Matta 27 - Alkawali Woiwoyi

Owo Wada Nwo Wu-Wuyi

¹ N Labmiyi a malami dnagmayi vinya ɓedo a Yahudiyi atukoda yi, ɓa yezhi njesun ɓa zhin shaula shi ɓa Ba zhin ɓa wu Yesu.

² Ɓa wo pa, ɓa lo n woi n Bilatus aba nwo nu ɓo zhin gwomna nyi.

³ Nsahi, shi Yahuda Iskariyoti, n wonu ɓo kun Yesu nyi, shi wo ɓo gye ge aku efi owa da Yesu, wa shan wo bugba do, wa la agyiwye wa jeze lo amalami dnagmayi ɓedo a Yahudawayi atukoda n cei.

⁴ Wa gna, “Mi ku laifi zhin, ntu ge mi la eza kni-kniyi kun.” Ɓa ci wo ge, “Oho anuwan nu.”

⁵ Wa she agyiwye ya shi aduwa nyakun wa lo wa wohin gyi.

⁶ A malami dnagmayi ɓa la agyiwye ɓa gna, “Yi ta mi ya shi agyiwye ye azhiya m, ntu ge owa kwa gna ge yi ta go agyiwye ami nya m.”

⁷ Ɓa zhin shaula ɓa si ekni, aba n na shakun-miyi ɓo zhin ɓai ka ozun, ɓa ekni ho ze avingo ntu azhiɓei bi ɓo.

⁸ Ce nu zhin ai yi avingo ho ge ekni ami nya.

⁹ Deye ɓo zhin dei-dei ngye shi anabi, Ilimiya ɓo da ge, “Ɓa ku azurfa shita agyiwye nu a Israila yi ɓo tu wo.

¹⁰ Ɓa si ekni n ashaku-miyi ngye shi Dagayi ɓo wu mi.”

¹¹ Nsahi Yesu woi gni n Bilatus abye, a Roma yi gwomna, wa nya wo ge, Ho nu zhin a Yahudawayi Masihu? Yesu wa ye ge, “E”.

¹² Ama esa a malami dnagmayi ɓedo a Yahudawayi abye-dai ɓo da ɓeda nukoyi tu n Yesu tukwo, to Yesu wa dna ɓe gbe m.

¹³ Bilatus wa ci wo ge, Ho ta wo ɓo lo n ɓa da tu nho tukwon?

¹⁴ To Yesu wa da ɓo m, ce a wo gwomna.

¹⁵ Ko ɓo zhin gwomna kunnu nu eye doho-doho n paska ʼsa, wa lo eza pa-pai ya ga a Yahudawayi, ezaho-zahoi n ɓa ye.

¹⁶ Nsaye aɓo n zajeyi wan dna, ai yi wo ge Barabbas.

¹⁷ Shi aza-yezhi ɓo ku yezhi n Bilatus aduba n labmiyi, wa nya ɓa ge, “Nkanu n fye ye ma lo wo ya ga fye a? Barabbas ko Yesu n wo nu zhin efye Masihu nyi a?”

¹⁸ Ntu ge wo ɓo ku kpe ge a Yahudawayi atukoda ɓo wan Yesu ntu shewo ɓo nu, ntu ge aza ɓo zhin ɓai ye wo n mwa.

¹⁹ Esa nu wo ɓo dna n awada ba, Bilatus nyiko wa tnu ga wo ge, “La abwa kun n eza ɓefye-cei ye ɓo mi ku ena ednanya nu nsukoyi n wo yi.”

²⁰ Amalami adnagmayi ɓedo a Yahudawayi atukodayi, ɓa fi aza ya ge a lo Barabbas nu ya, a wu Yesu.

²¹ Ntu ce nu, esa gwomna ɓo je ɓo nya ge, dna aza ngun aba ye mi lo nkanu ya? Ɓa ye vinya ge Barabbas nu.

²² Bilatus wa nya ɓa ge, mi zhin n wuna n Yesu yi efye Masihu a? Ɓa ye gbo-o ge, a zun wo du.

