Matta 26 - Alkawali Woiwoyi

Ala Yesu Kun

^1-2 Esa Yesu ɓo ku aɓeda ye zo da, Wa gna wa bara ge, “Fye kpe lo anyipyei ce gun aba ai ya Paska awyefan, a ɓa kun mi, azunmi du.”

³ Nsayi nu dei-dei a pirist dnagmai ɓedo na Yahudawayi abyeda yi ɓo fi n Kayafas puwa, pirist yako.

⁴ Ɓai zhin shaula shi ɓa ɓa zhin ɓa wan Yesu fya-a ɓa wu wo.

⁵ Ama ɓa gna, “To ge n Paska sa m, ntu ge gyikici ɓa laka.”

⁶ Yesu wa lo Betani, wa lo Siman kuturu puwa.

⁷ Esa wo ɓo dna woi gyi nyagyi, nyikoza ho wa lo-ɓe nmi yi shi n tulale nakwoi fyi, wa ze ko ya kpe wo tukwo.

^8-9 Abara ɓa gyi minagyi ɓai gna, “Wo la agyiwye wunya. Wo ɓo ɓa kun ko na ʼgyiwyei mwa, a ce agyiwye aga a wyekwoi!”

¹⁰ Yesu wa ku kpe ɓo ɓa zhin nubo cei, Wa gna ɓa ge, “Fye da wo ɓo nukwoi gena? Ntu ge wo ku ɓo manayi zhin Mi.

¹¹ Awyekwoi lo cici n gnisun fyei, ama fye ta bwa mi cici m.

¹² Wa ze tulale ye kpe Mi, woi zhin Mi nayi shiri ntu bibi ɓo nu.

¹³ Aɓa pa wo ɓo cici ntu tnu-tnu ye ɓo. Aɓa da wo tnu-tnu ye ɓo na nyi vinya, abaho-bahoi na ɓa zhin Nabari Manayi wazi.”

¹⁴ Nɓonu Yahuda Iskariya tigmanyi dna Wo abara awo-cei-aba wa lo a pirist dnagmayi aba.

¹⁵ Wa nya ge, “Fye ɓa ga mi akninya, ma ga fye Yesu a?” Ɓa ga wo a sile shita (₦3).

¹⁶ Tunyi n sayi, Yahuda wa ya zokwo zanyi shi wo ɓa ga Yesu.

¹⁷ N Paska nyipyei kmisunyi yi, na Yahudawayi zhin ɓa kun bredi yisti nya ya nɓa puwa nyi, Yesu abara ɓe ɓa nya wo ge, “Yi ɓa zhin paska nyagyi shiri nna nu ya gyi a?”

¹⁸ Wa gna ɓa ge, “Fye lofyi n zhimi fye ɓa gye zadoho, fya ciwo ge, ‘Eyi Dagayi wa cige, esa la Misi, Mi ye Ma gyi Paska nyagyi n Ma bara yi n ho puwa.’ ”

¹⁹ Owo abara zhin shi wo ɓo gna ɓa, ɓa zhin nyagyi shiri n ɓo.

^20-21 N wyeshe yi, Woi sase tu Woi gyi nyagyi nɓai awo cei-aba, Wa gnaɓa ge, “Eza gmanyi lo nfye mi nwo ɓa kun mi.”

²² Bugba wun ɓa, zaho-zahoi wa nya ge, “Emi nu?”

²³ Wa gna, “Owo nu n Ma ya wo nyagyi ga nyi.

²⁴ Tile Ma fyi ngye shi anabi ɓo da, ama aiya nza ba n wo ɓa kun Mi nyi. Ko gna bmiya lo to aye ma won.”

²⁵ Yahuda ku ɓo nya wo ce, ge, “Male, emi nu?” Yesu wa ku ciwo ge, “E.”

²⁶ Shi ɓa ɓo kpe ɓai gyi nya, Yesuwa la bredi Wa tu ko anabarka, Wa sa ko ya Wa ga Wo abara Wa gna, “Fye gwo fya gyi, deye ko zhin ʼMi nayi nu!”

²⁷ Wa la kofi nuwan shu-shuyi nya, Wa zhin godiya n koɓo, wa ga ɓa wa gna, “Zaho-zahoi sin ko,

²⁸ Deye zhin emi ami nu, tuze alkawali woi-woi nya. Aze ɓa ya ntu naza begye alaifi gafara zhin ɓo nu.

²⁹ Ma gna fye, Mi taje nuwan shushuyi ye sin m, sai nyipyei ʼmiɓo sin ko woi-woi fyei n mi Dada ʼbe mi.”

