Matta 22 - Alkawali Woiwoyi

Shekwoyi Bemi Dogbe

^1-2 Yesu ɓo da anabari n mwa begye ntu ge wa wu ngye shi Shekwoyi ʼBemi wu. Wa gna, “Aɓa mwi ko do n ʼsu ho yi n wo ɓo zhin amula wyefan shiri dnagmai ntu wo nugun ɓo.

³ Wa ku awyefan ɓo pa aza mwa, She shiri ɓo ku zo zhin, wa tnu ge aza ɓa ɓe gye sa la si, ama oɓa vinya, to ɓa ɓe m.

⁴ Wa je aza do tnu ge agna ɓa ge, ‘Aku shiri zo zhin, aɓu ku ɓi. Ɓa ku pye!’

⁵ “Ama aza n wo ɓo pa ɓa awyefan nyi, ɓa ma wo san ɓa gya-bye ɓa tnu-tnu yi, zaho wa lo wo nya wo fwa, zaho wa lo wo gniko.

⁶ Azaho ɓa wan tnu-tnu da yi ɓa lu, ɓa dna ɓa vinyikwo har a kwa zaho wu.

⁷ “Minagyi a gyi ʼsu yi wa tnu n wa sojayi, ɓa lo ɓa ku azayi wu nɓa ɓo wu waza nyi, ɓa ku ɓa ezhi kpe ʼna.

⁸ Wa pmi wa gna wa fyenu ge, ‘Aku mula nyagyi zo shiri zhin, aza n mi ɓo pa ɓa nyi, ɓa to ɓo kunce ma pa ɓa m.

⁹ Fye lo fye zan na zokwo, zaho-zahoi fya gye, fya gna wo wa ɓe.’

¹⁰ “Afyenu ɓa lo ɓa yi aza ɓe cei, amanayi n na nukwoi yi mula nyagyi-ba nugni na zhiɓei yi.

¹¹ Ama she osu ɓo ɓe ge wa zhin azhiɓei mabe, wa gye zaho dna ntna mula je-kpe kpe yi (n na ɓo gawo nyi).

¹² “Wa nya ge, ‘Nugundo, ko zhin wuna hoi dna ʼya ntna mula je-kpe ya’? To zaya dna ɓegbe m.

¹³ “Osu wa gna wa bmazhin-yi ge, ‘Fye la wo pa nabwa na pita yi fya she woya dna wyegma, aba n bwici lo ɓedo na nyikna gyi yi.’

¹⁴ Ntuge ayi-yihi mwa ɓegye lo, ama a kni-kniyi fyewyi nu.”

¹⁵ Sai a Farisiyi a yezhi, ɓa zhin shaula shi ɓa ɓa zhin wa da ɓo ho n kwo ɓa zhin ɓa wan wo.

¹⁶ Ɓa ku shaula zhin ge, ɓa tnu n ɓa zayi ɓedo na siyasa-da yi, ɓo nya wo ɓeye: “Zadnagmai, yi kpe lo ge ho da gaiciya ko ai ɓa tu ho ʼbe nu sha, ntna dna, to hoi kni-kni m.

¹⁷ Yi ye ha gna yi, ko bmiya lo ya ga a Romayi Gamnati gadu kwo awo?”

¹⁸ Ama Yesu wa ku kpe ɓo ye ɓa ye, “Wa gna ɓa, Efye aza-kwocednayi! Fye ye fya ze nyikanu mama n fya ɓenya a dabara nya yi a?

¹⁹ Fye wu Mi gyiwye.” Ɓa ga wo kobo.

²⁰ Wa nya ɓa ge, “Nyikado foto nu tu ya? Nyikado ye yinu ka kpe n foto sinta?”

²¹ Ɓa gna, “Kaisar nya.” Wa gna ɓa ge, “Fye ga Kaisar enya kwo zhin wo nya, fyaga Shekwoyi nyaho-nyahoi kwo zhin Shekwoyi nya.”