²³ Wa nya ge ntu kniɓei a? Wo ku knihi nu zhin a? Ama ɓa ce ɓa gyi abye ge azun wo du, a zun wo du.

²⁴ Shi Bilatus ɓo gye wo ta mi lo wa bwa ɓa tukwo shin, njesun wa gye gyikici ɓa laka, wa tnu nuwan ɓo n ebue yi, wa wa bwa na n aza-yezhi abye, woi gna, mi zhin eza knikniyi nu n eza Befye-cei ye ami ɓo. Deye ko zhin efye anuwan nu.

²⁵ Aza-yezhi ɓa ye nkalayi ɓa gna ge, Ewo ami ɓa la tu n yi ɓedo n yi aɓi yi.

²⁶ Nsa-yi Bilatus wa Barabbas loya. Ama Yesu wa lu wo, wa ga wo n a Romayi a soja akun ntu ge ɓa lo n woi ɓo zun wo du.

²⁷ Ɓa la wo ɓa lo n woi n akun kaya nyakun, ɓa yi asoja vinya ɓa yezhi.

²⁸ Ɓa kma wo aje ya vinya, ɓa kpe wo eje bye-byei.

²⁹ Ɓa zhin alawani aknawuyi nya ɓa kun wo, tukwo, ɓa ga wo busi shi n wo bwaizhe-bwa ɓa yazhi n wo abye ɓai kpe wa gye ɓai gna, Shekwo-mwasa n hoi, Esu a Yahudawayi nya.

³⁰ Ɓa kni akni kpe wo, ɓa ge busi ɓa lu wo n cei n tukwo.

³¹ Shi ɓa ɓo ku agye kpe wo, ɓa kma wo eje bye-byei, ɓa kpe wo ewohin eje njesun, ɓa lo n woi ntu ge ɓo zun wo du.

³² Shi ɓa ɓei lo aba nɓa ɓo zunwodu, ɓa gye ezado ho wo gmi Sairani n Afirika a yi wo eye ge Siman, ɓa tu wo tile wa la zundu Yesu nya.

³³ Esa ɓaɓo si aba a yi Golgota, ngye tukwo-bmila.

³⁴ Asoja ɓa ga wo nuwan bedo yi, shi wo ɓo towo to wa ye sin ɓo m.

³⁵ Shi ɓa ɓo la wo zundu asoja ɓa she zoku ntu ge ɓa gna wo aje ga aje.

³⁶ Ɓa ku zhi ɓai shi wo awye tu zundu.

³⁷ Ɓa ku rubutu kakpe n wo tukwo she ge, “eza deye yesu nu, a yahudiyi esu”

³⁸ Aɓo ku azaje zundu ngun aba n knusun n Yesu yi, eza gmanyi n wo bwakmi eza gmanyi n wobwai-zhe-bwa.

³⁹ Azoko wanhi ɓai duya ɓai da ɓeda nukoyi ga wo, ɓai bmiya tukwo ɓai gna.

⁴⁰ Ashe! Ho ɓa mi ha la aduwa nyakun ya ha je ɓa mi njesun dna anyipyei ngun ata? Ho kashi n zundu ye ngye ho zhin Shekwoyi Nugun nu.

^41-43 A malami dnagmayi ɓedo na Yahudawayi atukwodayi ɓa kpe wo agye ɓai gna, “Wo ɓo la azado gni, ama wo ta mi lo wa gni wohin! Ashe ho zhin a Israilayi Esu nu? Ho kashi ɓe n zundu, yi ɓa ga ho gaiciya. Wo ɓo la kpema Shekwoyi–akpe Shekwoyi wo gu wo! Wo to ɓo gna ge wo zhin Shekwoyi Nugun nu?”

⁴⁴ Azajei ce ɓa gna wo ɓeda nukoyi.

⁴⁵ Nyipyei atukwo wyegma kwa dna anyi vinya har awa ngun ata.

