Markus 7 - Alkawali Woiwoyi

Akunnu Tukwoda Ɓa Nya Yesu Aɓo

¹ Nwyihoi a Yahudawayi adini tukwoda ɓa knu Urushelima ntu, ge ɓa dna Yesu wye.

² Ɓa gye Wo j abara ɓai gyi nyagyi to ɓai zhin a Yahudawayi knunun,

³ (Gama a Yahudawayi tun baga a Farisawayi, ɓata gyi nyagyi to ɓai nabwa n na bwagma yi m, shi ɓa knunu kwokwoyi kwo da.

⁴ Sanu ɓa zhi gnikwo, tilas ɓa zhan ɓahin kpa kafin ɓa gyi nyagyi. Ɓa na knunu ye pya yi lo mwabegye tunyi sapa ɓai zhin ɓa, har naiye ngye aknunu shaknu zhan nya, na kwanu zhan yi.)

⁵ Ntu lonu, adini tukwoda ɓa nya wo ge, “Knihi nu zhin to ho abarayi vi yi aknunu ma? Ntu ge ɓa gyi nyagyi to ɓai nabwa kpam.”

^6-7 Yesu wa gnaɓa ge, “Efye amu-nafici da! Ishaya Anabi wa wufye bmi pai-pai sa n wa ci cei ge, ‘Azaye ci Shekwoyi ngbeyi nu, ama ɓa ta yewo n ɓa bugba min. Ɓa gami mwa-mwa gbeloyi nu, ntu ge ɓa gna aza ge Shekwoyi gnage a shi ɓa wyidna bwa. Ishaya da gaiciya nu.’

^8-9 “Ntuge fye shan Shekwoyi wa do n ye knunu yi. Ɓehin-hin, fye na Shekwoyi owa ɓo nu fye shi fya knunu bwa.

¹⁰ “She Musa ɓei ga fye gbetu deye n Shekwoyi aba: ‘Gaho dada mwa-mwa nho-yayi.’ Wacige znu wa da ɓeda nukwoyi tu wa zakwoyi tukwo, wo ɓa fyi.

¹¹ Amma fya cige, Ɓenukwoi nu ton nza gye wa zakwoyi fyi n san, wa ci ɓa ge, ‘Aiya mitami ma bmafye zhin m, ntu ge nya mi ɓei ɓa ga fye nyi, mi la ga Shekwoyi.’

^12-13 N lonu fye bma Shekwoyi awyidna ya n nabai fya shi aknunu bwa n zanyi-koci wa zhin, aknunu ypya lo n mwa begye.”

¹⁴ Nnavun Yesu wa yi aza ge ɓa ɓe ɓa wo. Wa ciɓa ge, “Efye viyan, fye wo, fya fwa kwa lofye njesun.

^15-16 Efya wye-wye tabwa nyasan, ntu nyaɓo fye gyi m, sai nya fye zhin nubo ceyi, fyei da!”

¹⁷ Navun Wa lolo puwa mi, ntuge Wa lka na za aba, owo abara ɓa nyawo owo ɓeda awyega.

¹⁸ Fye to na wyegai lo cen, nge nya gyi, konu tatu fye cegye n?

¹⁹ Gama nyagyi ta siho bugbam, ama kwo diya lo nubo mi. (Owo ɓeda lonu ko wuge nyagyi doho dohoi gyi-gyi-yi.)

²⁰ Wa cige. “Aɓo nubo zhin nukwoyi nu tuza cegye.

^21-22 Gama n za bugbanu n na nubo zhin nukwoi knu, nayi dhakpe, eviwyi, zawu, Kwocedna, azanya pwa wo, anagbayi zhin, shewo, ɓonukwoi mwi, akmikni, tukwo mwa, nyaze, na ɓenukwoyi vinya.

²³ A nya nukwoyi ye vinya knu n ʼzami nu, ɓanu tu za cegye to Shekwoyi wa gwo zam.”

Ɓeho-ɓehoyi Nwa Zhin Kwo Zhin Ɓewowoyi Nu.

²⁴ Nnavun Wa fwa Galili Wa lo Taya kni n Sida yi, to Wa ye a kpe ge Wo la ɓem, ama to kwa zhin m, gama Owo ɓeɓe nabari ɓei la lapwi wolo-wolo she kwo shin zhin.

²⁵ Nsagmanyi yi, nyikwoza ho wa ɓe, n na alijanu bei wan wo nyigun. Wo bei ku Yesu nabari wo, wa ɓe wa yashi n Yesu abye.

²⁶ Wa gyiwo wye ge wo kawo nyigun gna. (Ama wo ɓei zhin Sirufunikiyi nu “ebye wyegba ci nya.”)

²⁷ Yesu wa gnawo, “Kwo bmiya Ma bma ma zanu zhin kpa – a Yahudawayi, kwo to bmiya a la aɓi nyagyi a ga amwi m.”

²⁸ Nyikwoza ho wa cige, “a zhin a ga amwi biyi nba zhi n tabul sinta, dna na ɓi nyagyi ba gyi nya kwoce nyi.”

²⁹ Wa ciwo ge, “Hada dai-dai! Mi la ho nyigun kagna, lo ho nya. Alijanu la ho ɓi fwa!”

³⁰ Sa nu wo ɓei si apyi, wa gye wo ɓi wangye tu n gado, Alijanu yi lawo fwa.

³¹ Wa gmi n Taya W lo Sida, Wa jezelo Galili ʼla n na zhi ngun awo zokwo yi.

³² Aɓe Wo n tnubua-gunayi woi san gu-gulo n jesun. Aza vinya ba gyi Yesu wye ge Wo to wo bwa Wa kawo gna.

³³ Yesu wa gmi wo n na za, Wa lo nwoi Wa dna wo bwanyi n tnubua. Wa kni akni kpe n bwanyi Wa to wo nyitala bwa n cei.

³⁴ Wa kpewye wu She, Wa ya sun Wa ciege, “Guya.”

³⁵ N sayi-sayi yi, wa ya atnubua ɓewo woi da ɓo njesun dai-dai.

³⁶ Yesu wa gna aza ge ɓato wu lafiya labam, ama sa n Wa gnaba ge bato dam, ɓa gna dada nu.

³⁷ Ntu ge ce bei wo ɓa n mwa. Cici ɓa cige, “Ɓoho-ɓohoi n Wa zhin, ɓo wowoyi nu, har woi zhin a tnubua gunayi n na takpeɓedayi, ɓai daɓo cewo.”