Markus 5 - Alkawali Woiwoyi

Abulutu Ɓa Fi Oza Ce N Wye-Wye Yi

^1-2 Shi ɓa ɓei piya kpe nkma dehi, eza doho nwo ɓei n alijanu yi, wa gmi ɓe nsi n na vingwo, Yesu woi bwa kakashi n eya.

^3-4 Eza deye ɓei zhin woi sase dna na vingwo nu, wo ɓei n kalai ko a la wo pa n na gmai a ku asunkna fi wo n na pita, wa gbe agma ya wa bma asunkna ya, wa lo wo nya. Zaho to ɓo ikoi wa gyi wo shi m.

⁵ N nyipyeyi n sukwoyi vinya, woi zan dna n na vingwo n na pei woi fi aku, woi sa wohin ya n na kuta yi.

⁶ She wo ɓei gye Yesu nkpai, wa busi lo wa ce akwo-kwo shi nwo abye.

^7-8 Yesu wa daɓo n alijanu yi wa gna, “zafun nukwoi gmiya ɓe” Kwa sawyi n kalai, “Yesu, Shekwoyi iko da Nugun, Ho ye ha zhin mi knihi nu a? Ntu Shekwoyi ɓo, to ga mi wahala m.”

⁹ Yesu wa nya wo ge, ayi ho ge na? Alijanu kwa ci ge, “Begye, ntu ge yi mwa begye fi lo n za deye mi.”

¹⁰ Alijanu ɓa gyi Yesu wye ge, wo to tnu nɓai nkpai m.

¹¹ Dna sayi mi, a burutu ho ɓei zhi nmwa begye ɓai gyi anyagyi n pe sepa.

¹² Ɓa gyi wye ge, “Tnu yi na burutu yi mi.”

¹³ Yesu wa ga ɓa gbe. A zafun nukwoyi ɓa kun n za yi mi ɓa lo fyi na burutu yi mi. A burutu yi vinya, ɓa busi shin zhi peyi ɓa kafi ʼla, nuwan shin ɓayi.

¹⁴ A burutu da busi lo a kauye ɓai wu lafiya, aza yi knuɓe ɓai gye n ɓahin yi.

¹⁵ Safyewyi a-za ye-zhi n mwa aba Yesu ɓei gni nyi. Ama shi ɓa ɓei gye zayi sase ma Yesu dna n wohin hankali, ɓa wo dna.

¹⁶ Aza n ɓa ɓei gye ɓo kwo ɓei zhin, ɓa wu lafiya laɓa.

¹⁷ Aza ya Yesu wye-gyi ge, Wo lo wonya Wa faɓa.

¹⁸ Wa je eya lo. Eza wo ɓei na lijanu yi nyi, wa gyi Yesu wye ge wa knulo n Woi.

¹⁹ Yesu wa ciwo ge awo, “Lapyi da ha nugundo ho gna ɓa nya Shekwoyi ku zhin ho, shi wo sun-sun gyei lo jesun.”

²⁰ Wa ya azhi ngnu awo vi (Dikapolis kni) woi gna za aɓo adnagmayi n Yesu wa zhin wo, ca wo aza n mwa.

Aɓo Wo-woyi Kagna Nya

²¹ Sa Yesu ɓela pi ola ya n ʼya yi, aza yezhi n wo aba n mwa n ʼla gbe.

²² Aduwa nyakun tukwoda ɓe, ai yiwo ge Yairus, wa ɓe wa yashi n Yesu abye.

²³ Woi gyi wo wye ge? Wo kawo nyignu gna, “Wola ga fyi, mi gyi Ho wye, ɓe Halo Ho tuwo Ho bwa wa ka gna.”

²⁴ Yesu wa viwo lo, aza viwo na vun.

²⁵ Dna na za nɓa ɓei viwo nyi, nyikwoza ho ɓei dna n nyasan-yi aye awo-cei-aba ami yi zewo ya.

²⁶ Wo ɓo ku wahala sin woi wu agyiwyeya n mwa n na shigbe-da aba, ama to wa kagna m, sai koyi gya bye-abye nu.

²⁷ Wo ɓei ku wo aɓo awo-woyi n Yesu zhin, cenu ɓei zhin wa viwo na vun dna deji, wa towo ʼje bwa.

²⁸ Ntuge wo ɓei zhin nubo fyi wo mi, “N ma towa ʼje bwa kawai, mi ɓa kagna.”

²⁹ Shi wo ɓei to wo ʼje bwa n kusun, wa ze kagna yi, o wami-zeya zan n sayi-sayi yi, waku wonya kpege wola kagna bwa!

³⁰ Yesu wa kpe n sagmanyi ge kagna iko la gmi n Wo, Wa pmi awye shi aza Wa cige, “Nyika to mi jekpe bwa?”

³¹ Owo abara nya Wo ge, “Aza n ɓa sheho kna zhl mwa nyi, Hoi gni Hoi nyaɓo ge nyika to Ho bwa?”

³² Ama Wa ce Wa sha-wye laɓa n ʼna bai Wagye ʼza n wa to Wo bwa.

³³ Nyikwo-za ho, shi wo ɓei gye ɓo kwa zhin wo, wa ɓe n dnayi, woi vin, wa cakwo-kwo shin Wa bye wa gna Wo ɓo wa zhin.

³⁴ Wa gna wo ge, “ho gaiciya ga, kwo la ho kagna, lo ho nya n lafiya yi.”

³⁵ Woi ye gni Woi daɓo n woi atnu-tnu yi ɓa ɓe ɓai kun n Yairus puwa ge esa la diya, owo nyigun lafi, apma to lo Yesu wa shan lom.

³⁶ Ama to Yesu wa gye wo anuwan n ɓa ɓeda yim, waci Yairus ge, “To wo dnam, la gaiciya ga Mi.”

³⁷ Yesu wa kpe a za zhi n bmi to wa ye ge ɓa lo api min; akpe Bitrus, n Yakubu yi, n Yohanna yi.

³⁸ Sanu ɓa ɓei lofi ɓa gye aza fi ɓai cibwi, ɓai ɓewyi, har ɓaku jeje.

³⁹ Wa lo mi, Wa daɓo na zayi, “Knihi nu zhin fyei cibwia? Eɓi to fim, wo wangye nu kawai.”

⁴⁰ Ɓa mawo san wyegbaci nya, ama Wa gnaɓa ge ɓa la kun. Wala ɓiyi ʼya nwo dadayi n Wa barayi ɓa lolo nyakun mi n ʼɓiyi ɓei yadna nyi.

⁴¹ Wa ta bwa shi wo nbwa, wa ci ge, ɓinyikwoi lakala. (Owo aye ɓei nyi awo-cei-aba nu)

⁴² Wa lakala gni-agni, wa ya zan-zan, ce awo owo azamayi.

⁴³ Yesu wa tu ɓa gbe n kala yi ge, ɓa to ye zaho-zahoi wa kpe cem. Wa gna ɓa ge ɓa ga ɓinyikwoyi hi nyagyi.