Matta 9 - Alkawali Woiwoyi

Emi Tnu-Tnu Dna Nna Anyi Ye

¹ Ntu cenu, Yesu wa lo eya wa je piya lo Kafarnafum, owa yi.

² Esa fyewyi aza ɓe n ʼɓi nayi fi-fiyi da yi ntu na pece. She Yesu ɓo gye ɓa gaiciya ga, wa ci eɓi nyasan yi ge “Nugun, laka! Miku oha laifi zhin gafara!”

³ “Tukwo-mwa,! Eza deye gna ge wo zhin Shekwoyi nu.” A Yahudawayi abyeda nu gna je lo nu.

⁴ Yesu ɓei kpe a aɓonubozhin ye, Wa nya ɓa ge, kniyi nu zhin fyei zhin aɓo nukwoyi nubo a?

⁵ “Kni dei nu gna wo lo fwa-fwa, a cige miku ha laifi zo, kwo kuwa a la ho kagna?”

⁶ Ntu cenu, Ma wu fye ge mi iko yi lo dna na nyi ma zo alaifi, wa pmi da ɓi nyasan yi wa gna, “Lakala, kmi ha pece ha lo ho puwa.”

⁷ Eɓi ho wa laka woi gye agna wa lo wonya.

⁸ Odna wo azayezhi, shi aɓeye ɓo zhin ai gye ɓa la Shekwoyi tu she wa ga aza iko lo nu.

⁹ Shi Yesu ɓo zan-zan lo n zokwo yi, wa gye gadu gwoyi, Matta, n dna na gadu gwo ba. “Be ha ze mi bara,” Yesu nu gnawo lo nu. Matta laka wa gni lo nwoi.

¹⁰ Esa nu Yesu ɓei dna n wa bara yi ɓai gyi nyagyi, (n Matta puwa), azagyifiyi ɓei fi ɓo n zhin azhi-ɓeyi.

¹¹ She a Farisiyawa yi ɓei gye ɓa nya Yesu abara ge, “Kniyi nu zhin efye Male yi ye wohin ɓedo n naza deye pya ya?”

¹² Yesu wa gna ɓage, “A lafiya da ta zan shigbe da shin, sai anyasan yi.

¹³ Fye lo fye zan aya ye awyega shin, ‘Mi ta ye sadaka lo n na nyaga yim, Mi ye fya ze asun-sun gye yi.’ Ma ɓe, ntu ge ma yi alaifi da ɓa ɓe Shekwoyi aba to ge aza n ɓa yi ɓahin ge aɓe-fyeceyi m.”

¹⁴ N wyihoyi Yohana batisma zhin yi abara ɓa ɓe Yesu aba ɓa nya wo ge, “Kniyi nu zhin to oha bara yi zhin azumi n gye yi ɓedo na Farisiyawa yi ma?”

¹⁵ Yesu wa nya ge, “Kwo bmiya lo mula ɓa anugundo ɓa wun bugba to ɓai gyi nyagyin, mulaɓai gnisun n ɓai? Ama esa ɓelo a la Miya n ɓa ba, n sayi nu n ɓa to ɓei gyi nyagyi m.

¹⁶ “Nyikanu ɓagu eje kwokwoyi ta n je woiwoyi ya? Ntuge kwo ɓei jesaya na tagu ba, oɓwo ko ladu n pata.

¹⁷ Ko nyikanu ɓa fi nuwan shu-shuyi woi-woyi n pwakun kwokwoyiʼa? Nuwan shu-shuyi ye ɓa bma kwo har pwakun ɓa cepwo anab nuwan zeya. Sai dai a fi anab woi-woi n pwakun woi-woi, aɓa bwa ɓa pma vinya.”

¹⁸ Wo gni woi da ɓo, aduwa nyakun tukwoda ɓe wa yashi n Yesu a pita ba wa ga wo mwa-mwa: a gna wo, “Emi ɓi ye bwa fi nu, ama ho ɓami ha je wo wye-wyei ga, ndei ha ɓe ha to wo bwa.”

¹⁹ Yesu nwa bara yi, ɓa gni lo n woyi.

²⁰ Ɓai ye filo n zan yi mi, Nyikwoza ho wo yi ku eye bwa awo-cei-aba ami yi zewo ya, wa lo wa to Yesu je kpe bwa.

²¹ Ntu ge wo ɓo zhin nubo ge, “Ko ma bwa wo bwa to-to, miɓa kagna.”

²² Yesu wa pmiwye ya wa gye wo wa gna, “Nyigun, bugba bui-bui! Eho gaiciya ga la ho kagna!” Nyikwozahi wa bwa lafiya nsayi-sayi yi.

²³ Esa nu Yesu ɓo si tukwodayi puwa, wagye azai nawyi, ai gyi afi-nya,

²⁴ Wa gna, “A kun ɓaya, ntu ge ɓinyinkwoyi deye to fi m, ama wowan gye nu.” Aza ma wo san, ɓai kpe wa gye.

²⁵ She aza ɓo la za kun ya zhi n bmi, Yesu wa lo aba n ɓinyikwoyi ɓo dna, Yesu wa tabwa shi wo, wa je wye-wyei bwa.

²⁶ Nabari kwagnami n ekniyi vinya ntu aɓo wowo yi ɓo n Yesu ɓo zhin nyi.

²⁷ Shi Yesu ɓo gmi n puwa yi, awyebwayi ngun aba, ɓa vi wo ɓe ɓai gna, “Osu Dauda Nugun, gye yi sunsun.”

²⁸ Wa pmi wa to ɓa wye bwa wa gna, “Ntu fye gaiciya ga ɓo, fye gye wyeba!”

²⁹ Wa pmi wa to ɓa wye bwa wa gna, “Ntu fye gaiciya ga ɓo, fye gye wyeba!”

³⁰ Nsai-sayi, ɓa gye wyeba, Yesu wa tu ɓa gbe ge, ɓa to gna zaho-zaho yi m.

³¹ Ama to ɓa ce pyi m, sai ɓa da nabari laɓa n zhimi.

³² Yesu wa laka ɓo, wa she gun takpeɓeda, ntu ge azafun nukwoyi ɓo fi wo.

³³ Yesu wa kun ɓaya, zahi wa ya ɓeda da. Ca wo aza yezhi n mwa ɓai gna, “Yi to shin aɓeye gyem.”

³⁴ Ama a Farisiyi ɓa gna, “Nya ko zhin woi kun azafun nukwoyi ya nyi, ntu ge wo ɓai lo n wohin, Shetan dna lo n wo mi, azafun nukwoyi su.”

Atnu-Tnuyi Apma Nɓa Yi-yi-i

³⁵ Yesu wa zan laɓa na zhi ɓiyi n na azhi dnagmai yi woi wu aza dna na Yahudawayi aduwa nyakun, woi danabari manayi ntu Shekwoyi ebe mi ɓo woi ka anyasan gna abaho-bahoi n wa lo.

³⁶ Aza sun-sun a wan wo, ntu ge ɓaɓo na ɓei mwa begye to akpe shi ɓa ɓa zhin ko aba n ɓa-ɓa lo ntu bmazhin ɓom, n wu gye akni ntna knayi.

³⁷ Wa gna wa bara ge, “Wyido lo mwa ama atnu-tnuyi bwa sun lo fyewyi nu.

³⁸ Fye zhin aduwa ga Dagayi wyido nya watnu n na tnu-tnu zhin-yaje yi nwo fwa.”