³⁰ Shi ɓa ɓo ku anyi ko, ɓa kun ya ɓa lo Zaitun pe.

³¹ Yesu wa gna ɓa, “Nsukoye yi, efye vinya, fye ɓa na maɓo. Ntu ge a ka fi lo n Litafi gyi-gyi-yi ge Shekwoyi ɓa lu Kniknayi, akni ɓa gnami n ɓa galice.

³² Ama esa ma wye-wye je bwa, mʼɓo lo Galili ma gye fye ɓo.”

³³ Bitrus wa gna, “Ngye aza ɓa na haɓo, mi da ta na ha ɓo m!”

³⁴ Yesu wa gna wo ge, “Gaiciya Ma gnaho, dna nsukoye kafin pise nugba ceku, ho ɓa na maɓo abwa ta!”

³⁵ Ama Bitrus wa gna, “Sai mila fi knw!” Abara-je ɓa bwa ka da lo nu.

Yesu Aduwa Zhin

³⁶ Yesu wa ku ɓa wa lo ɓai n na shinwan shi-shiyi fa, ai yi ko Gesamani, wa gna ɓa ge ɓaku zhi ɓa kmi, wa ce ta lo abye wa zhin ɓuwa.

³⁷ Wa la Bitrus n Zabedi anugun yi ngun aba, Yakubu n Yohanna yi, ɓa gni lo woi, wa ya bugba wun owo wye-wyeyi kwa wun-ya n mwa.

³⁸ Wa gna ɓa ge, “Emi wye-wyeyi la lo wahala n bugba wun yi har efi–fye ku zhi ya–fya ku zhi n wyewyeyi ngnisun mi yi.”

³⁹ Wa ce ta lo fyewyi wa ya shi n kni wa zhin aduwa. “Emi Dada! Ngye ko ɓa ye zhin, fwa wahala ye kwa mi duya. Ama emi ɓomwi nu to na ɓa vi m, sai oho nya.”

⁴⁰ Wa jeze abara yi n gun-ata ba, wa gye ɓa ku wangye! Wa yi, “Bitrus, fye to mi fya zhi n wyewyei n gnisun miyi ko awa gmanyin?

⁴¹ Fye ku zhi gwu na duwa zhin yi ɓe! Nto lonun, jaraba ɓa gyi fye kala. Zafun cei yelo zin, ama ayi gba kala gba-gbai lo.”

⁴² Wa je ɓa fwa wa lo Wa zhin aduwa, “Emi Dada! N gye wahala ye ta duya m, sai Ma sin ko vinya, Oho ɓeye ko ze lo nu.”

⁴³ Wa jeze ɓe da ɓa njesun Wa gye ɓa zhi ɓai wan-gye, ntuge oɓa wye ɓei ku wo shan.

⁴⁴ Wa jeze lo bwa tayi Wa zhin aduwa Woi da ɓeda gmanyi-gmanyi.

⁴⁵ Wa je ze ɓe abara aba Wa gna ɓa ge, Fye wan fye gye n sayi, fya sun.

⁴⁶ “Fye kuka ya lo! Gye za ɓe nu n wa kun Mi nyi.”

⁴⁷ Wo ye gni Woi daɓo, Yahuda, gmanyi n Wa bara woi si n begyei vi nakun kaya yi shi abe yako na busi yi, nna Yahudawayi atukoda ɓo tnu ɓai.

⁴⁸ Yahuda ɓei ku gna ɓa ge eza n ɓa gye woi sa wa mi ngye nugundo, ɓa wan wo, ntu ge wo nu zhin eza nɓa ye.

⁴⁹ Ntu cenu Yahuda wa ɓe da Yesu cewo wa ci wo ge, “sanu mwa, Dagayi!” Wa shepma wo ngye nugundo ɓi do gna.

⁵⁰ Yesu wa ciwo ge, “Emi nugundo gya bye ha zhin ɓo kwa ɓe hoi.” Azajeɓa pmi ɓa wan Wo.

⁵¹ Eza gmanyi nu aza nɓa ɓo gnisun n Yesu yi, wa wa beyako wa ka pirist dnagmayi fyenu tnubua ya.

⁵² Yesu wa gna wo ge, “La beyako dna n kwa pui, aza n ɓa zhan pma na be-yako yi, aɓa wu ɓa.

⁵³ Ho ta kpe lo ge, n Ma gna Mi Dada ge, wo tnu Mi na malaika yi tagyi-tagyi ɓa kna yi, Wa tnu ɓai n tna sawun-ya yi m?

⁵⁴ Ama n Ma zhin lo nu, Litafi Gyi-gyi-yi ɓeda ɓanu wuna tu naɓo ye ɓa zhin nsai ye nyia?”

