Matta 24 - Alkawali Woiwoyi

Yesu Woi Shi Aɓo Awye Nnabye

¹ Ngye shi Yesu ɓo laka aduwa nyakun ba, ewo abara ɓa ɓe ɓai wu wo a nyakun nu gbo-gbo aduwa nyakun nya.

² Ama wa gna ɓa ge, “Anya mi-mi ye vinya a ɓa ɓa ɓaya to a ce kuta doho-dohoyi tu ndo sim.”

³ Esa wo ɓo sase tu n Zaitun pe, ewo abara ɓa nyawo ge, aɓo deye ɓo zhin n knisayi ya? Knihi nu ɓo zhin ya kpe ge ho jeze ɓo lo, anyi ku ga zoʼa?

⁴ Yesu wa gna ɓa ge, “Fye to ye ezaho-zahoyi wa ze fye amaman.

⁵ Ntu ge aza mwa begye ɓo ɓe ɓai gna ɓa nu zhin Masihu, ɓa bwi aza zokwo n mwa.

⁶ Esa fya wo okun nabari, deye to wu ge mi la ga ɓe num, tile aɓeye ɓa ɓe, ama esa kmaknayi to ɓe kpam.

⁷ Abye n abe yi na anyi ɓo kuka da aje, mikun ɓo gun ekni ɓo shan-shan na ba yi gbo-gbo.

⁸ Ama aɓeye vinya zhin aɓo adna nya nu n ɓa ɓo ya zhin.

⁹ Aza vinya n anyi ɓo ga fye wahala ɓai wu fye ɓai wun fye nu, ntu ge fye zhin emi aza nu.

¹⁰ “N mwa begye n fye mi n ɓa ɓo jeze na vun yi fi n laifi, fye ga fyehin, fyei wun aje nu.

¹¹ Anabi akatayi ɓo ɓe ɓo bwi aza zokwo

¹² Laifi ɓo mwa abaho-bahoi, yeye ɓo la fu se n aza aba n mwa.

¹³ Ama aza n ɓa ɓo ku mi zhi, har esa kmaknayi, ɓa nu ɓo po.

¹⁴ “A ɓo ku nabari manayi Shekwoyi ebe mi nya da anyi mi vinya, har abye doho-doho yi ɓo ku wo, esa kmaknayi ho kpe ɓe.

¹⁵ “Esa fye gye asisi ɓo (ko nu anabi Danailu ɓo da ko ɓo) koi gni agni aba gyi-gyi-yi (fa bahin wa bwa awye ga).

¹⁶ Aza n ɓa fi Yahuda ɓa ɓo busi lo ape.

¹⁷ Aza nu n ɓa kpe anyakum esin ɓato ɓo shin zhi ntu ge ɓa ku ɓa kaya n ɓa apuwam.

¹⁸ Aza n ɓa fi n fwa ɓa to ɓo jeze ɓe api ntu ge ɓa ku ɓa ajem.

¹⁹ “Ayya n anyiko anubo da aba, n aɓiya da yi, n anyi-pyeyi hi.

²⁰ Fye zhin aduwa to efye sibui ko ɓe n viyikoyi ko n assibi wyi m.

²¹ Wahala ɓo ɓe, edo pya anyi to shin gye m, tunyi ngye shi a ɓo zhin anyi, a taje ko pya gye m.

²² “Gaiciya ndei a to ce anyipyei hi zunya n, aza vinya ɓo ku zo fi. Ama a ɓo la ɓa ce zunya ntu Shekwoyi aza kni-kniyi ɓo.

²³ “Njesun ko ezaho-zahoi wo gna fye ge, Kristi n la ɓe nu aba ko ye, ko n ge wo ku wohin tuko wu aba ko ye, fye to ga gaiciya m.

²⁴ Ntu ge Akristi akatayi ɓa kun, ɓedo anabi akatayi, ɓai ɓo zhin aɓo wowo har ge koi ye zhin nu, aɓo ku Shekwoyi aza kni-kniyi dna koce.

²⁵ Fye gye, mi ku kma fye gna.

