Markus 6 - Alkawali Woiwoyi

¹ Esa fyewyi wa fa ekni dehi, wa O jeze lo wo ayi Nazarati ɓedo nwo abara yi.

^2-3 N satiwyi yi wa lo aduwa nyakun, ntu ge wo wu nya, owo ɓeyekpe nwo aɓo wo-woyi zhin yi kwa wo aza, ntu ge wo ɓo zhin oza nu ngye ɓa. “Ɓa nya ge kafinta n Maryamu yi nugun nu to n, owo azaje nu to n Yakubu yi n Yusufu yi n Yahuda yi ɓedo n Simani yi n? Owo amapwi to bwa gni fi lo n ya n yi n.” To ca da ɓa m.

⁴ Yesu wa ci ɓa ge “Anabi n mwamwa yi nna baho-baho yi, sai dai n wohin ayi nwo aza aba.”

⁵ Ntu ɓa tna gaiciya ga ɓo, wo to ɓo mi wa zhin aɓo wo-woyi nɓa aba m, sai dai wo ɓo to anyasan yi bwa, wa ka ɓa gna.

⁶ Ca wo wo ntu ɓa tna gaiciya ga ɓo. Wa gmiya wa lo azhi do wa wu ɓa nya.

⁷ Wa yi awo-cei-aba, wa tnu ɓa ngun aba-ba, wa ga ɓa iko tu nna azafun nukwoi tukwo.

^8-9 Wa gna ɓa ge ɓa to la nyahon, sai oɓa busi zanzan nya. Ɓa to la nyagyi n pwakun yi ko agywye ko abuada do ko eje do m.

¹⁰ N fya lo ezhi fya ku bwa fi n puwa gmanyi har fya kun n zhihi.

¹¹ N fya lo ezhi nna to gwo fye ko a kna fya ɓeda tnubuan m, fya abwitukun luya nfye apita, fya kun, fya fa ɓa nɓa aɓoi.

¹² Owo abara ɓai gna zaho-zahoi nɓa gye, n ge wo la laifi fa.

¹³ Ɓa kun alijanu ya n mwa, ɓa ka anyasan yi gna, ɓai shin ɓa zaitun mi.

Yohanna Fi

¹⁴ Esa fyewyi Hirudus wa wo Yesu nabari, ntu ge a ɓei zhin ai da wo aɓo wo-woyi zhin ɓo abaho-bahoi. Esu wa zhin nubo ge ko Yohanna batizma zhin yi nu la laka n vigwo. Aza ci ge ashe ce nu zhin woi mi woi zhin aɓo wo-woyi.

¹⁵ Azadoho ɓai gye ge Yesu zhin Iliya nu, ko anabi kwoi-kwoi ho nu la laka n vingwo. Azadoho ɓa gye ge anabi woi-woyi ho nu ngye anabi dnagmayi ho.

¹⁶ Hirudus wa ci ge awo, “Yohanna nu eza nmi ɓei la wo tukwo zunya, wola laka n vingw.”

^17-18 Ntu ge Hirudus ɓei la Yohanna wan, wa wo dna n kurkuku, ntu ge wo ɓo zhin woi gna wo ge kwo to bmiya lo wa la Hirudiya owo zado Filibbus nyikwo m.

¹⁹ Hirudiya ɓo cei pma a Yohanna wu, ama wo to ɓo mi wa zhin lo nu to Hirudus woi ye m.

²⁰ Hirudus ɓei zhin woi ga Yohanna mwa-mwa, woi kpe ge wo zhin oza befyecei nu nza gyi-gyi-yi, wa wo kna. Wo ɓei zhin woi ye wa wo Yohanna ɓeda, ama shi wo ku wo kwa gna wo gna-gna nwo mi.

²¹ Hirudiya sa ɓewo Hiridus mama nyipyeyi kwa shegundo wa yi aza agmada zhin n wo puwa, owa bmazhinyi, asoja tukwoda, n na za dnagmai yi n ɓa knu Galili.

^22-23 Hirudiya nyrgnu wa nya-nya nɓa bye har kwa da ɓa gma vinya. Esu wa zhinwo alkawali ge ntu onya ɓo nwa nya nyi, wo ɓa gawo nyahonyahoi n woye. “Kwo emi kni, ma gna kwaje ma gaho tokun yi.”

²⁴ Wa gmiyalo wa nya wo ʼya, nya kwo bmiya wa nyaɓo. Owo ʼya wa gna wo ge, “Lo ho gna ho ye Yohanna Baptisma zhinyi tukwo nu.”

²⁵ Wa je zelo osu aba npye wa gna woge, “Miye Yohanna Batisma zhin yi tukwo n sayiye tu n fintala.”

²⁶ Kwa gna esu gna-gna, ama kwa wo-wo shan n wo ɓa bma wo alkawali ya na ʼza bye nyi.

²⁷ Wa tnu wo guyi ge, wo lo wo ɓe n Yohanna tukwoyi. Soja yi, Wa lo kurkuku wa zun Yohanna tukwo.

²⁸ Wa ɓe ceyi shi ntu fintala, wa ga ɓinyikwoyi wa lo wo ʼya ceyi.

