto n iko yi lo wa ci ge wo zhin Yesu viyi nun. Oza deye pya wo du tna viyi lo n nukwoyi.

⁹ Nyigbayi n wo cei pma pma wa ze ikklisiya tnu-tnu-yi, wo to kasa n na aye shitnayi n, woi bwa mula pa bwa zun gmanyi.

¹⁰ Azai dawo ɓeda manayi ntu n wo atnu-tnu manayi ɓo n wo ku zhin, woku owo aɓi shi n bmiya? Woku ɓemana zhin a zhiɓei n na a Yesu viyi ajeyi? Wo ku bma a nyasan yi zhin n na bugba wunyi? Wo n cei pma n sai vinya wa zhin ɓemana?

¹¹ Anyigbai n ɓa to kon, ɓato filo n ɓon, gama esa fyewyi sai ɓa pa mula n jesun ɓa na ɓa alkawali ɓo n ɓa zhin Kristi nyi.

¹² Ntuce nu ɓaku zunkni ntuge ɓato shi ɓa alkawali kmisunyi bwan.

¹³ Nko avun, kwoi wulo ɓa wo bwato, ɓa gyi esa ɓai laɓa ɓai vi apuwa, ɓai zhin agnagbai, ɓai fi aza aɓo abwa.

¹⁴ Ntu cenu mi gye kwo bmiya lo anyigbayi a nawyi ɓa senu njesun, ɓa ma aɓi ɓa shi ɓahin puwa, n lonu ata da ɓeda nukwoyi tu ɓa tukwon.

¹⁵ Gama edna wo milo azaho n ɓami ɓala awye pmiya n ikklisiya, shetan n la ɓa dna kwoce.

¹⁶ Ma paho n jesun nge, nyigbai azanu ɓa shiwo bwa, ɓato fa deye n ikklisiya akun. Ikklisiya ɓa wu agyiwye kpe anyigbai tukwo nu nɓa to na zahoyi lon, kwo aɓa yi n ɓa ɓa kpe awye shi ɓan.

Fye Shi A tnu-tnu Yi Bwa Nbmiya

¹⁷ A Pasto nɓa zhin tnu-tnu cewo n bugbai gmanyi, a gbaɓa dei-dei, a ciɓa dei-dei, tun baga aza n ɓa nyi-wye da waʼazi zhin n nyawu yi.

¹⁸ Gama Shekwoyi ɓeda gna ge, “To pa jaki egbe esa n kwo gni kwoi dna awyi n cein, fakwo kwa gyi kwoi gwo tnu-tnu lo.” Nna abado njesun kwa ci ge, “Tnu-tnu yi gwo lo n wo ladayi.”

¹⁹ To wo gnunu-gnunu tu Pasto tukwon, sai dei n aseida da lo ngun aba kwo ngun ata ɓa zun wo kni.

²⁰ Ndei wo ku laifi zhin, a gnakni wo n eklisiya abye vinya, n na abai n zaho ta viwo zokwon.

²¹ Mi ga ho wyidna ye n Shekwoyi abye n Dagayi Yesu Kristi yi, n wo a amalaika a Gyi-gyi-yi, fya zhin lonu kwo pasto yi zhin ho nungundo nu kwo to woi zhin ho nungundon. Fye zhin aza ɓo gmanyi.

²² Awyeto ya fye n Pasto kniyin, sakun fya ze owo alaifi pita, kwa ze ngye fya pui ɓa nya nu.

²³ (Deye to ci ge ho to ye zhin eje to won nun, kwo bmiya lo ha towo nsahoi gama kwo zhin, shigbe nu n ho aba, shi nyasan ta faho nyin.)

²⁴ Pa ge aza ho, har n na a Pastoyi ɓa se-ase fi n laifi azai kpe. Nna aɓeye pya ho ɓa mi ha zhin ɓoho. Ama n na a ɓoho, nyipyei wada nya nu ɓei kpe gaiciya anya ya.

²⁵ Elonu zaho-zahoi kpe lo ngye shi a pasto ho zhin ɓemana, ama ata kpe oɓa ɓemanayi ɓo n saho yim, sai esa la mwa.