²² Shi wo ɓo ga ɓa amsa lo nu ca wo ɓa, ɓa kuka ɓa lo ɓa nya.

²³ N wyiyi yi jesun, a Sadukiyi, aza nɓa gna kalaku to lo n vingwo n, ɓa ɓe Waba ɓa nya ge,

²⁴ “Zadnagmai, Musa ɓo gna nza fyi to woi ma aɓi m, owo zado ɓa mi wa la wo nyigbai, oɓa-ɓi ɓa ku zafifiyi gado.

²⁵ “N ya tasin, azaho ɓo nyi ngun tnaba nɓa ʼya mi. Eza kmisun-yi wa la nyikwo wa fi to ɓai ma ɓi m, owo mada la nyiko yi.

²⁶ Mado yi wa ka fice, ntna ɓi, owa ʼza-yatiyi wa kala har, oɓa tnaba, zaho-zahoi ɓami, wa nyikwo yi la.

²⁷ Nyiko yi ce, wa ɓe wa fi.

²⁸ N kalaku vingwo ma, wo ɓei zhin nyikado nyikwo na? Ntu ge oɓa tnaba, zaho-zahoi ɓo la wo la.”

²⁹ Ama Yesu wa gnaɓa ge, “Efya babwi pa ge fye ta kpe Littafi gyi-gyi yi ye lo n Shekwoyi iko yi m.

³⁰ Ntu ge n kalaku na vingwo, mula-pa to lo n, Zaho-zahoi ɓo la ze ngye amalaika n ʼshe.

³¹ Ntu na zafyi kalaku ɓo, fye to shin Littafi Gyi-gyi-yi ba n? Fye ta kpe ge Shekwoyi ɓo daɓo n fyei nu Wa gna,

³² ‘Emi nu zhin Shekwoyi Ibrahim nya, Ishaku, n Yakubu n?’ Ntu cenu, Shekwoyi to zhin Shekwoyi aza fi-fiyi nya nu m, ama Shekwoyi aza wye-wyeyi da nya.”

³³ Ca wo aza yezhi na amsa yi n wo ɓo ga nyi.

^34-35 Ama gbo na Farisiyi! She ɓa ɓo wo ge a Sadukiyi to gyi nasara n, ɓa zan ɓonya do shin ɓa nya Wo. Owa yekpei ho nɓa mi, wa daɓo wa gna,

³⁶ “Zadnagmai, kni wyidnai nu du vinya n Musa ʼwa?”

³⁷ Yesu wa gna, “ ‘Ye Dagayi oho Shekwoyi nho bugbai vinya, nho wye-wyei yi, nho ɓomwi yi.’

³⁸ Deye nu zhin wyidna dnagmai kmisunyi.

³⁹ Odo nyi kwo yatu kwo, ‘Ye ho kunzhi-yi ngye shi ho ye hohin tukwo.’

⁴⁰ Awyidnaje vinya, nna anabi ɓeda yi, ɓa kun nu awyidna gun-aba ye mi nu. Ɓa nu ɓami jesun, n ha shi ɓa bwa, ho ku aje shi bwa vinya nu.”

⁴¹ Shi a Farisiyi ɓo ku she wo gun, wa nya ɓa ɓo.

⁴² “Masifu ma, Nyika do nugun nu n woya”? Ɓa gna, “Dauda nugun.”

⁴³ Yesu wa nya ɓa ge, “Kniyi nu zhin Dauda woi daɓo dna n Zafun Gyi-gyi-yi iko woi yi wo ge Dagayiʼa?

⁴⁴ “Shekwoyi ɓo gna mi Dagayi ge, ‘La sase mi bwaizhe-bwa har ma ku ha nuwunyi fi nha pita sinta.’

⁴⁵ Shi Dauda ɓo yi wo ge Dagayi nyi, ko ɓa ze wuna agna ge wo zhin wo nugun na?”

⁴⁶ To ɓa bwa ɓegbe-dna m. Ntu wyi yi yi, to zaho-zaho yi wa jemi wo ɓo nya m.