Markus 9 - Alkawali Woiwoyi

Yesu Dna Nwo Mwa-Mwa

¹ Yesu wa godu Wa gna Wo abara ge, “Aza zhilo ya nfye mi nɓata fyi m, sai ɓa gye Shekwoyi bemi kwoi ɓe dna ko ikwo yakwo kpa.”

² Anyi-pyei tnanyi, navun Yesu wa la Bitrus, n Yakubu yi n Yohanna yi ɓa gnulo epeshe. Zaho to ɓei shan knusun n ɓa yim safyewyi Owo awyeba ɓa shando ɓai bmiyana.

³ Owo aje ɓai bmiyana n bui-bui yi pesheu n du anyi nya zhin dohodohoi n fwan-fwan.

⁴ Safyewyi Musa n Iliya yi ɓa ɓe ɓa ya ɓeda n Yesu yi.

⁵ Bitrus wa cige, “Male, ɓeye bmiya lo mwa. Yi ɓa kpe alubui ngnu ata ntu fye ɓo vinya.!”

⁶ Wo ɓei da deye ntu ge wo to ɓei kpe ɓeye n wo ɓa shan dan, ɓa ku ɓa nya fyiya zhi n dnayi.

⁷ Ama sa nwo ɓeye daɓo nyi, enyi kwa tuɓa fun kwa gu nyipyei, begye kwa gmi ʼshe, “Emi Nugun ye-yei nu nyi, fye wo wo.”

⁸ Safyewyi ɓa shawye to ɓa gye Musa n Iliya yim, ɓa gye Yesu nu bwa cegni nɓai.

⁹ Sanu ɓa ɓei kazhi ɓe ʼpe hi, Wa gna ɓa, “Fye to gna za oɓo fya gyen sai Mila laka n vingwo fya ɓei kpeda.”

¹⁰ Ɓaku kwo shi fyi ɓami, ama cici ɓai dace ɓahin-ɓahin, to ɓa bwa ɓo wyega n Wo da ge, “Kalala vingwo nyi m.”

¹¹ Ɓa ya Wo aɓo nya na Yahudawayi adini tukwo-da zhin ɓa da nge tilas Iliya jezeɓe kpa (Masihu wa kpeanyi ɓe).

^12-13 Yesu wa ya ɓeda Wa cige, “Tilas nu Iliya ɓe wa zhin zokwo kpa ɓehin-hin, wo la ɓe ama aza to zhin wo ɓo nbmiya m, ɓa wu wa nyi shi anabi ɓei da. Yesu wa nyaɓa ɓo na anabi ɓei da n Kristi tukwo ge Wo ɓa sin wahala n vinyikwo yi.”

Yesu Wa Ka Oɓi Gna

¹⁴ Sanu ɓa ɓei kazhi n ʼpe ɓa gye aza yezhi n mwa begye ɓai na ɓo n Wo abara yi ciwa-gmanyi n ɓa ɓei cezhi nyi.

¹⁵ Aza shi Yesu awye n dnayi shi Wo ɓei kashi ɓe ɓa bayi cewo, ɓa busilo dawo ɓa ɓiwo gna.

¹⁶ Wa nyaɓa, “Kninya zhin fyei naɓo na je ya?”

¹⁷ Zaknayiwa dnaɓe gbe wa cige, “Male, ma ɓe n ɓiyi nu Ha kawo gna, wota milo nɓedan ntuge alijanu dna lo wo mi.

¹⁸ Osa alijanu lawo kala, kwa lawo kwa zunwo ʼkni. Wa pu-afugya woi gyanyikna wa fyi-fyiya. Ntu lonu mi-i gyi Ho abara wye ge ɓa kawo gna, to ɓai min.”

¹⁹ Yesu wa gna Wo abara, “O, a gaiciya ga ɓiyi da, Har kniwyi nu Mi ɓa knusun fyei ya? Har kni sayi nu Mi ɓa zhin ankuri n fyei ya? Fye ɓe Mi ɓihi ya.”

²⁰ Ɓa ɓe n ɓihi, ama sa nu wo ɓei gye Yesu, zafun nukwoyi kwa lawo n kalayi kwa zun wo kni wa pu afugya woi gyi anyikna.

²¹ Yesu wa nya wo dada ɓo ge, “Kwo ɓei yawo n kni sayiʼa?” Wa ci wo ge, “Tunyi woi ye bwasun ciwyi.

²² Zafun nukwoyi ye zhin kwa zhin wo wa miya fyi ena, n nuwan yi, n nabai kwa wu wo. O, gye yi sun-sun Ha kawo gna n gye Ho ɓa mi.”

²³ Yesu wa nyawo ge, “Kninu zhin hoi cige, ngye Mi ɓamiʼa? Nyaho-n yahoi to dnaɓom, hoi ya ga gaiciya m.”