⁵⁵ Yesu wa daɓo naza begye yi Wa gna, “Mi zhin zajeyi nu fyei ɓe mi aba, n na kun kaya yi shi fya kpe Mi wan? Mʼbei zhin Miyi wu nya cici dna na duwa nyakun, ama to fya wan Mi m.

⁵⁶ Ama aɓeye zhin lo nu n saiye ɓai nu ɓo na anabi ɓo da nu, shi acei kafi n Litafi Gyi-gyi-yi.” Nna ba hi nu na bara vinya ɓo fwa Wo, ɓa busi.

⁵⁷ Azayezhi ɓa lo woi n Kayafa puwa, n wo nu ɓo zhin malami dnagmayi duduyi nyi; nɓo nu na Yahudawayi atukoda ɓo yefyi.

⁵⁸ Ama Bitrus wa vi lo ntagni, har wa lo malami dnagmayi duduyi akpeda, wa kun sase shi na sojayi, woi pmi wa gye shi a ɓa zhin.

⁵⁹ Amalami adnagmayi har na Yahudawayi awadayi, ɓa yezhi ɓai zan aza shin nɓa ɓa ga seda akata nya tu Yesu tukwo, ntu ge ada wo wa efi nya.

^60-61 Ɓa ɓo ku aza bwa, ama oɓa ɓeda to ɓo lo egbe gmanyin. Sai dai azaho gun-aba nɓa ɓo gna ge, “Yi ɓo ku wo zeyei gna, ʼmiɓa mi Ma la Shekwoyi aduwa nyakun ya, Ma je ko mi dna na nyipyei gun-ata.”

⁶² Malami dnagmai duduyi wa laka gni wa ci Yesu ge, “Ho ku ɓo wo na da nyi? Ho ɓo ku da lonu ko awo?”

⁶³ Yesu wa wo nya shi pyi. Malami dnagmayi duduyi wa gna, “Mi ye dna n Shekwoyi wye-wyei da ʼye Ha gna yi, ko Ho gna Honu zhin Masihu, Shekwoyi Nugun.”

⁶⁴ Yesu wa ye wo ge “E, emi nu. N nabye deye fye ɓei gye Mi, Eza Nugun, n sase tu n Shekwoyi bwai zhe bwa, Miyi jeze ɓe njesun dna nanyi nɓa kpe nshe nyi.”

^65-66 Sai malami dngmai duduyi wa sa wa je ya, wa da ɓeda nkalayi, wa gna, “Wo ku ɓeda nukwoyi da tu Shekwoyi tukwo! Yi ye a seida-da dolo n shan sun? Fye ku wo woi da. Fya da ge na? Ɓa ye ɓa gna, ‘A wu wo.’ ”

⁶⁷ Ɓa kna-kni kpe wo na wyeba, ɓa lu wo, azadoho ɓa kni wo agnai apmi,

⁶⁸ ɓa gna, “Ngye ho zhin Masihu nu, gna yi eza nwa lu ho.”

Bitrus Wa Na Yesu Aɓo

⁶⁹ Bitrus ye sase shi na wada ʼkpeda, ɓinyikwoi ho wa ɓe wo aba wa ci wo ge, “Ho ɓo gnisun Yesu yi ntu ge fye zhin a Galiliyi nu!”

⁷⁰ Ama Bitrus wa naɓo nɓa bye vinya wa gna, “Mi ta kpe ɓo ye lo ho da m!”

⁷¹ Esa fyewyi jesun, ɓinyikwoi do wa ɓe wa gye wo gni na bokunmi gbe, wa gna aza nɓa ɓo zhi ɓo, “eza deye ɓo gnisun Yesu yi n Nazarati!”

⁷² Njesun Bitrus wa naɓo, har woi si nyasi wa gna, “Mi takpe ezadeye ye lo m.”

⁷³ Esa fyewyi jesun, aza nɓa ɓo ʼgni-agni ɓo, ɓa ɓe da wo ɓa gna, “Yi kpe lo ho zhin gmanyi nu dna Iwo abara, ntu ho ɓeda a Galiliyi nya pya ɓo.”

⁷⁴ Bitrus wa ya ɓeda nukwoi da woi si nyasi, wa gna, “Mi ta kpe wo ye lo m. Nsai-sai yi pise-nugba ceku.”

⁷⁵ Bitrus wa pa Yesu ɓeda ɓo ge, “Pise-nugba ta ceku naiye n, sai ho la mi yekpe ɓo na abwa ta.” Wa gmiya lo woi cibwi zhan-zhan.