Matta 17 - Alkawali Woiwoyi

Yesu Dna Nwo Mwa-Mwa

¹ Shi aɓo bwa anyipyei tnai, Yesu wa ku a Bitrus, Yakub n wo zadoi ngye Yohanna, wa lo ɓai n ʼpe yakwo tukwo, ɓahin-ɓahin.

² Ɓa zhi ɓai shi wa wye, ɓa gye wo la shando, Owa wyebai bmiyana ngye nyipyei, Owa je ɓa ku wu bui-bui yi pau.

³ Nsa gmanyi yi, ɓa gye Musa n Iliya yi nku ɓe ɓai daɓo wo yi.

⁴ Bitrus wa ci ge, Dagayi, ko bmiya lo ya ku yi nya kpe ʼya. N ha ye, miɓa kpe alubui gun ata, gmanyi jntu ho ɓo, gmanyi ntu Musa ɓo, gmanyi ntu Iliya ɓo.

⁵ Wo ye dna ɓeda mi, anyi buzangna nya ɓe, kwa tu ɓa fun, begye kwa gmi na nyiyi kwa gna, “Emi Nugun Yeye yi nu nyi, mi bwa gmada n woi zam. Fye vi wo ɓeda.”

⁶ N sayi abara miya zhi na wyei knianyikun, ednai wo ɓa.

⁷ Yesu wa ɓe wa to ɓa bwa wa gna ɓa, “Fye kuka, fye to woʼdna m.”

⁸ Shi ɓa ɓo sha wye, ɓa bwa Yesu nu gye gni n kunsun n ɓai.

⁹ Shi ɓa ɓo shin zhi ʼpei, Yesu wa gna ɓa ge ɓa to gna zaho-zahoi aɓo ɓa ku gye nyi m, sai wo la laka n vingwo kpa.

¹⁰ Owo abara ɓa nya wo ge, “Knihin nu zhin a Yahudawayi a tukwodai gna ge sai Iliya la jeze ɓe kpa kafin Masihu wo ɓe ʼa?”

¹¹ Yesu wa gna ɓa ge ɓa da gaiciya nu, “Tile Iliya wa ɓe kpa wa zhan ʼɓo zhi dai-dai.

¹² Nkusun kuwa, Iliya la ɓeɓe kwo, ama a to kpe wo ye m, har a ga wo wahala. Emihin, Masihu, miɓa sin wahala n ɓa kun.”

¹³ Gni ɓo nu abara kpe ge wo da Yohana batisma zhinyi nu ɓo.

Yesu Wa Ka Oɓi Gna

¹⁴ Nɓa zo kakazhi yi nʼpe sinta, ɓagye deji zhi koi pmi ɓa. Ezaho wa ɓe wa yashi n Yesu abye wa gna,

¹⁵ “Dagayi, gye mi nugun sun-sun, ntu ge wo nʼfi kpe-kpe nyasan yi lo, woi gya zhin n mwa. Nsahoyi, wa shefi nʼna ko nuwan.

¹⁶ Mi la ɓe woi ho abara aba, ama ɓato mi ɓai ka wo gna m.”

¹⁷ Yesu wa gna, “Efye akala-kpei, atna gaiciya ga yi, miɓa bwa atna nfyei har kni sai na? Fye ɓemi woi ya.”

¹⁸ Yesu wa gnakni zafun nukwoyi nkwo ɓei dna ɓihin nyi, kwa gmi n wo, wa bwa lafiya n sayi-sayi yi.

¹⁹ Avun abara nya Yesu ge, “Knihin na zhin, to yi mi yi gmi zafun nukwoyi ya ma”?

²⁰ Yesu wa gna ɓa ge ntu fye gaiciya ga gba-gbai ɓo nu. “Ntu ge fye ɓo n gaiciya gai lo ko ngye fulu byegye, fye ɓa mi fya gna epe ye ge, ‘Laka,’ kwa laka. Ɓoho to lo nkwo ta ye zhin m.

²¹ Ama zafun nukwoyi ye pya ta ye gmiyan, sai na duwa zhin yi na zumi yi ɓe.”

^22-23 Nwyi hoyi, ɓai ye fyi n Galili, Yesu wa gna ɓa ge, “Aɓa ga Mi naza kun n ɓa ɓa wu mi nyi, ama nyipyei tayi, mʼɓei je wye-wyei bwa.” Bugba wun wa bara zin.

²⁴ Ɓa si Kafarnahun a gadu goyi ɓa ɓe ɓa nya Bitrus ge, “Efye maigida ta gba gadu n?”

²⁵ Bitrus wa gna, “Sosei, wo gba.” Wa lo api mi wa da ɓo Yesu yi, ama kafin wo bwa ʼsa wa daɓo n woi, Yesu wa nya wo ge, “Bitrus, ha gye wuna? Asu kpe aza nu gadu, ko aknido da n na ku ɓa gyi nkun yi a?”

^26-27 Bitrus wa gna, “Aknidoda nu.” Yesu wa gna, “Ashe akni aɓi ku pwo! Ama to ya wun ɓa bugban, lo ʼdna gbe ho she ogwo, ebmiya n ho ɓa wan nabye, ha la kwo gbe ya, ho ɓa gye agyiwye fyi nɓa ɓa kun yi gadu gba, ha ɓe cei ha ga ɓa.”