²⁶ “Ko ezaho yi gna fye ge, Kristi la jeze zhi woi lo n zhabui, fye to gye fye a nuwan fya lo ge fye gye m. Ko fye wo ge wo n wohin so dna lo aba ho, fye to ga gaiciya m.

²⁷ Ntu ge ngye shi fye gye ogmai bmiya kwa ga buzangna eshe gmana nyi, elonu ko ɓa ze esa emi Kristi ɓa jeze ɓe cei.

²⁸ Aba nya fifiyi nyi, n ɓo nu agulu zhin a yezhi.

²⁹ “Nsayi-sayi yi n wahala avun dna n anyipyei hi, wyegma ɓo la dna, ntu ge nyipyei to ɓei je won, epya to ɓo je fun, akpasu ɓo kaya n she, iko eshe nya ɓo shan-shan.

³⁰ “N sayi nu aɓo gye tuze emi ɓeɓe nya eshe, bugba wun ɓo ɓe dna anyi, abye vinya anyi ɓo gye mi ɓeɓe dna anyi, n iko yi, n latu dnagmayi.

³¹ N ɓo tnu emi amalaika yi, n kasun a knaknaci nya yi, ntu ge ɓa ye emi aza akni-kniyi zhi anyi cezhi ba vinya.

³² “Fye tu deye mwi n gbahi shinwan, esa fye gye eko bwala koi ci afintolo putu, fye kpe ge vinyiko sa la wuvi.

³³ Nlonu esa fye gye aɓeye vinya ɓai ya zhin, fya kpe ge emi ɓeɓe la wuvi har abokunmi gbe.

³⁴ Nsa yi anyi ye ɓa ɓo duya.

³⁵ “Eshe n ʼkni yi ɓa ɓa duya, ama emi aɓeda ɓa ta shan duya m.

³⁶ Ama ezaho to lo n wo kpe nyipye ye lo ko esa nu esa kmaknayi ɓa ɓe n ceyi m, ko amalaika. Ko Shekwoyi Nugun, sai Dada gmanyi vonu kpe lo.

^37-38 “Aza ɓo dagma ɓai zhin buki ɓai pa mula, ngye shi ko ɓei zhin n Nuhu ʼsa ogma dnagmanyi kwa kpe zhi nyi.

³⁹ Aza to ɓo ga gaiciya ge, ɓoho ɓa zhin m har esa ogma ɓo ɓe kwa ku ɓa wu vinya. Elo nu emi ɓeɓe ɓa ze.

⁴⁰ “Aza gun aba ɓo fi ɓai zhin tnu-tnu, aɓo la eza gmanyi a fa gmanyi.

⁴¹ Anyikoza ngun aba ɓo fi ɓai zhin ɓa tnu-tnu api nya, aɓo la gmanyi a fa gmanyi.

⁴² “Ntu ce nu fye zhi n shiri zhin, ntu ge fye ta kpe nyipyei ye lo nfye Dagayi wo ɓe lo m.

⁴³ “Ngye shi eza zhin wa gu wo puwa, ntu avi ɓo nyi.

⁴⁴ Nlo nu fye ɓa bui wahala si, fyei zhi n shiri yi ntu emi ɓeɓe ɓo.

⁴⁵ “Ho zhin Dagayi bara ce-cei nu n gaiciya da yi? Mi la tnu-tnu puwa bwashi nya ga ho, ha kpa mi aɓi fyegyi-fyegyi?

⁴⁶ Anabarka da nu n hoi ndei ma je ze ɓe ma sun ho hoi zhin ho tnu-tnu dna n gaiciya.

⁴⁷ N ɓo ga abara a gaiciya nya iko ɓa gyi ebe tu a nya tuko vinya n ɓa zhin emi nya.

⁴⁸ “Ama ndei ho zhin eza nukoyi nu, ha gna ge, emi Dagayi to ga ɓe m.

⁴⁹ Ha ya hoi ga abara aje wahala hoi zhin buki hoi sin nya.

⁵⁰ Eho Dagayi ɓo jeze ɓe to hoi dna ce m.

⁵¹ Wo ɓo lu ho n mwa, woi lo n hoi n akoce-dnayi owa da ba, a ba bwici lo ai gyi anyikna.”