Matta 28 - Alkawali Woiwoyi

Wo La Lakala

¹ N Ladi-wyi labmi yi, Maryamu Magadaliya ɓedo n Maryamu de yi ɓalo vingwo aba.

² Nsagmanyi yi, ekni a shan-shan, ntu ge malaika Dagayi nya ɓo gmi ʼshe wa ɓe wa kpe kuta ya, wa sase tu ko.

³ Ewa wyeba bmina ngye gma bmiya-bmiya yi. Ewa je n wu buibui yi pau.

⁴ Aza n ɓa ɓo zhi ɓai gu nyi, ɓa vin shi ɓa ɓo gye wo, ɓa miya zhi ɓa ku zun-fi.

⁵ Malaika wa da ɓo na nyikoza yi, “Fye to wo dna m. Mi kpe lo ge fye Zan Yesu nu shin, n na ɓo zun wo du nyi.

⁶ Ama wo to lo ya m, Wo la wye-wyei je bwa shi wo ɓo da nyi. Fye lo ɓe fya gye aba Wo ɓo wan gye shi.

⁷ Sai fye lo wolo-wolo fye gna wo bara ge wo la laka vingwo, Woi du Galili wo gye ɓa bwai. Nya nu ma gna fye.”

⁸ Anyiko-za ɓa kun n siyi n vingwo, odnai wa ɓa, ai gwo ɓa da, ɓa lo ntu ge ɓo ga abara nabari shi malaika gna ɓa.

⁹ Shi ɓa ɓo lo ɓai busi, nsagma nyi ɓa gye Yesu gni nɓa bye. Wa ciɓa ge, “Sanu fyei” Ɓa lo ɓa ya zhi n wa bye ɓai wan Wa pita, ɓa ga wo mwa-mwa.

¹⁰ Yesu wa gna ɓa ge “Fye to zhin dna won, Fye lo fye gna Mazaje ge ɓa lo Galili wolo-wolo ɓa shegun Mi ɓo.”

¹¹ Bai filo zan mi ɓai lo zhimi, azaho na duwa nyakun guyi mi wato a yan-sanda, n ɓa ɓo gu vingwo nyi, ɓa lo a pirist dnagmai aba ɓa wu ɓa lafiya ɓo ko ku zhin.

^12-13 Ɓa yezhi n Yahudawayi atukoda jei ɓa zhin shaula ge ɓa ga a yan-sanda agyiwye, to ɓa da ge Yesu la laka nun, ama ɓa gna ge, esa ɓa ɓei ku wan-gye n sukoyi, Owa, bara ɓe ɓa wyi wo nahi.

¹⁴ A Yahudawayi a tukoda gna, “Ndei gwomna wo ce, yi ɓa gni agni ga fye har to wa zhin fye nyaho m.”

¹⁵ Ayan-sanda agyiwye gwo, ɓa ga nabari shi a ɓo gna ɓa ge ɓa da. Oɓa nabari kwa gnami fyi na Yahudawayi aba, har naiye, ɓa gaiciya ga lo lonu.

¹⁶ Abara awocei-gmanyi, ɓa lo Galili, ɓai lo ʼpe aba Yesu ɓo gna ɓa ge ɓa ɓei shegun wo.

¹⁷ N bwayi, ɓa ku gye Wo wye, ɓa ga Wo mwamwa, ama azaho n ɓa mi, to ɓa ga gaiciya ge Yesu nu gni m.

¹⁸ Yesu wa gna wo abara, “Iko vinya n ʼshe ɓedo na nyi yi, a la ga Mi.

¹⁹ Ntu ce nu fye lo fye zan abara do shin nabye vinya, fya zhin ɓa batisma dna Dada ʼye, n Nugun yi, n Zafun Gyi-gyi-yi.

²⁰ Fye wu ɓa ɓa vi awyidna n Mi ku ga fye nyi, fye ku kpe ge Mi gnisun lo fyei ci-ci har anyi zo sa.”