²⁹ Sa n Yohanna bara ɓei wo nya kwa zhin, ɓa lo ɓa la Yohanna nahi ɓa bikwo dna vingwo.

³⁰ Yesu a bara jezeɓe waba ɓa gna wo a tnu-tnu vinya ɓa zhin n nyayi n ɓa gnaza nɓa ɓei lo ɓa aba nyi.

Yesu Wa Ga Aza Dubu Ngun Atnu Nyagyi

³¹ Nnavun Yesu wa gna ɓa ge ɓa kuka naza ʼba ɓalo ɓa ku sun, ntuge aza mwa-begye ɓai ɓe ɓai lo, to ɓa bwasa ɓa gyi nyagyi m.

³² Ɓa kuka fi n ʼya ɓa lo abado n ɓa ɓei wo pyipyi-pyi

³³ Ama aza mwa begye ɓa ku gye ɓai lo, aza she ɓa kpe ɓa busilo ɓa sun ɓai, ɓai kazhi n ʼya.

³⁴ Aza yezhi shi ɓa zhin ɓa shin yezhi, kafin wo kashi n ʼya. Wa gye ɓa sun-sun n tuge ɓa ɓei zhi n gye akni n ɓato knayi yim, Wa wuɓa anya mwa begye n kwo ɓei bmiya ɓa kpeye.

^35-36 Nwyesheyi, owo abara ɓa gna wo ge, “Gna aza ɓa lo ezhi ɓiyi ɓa si nyagyi, n tuge nyagyi to lo n bmana ye a gyi m, sukwo nyi bwa ɓe-ɓe nu.”

³⁷ Ama Yesu wa gnaɓa ge, “fye ga ɓa nyagyi,” Ɓa cige, “N kni nyi ya? Ntuge kwo ɓa dnaɓo za mi wa si nyagyi ga za n mwabegye layi.”

³⁸ Yesu wa nyaɓa, “Yi nyagyi shi lo mwa? Fye lo fye kpe ge-nyi.” Ɓa jeze ɓe ɓa gnawo ge, “Bredi lo ngnu atnu n na wyesala yi ngnu aba.”

^39-40 Yesu wa gna aza ge ɓaku sase, safyewyi aza sase zhi shitnu-shitnu, tagyi-tagyi kpe na gbe-gbe.

⁴¹ Wa ku bredi ngnu atnu ho, n wyisala ngnu aba hi Wa kpe wye wushe Wa zhin godiya ntu nyagyi ɓo. Wa gna wa bara bredi n na wyisalayi ɓa gnaza.

⁴² Aza gyi har nubo kwa fuɓa, to ɓa shan mi gyi m.

^43-44 Aza ɓei nyi dubu ngnu atnu (5,000) n ɓa ɓei gyi nyagyi nyi, n na vun a ye awyiwoyi zhi, a ceknu awocei-aba.

⁴⁵ Nsayi Yesu wa gnawo abara ge ɓa lo ʼya ɓa jezelo Basaida Wa kmaɓe daɓa. Wohin woɓa cegni wa gna za mi.

⁴⁶ Ndeye avun wa lo epe wa zhin aduwa.

⁴⁷ Nsukwoyi owo abara yi fi n ʼya, n kpe n ʼla tasin, woi ce tu nkma n Wo gmanyi yi.

⁴⁸ Wa gye ɓa fi n wahala dnagmayi ɓai gye azhin a nuwan dokwo yi, n ʼseyi, Wa zan-zan lo da ɓa tu nuwan ʼshe har Wa ya ɓa diya.

⁴⁹ Ama shi ɓa ɓei gye nyaho kwoi zan-zan lo n ɓa bmayi, ɓa fyaku n dnayi ɓai gye ge nya-subwi nu.

⁵⁰ Ɓa ku gyewo vinya. Wa daɓo ɓai n sagmanyi yi, “Emi nu! Fye to wo dna m!”

⁵¹ Wa lo ʼya daɓa ese kwa ce pyi-pyi-pyi. Ba sase fi n ʼya to ɓai mi ɓedam.

⁵² Har sayi ye, ɓa to ɓei ye kpe Wo ye, du na ɓo awo-woyi n Wo ɓei yi ku zhin nwyeshe yi nyi, ntuge ɓa to ɓei cei pma ɓa ga gaiciya m.

⁵³ Sanu ɓa ɓo kusi Janisarata kni ɓa kpe eya gni n nuwan gbe.

⁵⁴ N wo kakashiyi, aza n ɓa ɓei zhi nabayi, ɓa kpewo ye n sa gmanyi yi.

⁵⁵ Ɓa busi laɓa ɓai gna ʼza ge Yesu laɓe, ɓa ya anyasanyi ku lowo ceyi kpe na pece.

⁵⁶ Esa n Walo a kauye, n na zhi yakwo yi, n na fwa yi, ɓa ku a-nyasan yi lo wo cei na zokwo n na gnikwo bayi, ɓa yi wo wye ge wo fwa ɓa towo ejekpe bwa kawai shi a za ɓei to wo bwa n sun ɓa bwa kagna.