Timatawus I 4 - Alkawali Woiwoyi

Wu-Wu Nukwoyi

¹ A Zafun Gyi-gyi-yi gnayi pei-pei n ge dna n sa pmaknayi azaho n ɓafi n ikklisiya ɓa ɓei na Kristi aɓo, ɓai vi a malami n ɓa lo tnu-tnu n Shetan ɓeye yi.

² A malami ye ɓa ce akata n bugbai gmanyi, har oɓa Zafun nubo zhin nya to kwoi ceɓa ɓepan.

³ Ɓa ɓei ci ge kwo to bmiya a pa mulan, kwo to bmiya a gyi abun, koda-yake Shekwoyi wa ga anya gye vinya, n na Yesu viyi abanu ɓa gyi ɓa n bugba bui-bui ɓai zhin godiya.

⁴ Gama anya vinya n Shekwoyi wa zhin ɓa bmiya, yi ɓa mi ya gyi ɓa n bugbai gmanyi yi zhin godiya.

⁵ Ndei ya nya Shekwoyi wa tu kwo anabarka, gama aze kwo manayi n Shekwoyi ɓeda yi n aduwa yi nu.

⁶ Nha zhin azaje bayani ye pya, ho nu ho tnu-tnu nu n gye Pasto, n wo n nuboi fu n gaiciya gai n nyawu gaiciya nya yi n ho vi nyi.

⁷ To wun esaya hoi naɓo tu n aɓo nɓa to tukwoi n, kwo aɓeda a tna cei, gyi esa n ho kalayi tu aɓo nu nɓa ɓa zhin ho ha mwa dna n Zafun.

⁸ Nayi tnu-tnu n bmiya, amma Zafun tnu-tnu n du, kwoi bmaho zhin n nya n ho zhin. Ntu cenu tumwi ha ze Yesu viyi manayi, kwo ta bmaho zhin dna anyi ye nu gmanyin, ama har n doi n kwo ye ɓe-ɓelo.

^9-10 Gaiciya nu nyi kwo bmiya lo ozahozahoi wa gwo kwo. Yi zhin tnu-tnu n mwa, yi sin wahala n mwa, ntuge aza ɓa ga kwo gaiciya. Gama eyi awyetu lo n Shekwoyi wye-wyeyi da nu, n wa fi ntu na za ɓo vinya nyi tun baga aza nɓa la wo gni-gni gwo.

¹¹ Wu anya ye vinya ha tabata aza tu ɓa mwi lo dei-dei.

¹² To ye zaho wa ci ho wyegba ntu ge hoye zhin ɓinuyin. La ze ɓa ɓemwi-tu nya. Fa ɓa vi ho nya wu n ho ase-sei, la ze ɓa efye dna n yeye, nho gaiciya gayi, nho aɓonubazhin manayi.

¹³ Sai mila ɓe, ba Shekwoyi ɓeda hoi zhin kwo bayani ga ikklisiya, zhin Shekwoyi ɓeda waʼazi.

Zhin Apma Nho Nyaga Yi

¹⁴ Zhin apma n ho kpezhinyi, n Shekwoyi wa gaho dna n wo anabi esa n na ikklisiya tukwo da ɓei kpe ho abwa n tukwonyi.

¹⁵ Zhin apma n ho nyaga yi, la hohin ga n tnu-tnu ye, n na abai aza gye ho abye gyi.

¹⁶ Zhin peceiye n na aɓei n ho zhin, n ho anubo zhin yi n jesun. La kpema n ɓo n kwo zhin gaiciya, Shekwoyi ɓa tuho anabarka, wa zhin apma n hoi ha bma azaje zhin.