Timatawus I 2 - Alkawali Woiwoyi

Shi Yi Ɓa zhin Aduwa Nwu

¹ Omi ɓeda nyi n ho aba, zhin aduwa n mwa ntu azaje ɓo, gyi Shekwoyi wye wa gye ɓa sun-sun. Zhin Shekwoyi godiya ntu nya ɓo nwo ɓa zhin ɓa nyi.

² Zhin aduwa ntu asu ɓo, na za yi n ɓa zhin a iko da vinya tu n yi eshe, kwo n ɓa n na tnu-tnu yakwoi shi, n na abai n yi ɓa sase n lafiyai, n bugba-fuyi, ya se ase manayi yi zhin nubo n Dagayi ɓo.

³ Deye bmiya lo, kwoi da eyi Dagayi bugba.

⁴ Gama wo ye aza vinya ɓa pwo, ɓa bwa gaiciya ye awyega.

⁵ Nge Shekwoyi gni n sepa gmanyi, aza vinya zhin n sepa gmanyi, n Kristi Yesu n wohin tukwo zanyikwoci n dna n ɓa tasin wa ɓe n bai n na aba gmanyi.

⁶ Wa gawo wye-wyeyi ntu n na aza ɓo vinya. Ɓeda nyi n Shekwoyi wa tnu n cei dna n esa manayi n na lanyi.

⁷ Ai la mi kni gaiciya nu n mi da-ma zhin tnu-tnuyi n nabari da yi, Shekwoyi nya, ma wu gaiciya ye n na abyedo aba, ma wuɓa Shekwoyi shiri gni-gni nya dna n gaiciya ga.

⁸ Ntu cenu miye aza vinya ɓa zhin aduwa ɓai ku abwa a gyi-gyi-yi wu Shekwoyi n tna laifi, ntna minagyi, ntna nuwun.

^9-10 Anyikwoza ce ɓaku ze lo nu, ɓaku ce pi ɓa zhin ɓo kwo bmiya, ɓai pa aje cewo. A Yesu-viyi anyikwo a kpeɓaye ntu n ɓa ɓemana zhin ɓo, to n zokwo shiɓa zhin ɓahin aba, kwo tukwo knin, kwo anya shi-shi, kwo aje anakwoyin.

¹¹ Anyikwoza, ɓa kna tnubua ɓa tumwi peceiye n tukwo gbayi.

¹² Mita ye anyikwoza ɓa wunya kwo ɓa ze a tukwoda n na azanugbai tukwon. Ɓaku cepi n na aduwa nyakun n yezhi sa.

¹³ Ntu kniɓei ya? Ntuge Shekwoyi ɓei zhin Adamu nu nabye wa kma Hawawu zhin.

¹⁴ Shetan to ɓei dna Adamu nu kwocen, ama Hawawu nu, laifi kwa ɓe.

¹⁵ Ntu cenu Shekwoyi wa tnu anyikwoza n na azhinyi, esa n ɓa ma aɓi n cei, ama woɓa gniɓa wyewyeyi ɓai ya kpema wo, ɓai se ase pi-pi-pi, n bmiya ɓai ye n na azai.