Timatawus I 3 - Alkawali Woiwoyi

Hali Tukwoda Nya

¹ Ɓeda ye kwo zhin gaiciya nu nge ndei oza ye wa zhin pasto, wo ɓemwi manayi dnalo n bugba.

² Gama tilas Pasto wa zhin oza manayi n na ta dawo ɓeda nukwoyi n, n nyikwoyi gmanyi. Woi zhin tnu-tnu n kalayi, woi zhin nubo, cewo n nu-nuyi n na aɓemana zhinyi. Wa bwa bugba bui a zhiɓeyi ɓai ya ɓe wo puwa, wa zhin malami manayi dna n Shekwoyi ɓeda.

³ Wo to zhin eje sin yin, kwo anya wu yin, amma wola ze hankali da, mi bwayi, to wa ze oza nu n wo ye agyiwyen.

⁴ Owo apuwa da ɓaku ze aza manayi, hankali da n na aɓiyi n ɓa vi ɓo n pye, n tna gnunu-gnunu dayi.

⁵ Gama ndei oza to mi n wo iyali bwashin, wo ɓa mi n wuna wa shi ikklisiya bwa vinya?

⁶ Pasto tola ze Yesu viyi woi-woi n, kada wo zhin aɓekwo nge alawo kni n pye aɓekwo gyi n kakaya abye. (Shetan ɓei kaya lonu).

⁷ A tna viyi ɓa zhin wo seida manayi, n na bai Shetan ta piwo a gam n na ɓeda nukwoyi n wo tukwon, wa fa wo n tna gbebwa n wo ɓa wu owo akni zokwon.

⁸ Abyeda, ɓaku ze aza manayi n gye a pasto. Ɓato ku ze aje sin yi yakwon, n na gyiwye ye yin.

⁹ Ɓaku ze aza gaiciya da, ɓai vi Kristi n bugbai gmanyi, n wo zhin yi gaiciya ga tukwo nyi.

¹⁰ Kafin a gaɓa abye, aku tnu-tnu gaɓa n ikklisiya amwiɓa gye n ɓa haliyi, n kpe zhinyi, n ɓa ɓa zhin bmiya, ami a kniɓa ɓa ze abyeda.

¹¹ Oɓa anyikwo ɓaku ɓahin wan shi to ge a jesin yakwo yin, to ge a ɓo shanyi n, ama a gaiciya da dna na aɓo vinya n ɓa zhin.

¹² Byeda wa bwasun n nyikwoyi gmanyi, n na aɓi aɓo viyi ɓai dagma n na ajei.

¹³ A byeda n ɓa zhin tnu-tnu n bmiya aza ɓa gaɓa mwa-mwa, njesun ɓa ɓa bwa bugba kala n Dagayi abye dna n gaiciya ga.

¹⁴ Mika aɓo deye gaho, koda-yake mi n na awyetu yi lo miɓa be ho aba esa fyewyi.

¹⁵ N na bai n mi to ɓe n pyen ha kpe a za pya ye n ho ɓa kni, ɓa zhin a tukwoda fi n ikklisiya, Shekwoyi wye-wyeyi da nya, n ɓa fi ɓai shi Shekwoyi gaiciya ɓai la kwo tu nyi.

¹⁶ Kwo zhin gaiciya nu asese manayi dna n Shekwoyi, kwo to zhin oɓo fafayi nun, amma amsa lo n Kristi, n wa ze zanyikwoci wa ɓe anyi, a gye wo n gyi-gyi n tna laifi dna n wo Zafun, amalaika ɓa zhin wo bauta, a zhin wo waʼazi n anyi vinya, aza gwowo n na aba vinya laɓa, a gwo wo njesun wo lo eshemi.