²⁴ Owo dada cige, “Mi n gaiciya gai lo, bmami zhin ma bwa kwo mwa.”

²⁵ Sa Yesu ɓei gye aza ɓai yezhi Wa gnakni zafun nukwoyi. “O, Zafun nukwoyi atnubua gunya n takpeɓedanyayi bi ɓe n ɓi yemi, to ha jewo lo m.”

²⁶ Zafun nukwoyi ho kwa sawyi kwa pmikwa la ɓihi kwa zun wo kni n mwa n jesun, kwa fawo sayi. Eɓihi wa shiɓo ngye wola fyi har aza cige, “Wo la fyi.”

²⁷ Ama Yesu wa shiwo bwa Wa lawo kala gni na gni, Wa wo wola lafiya bwa.

²⁸ N navun sanu Yesu ɓei gni n Wo gmanyi yi n Wa bara yi ɓa nya Wo bo, “Knihin na zhin to yi mi n zafun nukwoyi gmiya ma?”

²⁹ Yesu wa ciɓa ge, “Aɓo ye pya sai fya zhin aduwa.”

^30-31 Sanu ɓa ɓei fwa ekni deyi, ɓa zan-zan fi n Galili kni to Wa ye ge aza gye wom n na bayi Wa bwa sa n wo abarayi Wa wu ɓa nya. Wa ci ɓa ge, “Emi, Kristi, aɓa knu Mi a wu Mi ama Miɓei laka n vingwo n na anyipyei ata vun.”

³² Ama to ɓa bwa awyegam har odna wo ɓa to ɓa nya Wo kwa wyegam.

³³ Ɓasi Kafarnahum, Sanu ɓa ɓei ku si puwa n ɓa ɓei fi, Wa nya ɓa ge, “Fye ɓo da kni ɓei nu n zokwa?”

³⁴ Ama vinyikwa ku wan ɓa to ɓa dnaɓo gbem, ntuge ɓa ɓei ɓe ɓai naɓo nu najei eza nwo zhin zadnagmai n ɓa mi.

³⁵ Wa sase Wa yiɓa zhi nwo aba Wa ciɓa ge, “Eza nwo ye wa zhin zadnagmai tilas wa ze fyenu.”

³⁶ Nsayi Wa ɓe nɓiyi dna n ɓa tasin Wa la ɓihi she Wa ci ɓa ge,

³⁷ “Eza n wa ye na ɓiyi ngye za deye dna Miye, wo ye n Miyi nu. Eza n wa ye n Miyi, woye n Mi Dadayi nu n Wa tnu n Miyi nyi.”

³⁸ Owo bara, Yohanna, wa ci wo n wyihoi ge, “Male, ya gye zaho woi zhin ampanyi n Ho yeyi, woi knu alijanu ya, ama ya ciwo ge wo lafa ntu ge wo to zhin Ho bara nu n gye yim.”

³⁹ Yesu wa gna ɓa ge, “Fye to hana n woyim, gama eza to lo wa zhin atnu-tnu wo-woyi dna Miye wa pmi a vun wu, wa zhin gaba n Miyi n pye-pyeyim.

⁴⁰ Eza nwo to zhin gaba n yi yim, wo zhin yi nya nu.

⁴¹ Ndei eza ga ho nuwan n kofi yi n tu ge ho zhin Kristi nyanu, wo ɓa bwa lada n mwa.

⁴² Ama ndei zaha zhin zaknayi dna n na ɓiyemi wa ce bonyi gwoma a gyiwo ata wyigwo nya dnagmai dna n begye a shewo ya dna nuwan yakwo mi wa bwi nuwan.

^43-44 “Nho bwa zhin laifi, la kwo zunya. Gwoma ha sase nyalo-nyalo dna na gmada n bwai gmanyi, aya ci ge a she ho ya dna, n na kota shan wun nyin, nha bwayi gyi ngnu aba.

^45-46 N ho pita lo n hoi naba nukwoyi, lakwo zunya, Gwoma ha sase nyalo-nyalo n pita yi gmanyi aya cige ho lo anapyi n ha pitayi gyi ngnu aba.

⁴⁷ “Nho wye zhin laifi, ha kwo gmiya. Gwoma ho lo Shekwoyi bemi n wyei gmanyi aya cige oha wye gnu aba gye anapyi.

⁴⁸ Aba n gugurugu to shan zom, ena ce to kwoi shan wun m.

⁴⁹ Aba n na sansan yi gyi aza nyalo-nyalo.

⁵⁰ “Sankpegye dadayi to na ampanyiyim, ndei kwa fa kwo dadam. Kwo ta shan mi kwa da nya hom. Ntu lonu fye to ya fye dadam. Fye sase najei n na gmada yi.”