Matta 18 - Alkawali Woiwoyi

Fye Ku Ze Ngye Aɓi Nawyi

¹ Sa fyewyi abara ɓe Yesu aba ɓa nya wo ɓo ntu ʼza ɓo nwo ɓei zhin za-dnagmai dudu yi n Shekwoyi ʼbe mi.

² Yesu wa yi ʼɓi nawyi ɓe cei dna ɓa tasin.

³ Wa gna, “Sai fya ye abui n Shekwoyi aba, fya fwa alaifi, fya ze ngye aɓi, n to lo nu n, fye ta lo Shekwoyi ʼbe mi m.

⁴ Ntu ce nu, eza n wa gba wohin ngye ɓinai ye, wo nu ɓei zhin ʼza-dnagmayi du-duyi n Shekwoyi ʼbe mi.

⁵ Njesun eza wa gwo ɓinai lai ntu mi ʼye ɓo, wo gwo Mi nu.

⁶ Ama ndei eza zhin ɓinai n wo kpema Mi wa fwa gaiciya ga ɓo ko ɓa gna bmiya a gyi wo ata wyigwo nya n begye a she wo ya dna n ʼla.

⁷ “Aiya nanyi aba ntu kwo aɓo nukwoi ɓo, tile a jaraba ɓe, ama aiya n za aba n wa ɓe n jaraba bonyi cenya yi.

⁸ Ntu ce nu ndei oho bwa ko pita ɓa zhin ho ha zhin laifi, sai ha zunkoya ha ko sheya. Ko gna bmiya lo ha lo ʼshe n bwai zun-zunyi ya ko pita ndoi n ho ɓa lo ana pyi nha bwai ɓedo na pitai gun aba.

⁹ “Ndei ewye ɓa zhin ha zhin laifi, sai ha bi ko ya ha ko sheya. Ko gna bmiya lo ha lo ʼshe n wyei gmanyi da ho dna na napyi nawyei gun aba.

¹⁰ “Fye zhin peceiye to fya ci aɓi naiye wyegbam. Ntu ge oɓa amalaika ʼshe zhin ɓa lo mi Dada aba cici.

¹¹ Emi, Masihu, ma ɓe ntu gema gni abwi-bwi yi nu.

¹² “Ndei eza n akni yi tagyi, gmanyi kni kwa bwi, wo ta fwa shi ciwa-gmanyi-cei-ciwagmanyi wa lo ape sepa wo zan gmanyi shin nkwa bwi nyin?

¹³ Nwa ko gye, wo ɓa dagma n mwa ntu ko ɓo, ndu shi ciwa-gmanyi-cei-ciwagmanyi nɓa cefyi napi n lafiyai nyi.

¹⁴ Nlo nu; Emi Dada ɓomwi nu to gmanyi dna na ɓi naiye wa bwi m.

Yi Zhin Aje Gafara

¹⁵ “Ndei oho zado wa zhin ho laifi, lo wa aba ho gna wo. N wa wo ho, wa ku wo laifi da, ho la wo jeze ɓe cei.

¹⁶ Ama n wo to wo n, ha la ʼza gmanyi ko gun aba fya lo ha jewo wo laifi wu ntuge asaida-da ɓai wo.

¹⁷ Ndei wo to go wo laifin, ha lo n ɓedai-yi n Ikklisiya. N Ikklisiya daɓo kwa ku daho, to wa du wa yen, Ikklisiya wo ze ngye tna-viyi, to a zhin jedoɓe nwoi m.

¹⁸ Ma gna fye-nyaho-nyahoi nfya ko pa nanyi, a la ko pa n ʼshe, nyaho-nyahoi nfya loya nanyi, aɓa ko loya n ʼshe.

¹⁹ “Ma je fye gna, ndei aza gun aba ku gbe gun nanyi ye ɓa gyiwye ntu nyaho ɓo, Emi Dada n Wo dna ʼshe nyi, Wo ɓa zhin ko ga fye.

²⁰ Ntu ge aba naza gun aba ko gun ata yezhi ntu ge ɓa zhin minya nu, Mi dna lo nɓa tasin.”

²¹ Bitrus wa ɓe wa nya wo ge, “Dagayi, miɓa zhin mi zado gafara abwa knihin nu woi ya zhin mi laifiʼa? Abwa tnaba?”

²² Yesu wa gna wo, “Awo! Abwa tnaba har shi-tnaba.”

²³ Aɓa mi a mwi Shekwoyi bemi do nʼsu yi n wo ɓo ye wa ku wa gyiwye do, wa gye nya wo ceyi.

²⁴ Dna nanya dokumi, a ɓe wo ntada hoi n wo ɓo cei shi ₦10,000,000.

²⁵ To wa mi nwo gban, osu wa gna a la wo kun ɓedo n wo nyikwoi na ɓi yi, n na nyai n wo cei vinya.

²⁶ “Ama zahi wa yashi wa gyi ʼsu kni, ‘woi kwa mwi kpe wohin, wa gna, ʼsuku-suku, bwa hankuri n mi yi, miɓa gba ta yi vinya.’

²⁷ “Osu hi wa gye wo sun-sun wa wo loya, wa ku eta yi zo wo.

²⁸ “Ama she zahi ɓo gmiya nʼsu aba, wa lo zaha ʼba n wo ɓo tai shi wo ce ₦2,000, wa ta bwa shi wo n sha wa gna wo ge wo gba wo ta, n sai-sai ye.

²⁹ “Eta-dahi wa ya shi wa ɓa wo ge, ‘Zhin hankuri ha gami ʼsa fyewyi, mi ɓa gba ho vinya.’

³⁰ “Ama to wa fwan, wa la wo wa wo dna n kurkuku, sai ge wa zo eta yi gba vinya.

³¹ “Zahi a-nugundo ɓa lo ɓa gna osu ɓo ko ku zhin.

³² Osu wa yi wo n wo ɓei ku ʼta zo wo nyi, wa ci wo ge, ‘Oho, bugba nukwoyi da, mi ku hota yakwo yi zo ho vinya, ntu ge ha gna mi gye ho sun-sun.

³³ Ko to ɓei kunce ha gye ho zado sun-sun ngye shi ma gye ho sun-sun?’

³⁴ “Osu minagyi kwa laka wa wo dna na wahala ba sai wa zo etahi gba ce vinya.

³⁵ N lo nu Emi Dada eshe nya zhin fye n fyeto ye nfya bugbai, fya zhin fya zaje gafara m.”