Matta 1 - Alkawali Woiwoyi

¹ Yesu Kristi azakwoyi aye nu nyi, Dauda nugun n Ibrahim yi.

² Ibrahim ɓei zhin Ishaku dada nu Ishaku wa zhin Yakubu dada, Yakubu wa zhin Yahuda dada ɓedo n wa zajeyi.

³ Yahuda wa zhin Perez dada n Zerah yi. Tamar nu ɓei zhin ɓa ʼya. Perez wa zhin Hazren dada; Hezron wa zhin Aram dada.

⁴ Aram wa zhin Aminadaba dada, Aminadaba wa zhin Nahshon dada, Nahshon wa zhin Salmon dada.

⁵ Salmon wa zhin Boaz dada, Rahab nu ɓei zhin wo ʼya. Boaz wa zhin Obed dada, Ruth nu ɓei zhin wo ʼya, Obed wa zhin Jesse dada.

⁶ Jesse wa zhin Esu Dauda dada. Dauda wa zhin Solomon dada, Uriya nyikwo nu ɓei zhin owo ʼya.

⁷ Solomon wa zhin Rohoboam dada, Rohoboam wa zhin Abija dada. Abija wa zhin Asa dada.

⁸ Asa wa zhin Jehoshafat dada, Jehoshafat wa zhin Joram dada, Joram wa zhin Uziya dada.

⁹ Uziya wa zhin Jotam dada, Jotam wa zhin Ahaz dada, Ahaz wa zhin Hezekiya dada.

¹⁰ Hezekiya wa zhin Mannase dada, Mannase wa zhin Amon dada, Amon wa zhin Josiya dada.

¹¹ Josiya wa zhin Jokoniya dada n wa zaje yi (ama ɓa esa n na ɓei lo fyenu tnu-tnu nceyi n Babila nyi.)

¹² Nfyenu tnu-tnu avun, Jokoniya ɓei zhin Shetil dada nu, Shetil wa zhin Zarubbabila dada.

¹³ Zarubbabila wa zhin Abiu dada, Abiu wa zhin Eliyakim dada, Eliyakim wa zhin Azor dada.

¹⁴ Azor wa zhin Zadok dada, Zadok wa zhin Akim dada, Akim wa zhin Eliu dada.

¹⁵ Eliu wa zhin Eliyazar dada, Eliyazar wa zhin Mattan dada, Mattan wa zhin Yakubu dada.

¹⁶ Yakubu wa zhin Yusufu dada (wato Maryamu ɓa – Yesu Kristi Masifu ʼya).

¹⁷ Nya kwo laka n Ibrahim koyi lo Dauda – Esu, a chala awo-cei-anyi nu. Kwa laka n Dauda Esu kwa lo fyenu tnu-tnu sa n Babila a chala awo-cei-anyi. A chala awo-cei-anyi n fyenu tnu-tnu sa kwoyi lo Kristi sa.

Alkawali Eɓi Nya

¹⁸ Aɓo deye ɓa nu zhin gaiciya tu n Yesu Kristi mama ɓo. Yusufu nu ɓei zhin woi bwa owo ʼya Maryamu. Ama to ɓai gye ajen, a gye wo gni n nuboyi Zafun Gyi-gyi-yi nya.

¹⁹ Sai owo nugun-yi, Yusufu, ntu ge wo ɓo zhin ɓe-fye-cezhi-yi nu, wa ye ntu ge wa ya wo fya, to wa dna wo vinyikwon.

²⁰ Woye dna shawara zhin mi, Dagayi wa tnu n wo malaika yi n Yusufu aba, dna n nanu mi, wa gna woge, “Yusufu, Dauda nugun, to Iwo dna n Maryamu layi wa ze ho nyikwon, ntuge nubo n wo gni n cei nyi, Zafun Gyi-gyi-yi nya nu.

²¹ Wo ɓa ma eɓi nugbayi, Ho ɓa tu wo ʼye ge Yesu, (okwa wyega ge ‘Zagniyi’) ntu ge wo nu ɓa gni waza nɓa alaifi.”

²² Deye kwo ɓa nu Shekwoyi ɓeda n wo ɓei da nwo anabi ʼgbe:

²³ “Wo! Ɓinyikwoi ɓa gni n nuboyi! Wo ɓa ma eɓi nugbayi, aɓa yi wo ʼye Immanuel” (watau “Shekwoyi kun-sun lo yi”).

²⁴ Shi Yusufu ɓo kun agyewyi, wa zhin shi malaika Dagayi nya ɓei gna wo, wa Maryamu la wa ze ʼwo nyikwo.

²⁵ Ama ɓa to ɓo gye ajen har wa eɓi nugbayi ma, Yusufu wa tuwo ye ge “Yesu.”