⁴⁶ Esa n sunkna ngun ata ɓo la si, Yesu wa yi n begye kala yi wa gna, “Eli, Eli Lama sabachthani,” ko wu ge “Emi Shekwoyi, Emi Shekwoyi, knihi nu zhin Ho lami ya?”

⁴⁷ Aza nɓa ɓo zhi ɓo, to ɓakpe ɓeye n wo dam, ɓa zhin nubwo ge wo yi Iliya nu.

⁴⁸ Ezaho nɓa mi wa busi lo wa la soso wa fi nuwan yakayakayi wa fye ko n busi wa ga wo ge wa sin.

⁴⁹ Ama aza je ɓa gna, Fawo, ya gye ngye Iliya ɓa ɓe wa gni wo.

⁵⁰ Yesu wa je ɓo da nkala yi, wa fa wo zafun, wa fi.

⁵¹ Labule, nko ɓo sa na ɓa gyi-gyi-yi du-duyi n na duwa nyakun nyi, kwa saya tunyi n she har sinta, ekni kwa shan-shan, akuta ɓai ɓaya.

⁵² Avingo ɓai kmiya, a Shekwoyi aza afi-fiyi anugbai na nyikoyi ɓai je wye-wyei bwa.

⁵³ N Yesu kalala avun n vingo, ɓa fa avingo ɓa lo fi n Urushelima ɓa wu ɓahin tukwo naza mwaɓegye aba.

⁵⁴ Asoja nɓa ɓo zhi n zundu aba nyi, ɓedo nɓa zajei, ɓa ku vin-vin, shi ɓa ɓo gye ekni shan-shan ɓedo na ɓoi vinya nɓa zhin, ɓa ci ge, “Lale, eza deye ɓo zhin Shekwoyi Nugun nu.”

⁵⁵ Anyikoza nɓa ɓo kun n Galili ɓa kun ɓe n Yesu yi ntu ge ɓa bma wo zhin, ɓa ku zhi n kpai ɓai gye.

⁵⁶ Nɓa mi Maryamu Magadaliya ɓo nyi, ɓedo n Maryamu a Yakub n Yusufu ya yi, ɓedo Yakub n Yohanna ʼya yi, (Zebedi a nugun).

Owo Fi Nwo Bi-Biyi

⁵⁷ N Wyeshei, nyabwai ho, a yi wo eye Yusufu woi gmi n Arimatiya Yesu viyi nu.

⁵⁸ Wa lo Bilatus aba wa nya Yesu nayi ɓo. Bilatus wa ga gbe ge a la ga wo.

⁵⁹ Yusufu wa la wo, wa wo kmi dna na je manayi.

⁶⁰ Wa lo n woi, wa wo bi dna n wohin vingwo n wo ɓei ce nyi dna n Kuta, wa kutado la wa ko gu n cei.

⁶¹ Maryamu Magadaliya ɓedo n Maryamu do yi ɓaku sase kpe vi-vi ɓai gye.

⁶² Efye a gyi, wato nyipyei n ko ɓo vi paska shiri zhin nya nyi, amalami dnagmayi ɓedo, na Farisiyawa yi ɓa yezhi n Bilatus aba.

⁶³ Ɓa gna wo ge, Shekwomwasa, Kata cei ye ɓo gna ge, anyipyei ngun ata avun mi ɓo je wye-wyei bwa.

⁶⁴ Ntu ce nu, yi ye ha ga egbe a gu wo vingwo har nyipyei tayi, kada ewo abara, ɓo gna aza ge wo la lakala n fi, N kwo ze lo nu, ho gye koce-dna kmaknayi ɓo ladu kmisunyi n nukoyi.

⁶⁵ Bilatus wa gna ɓa ge, Fye zhin akma n fye aduwa nyakun a yandoka yi ɓa ɓa mi ɓa gu kwo.

⁶⁶ Sai ɓa lo ɓa hatimi tu n kutayi, ɓa ku a yandoka zhi ɓa gu vingwo.