Markus 10 - Alkawali Woiwoyi

Yesu Woi Dna Aɓo Nya-nya Gbe

¹ Nnavun Wa fa Kafanahum U Wa lo Yahudiya kni n Urdun ʼla yi. Aza a yezhi n mwa shi ɓa zhin ɓa shin zhin, Wa wu ɓa nya shi Wo shin wu.

² A Farisawayi ho aɓe ɓa nya Wo ge, “ho ɓa ye ge a wu mula?” Ɓa ɓei nya Wo lonu ntuge ɓa pyi Wa gam nu.

³ Yesu wa nya ɓage, “Musa ɓo da gena tu mulawu tukwa?”

⁴ Ɓa ci ge, “Wo ɓei gna ge kwo to zhin ɓo nukwoyi num, sai dei za ku wasika mula wu nya ka wa ga wo nyikwo.”

⁵ Yesu wa nya ɓage, “Knihin nu ɓei zhin Musa wa da lonuʼa?” Mi ɓa gna fye nya kwo ɓei zhin wa da lonu. “Ntu fya bugba nukwoyi kala kpe ɓonu.

^6-7 Ama kwoto zhin Shekwoyi zokwo num. Tunyi sapa, Wo ɓei zhin zanu-gbai n nyikwozayi ɓa sase nyalo-nyalo nu n knusun dna mula, ntu cenu eza ɓa fa wo dada n wo ʼya yi,

⁸ Wa nyima wo nyikwo n lonu, ɓa to shan aza gnu aba nu zhin m, ama gmanyi.

⁹ To ʼza gna nyaje n Shekwoyi la cigyidom.”

¹⁰ Nnavun, sanu ɓa ɓei fi Wa bara yi n puwa ho, ɓa je ɓe n ɓeda yi tu mulawu tukwo.

¹¹ “Wa gna ɓa ge sanu ʼza yawo nyikwo wa lado, wo ku anagbai zhin n wa ba.

¹² Nyikwoza ce nwa ya wo ɓa, wa se ʼzado, wo ku anagbai zhin.”

¹³ Nsa doho yi, Anyikwoza ɓe n ɓa ɓiyi n na bai Yesu wa tuba anabarka, Owa bara ɓa nya ɓa ya ge ɓato gna Yesu gna-gna m.

¹⁴ Ama sanu Yesu ɓei gye ɓo ɓa zhin, to ca dawo m, Wa ci ɓa ge, “Fye fa aɓi nawyi ɓa ɓe Ma ba, gama Shekwoyi bemi zhin ɓa nya nu. Fye to nya ɓa yam.

¹⁵ Ɓehin-hin nu n Mi gna fye, eza nwo to ɓe Shekwoyi aba ngye ɓi m, ata ye ge wo lo Wo bemin.”

¹⁶ Nnavun, Wa kpa bwa na ɓihi tukwo Wa tuba anabarka.

¹⁷ Sanu Wo ɓei lakala, ʼza doho wa ɓe woi busi wa cha kwo-kwo shi n Wa bye wa nya Wo ge, “Male Manayi mi ɓa zhin knihin nu ma lo sheʼa?”

¹⁸ Yesu anya wo ge, “Kninu zhin hoi yi Mi Manayiʼa? Shekwoyi gmanyi nu zhin Za manayi.

¹⁹ Ama ɓeda n ha nya Mi nyi, ho kpe a wyidna ye lo nge to wu zam, to zhin anagbayim, to ha wyi vim, to ha ceakatam, to ha gyi za fyim, ha ga ho dada mwa-mwa n ho ʼya yi.”

²⁰ Zahi wa ci ge, “male, mi shi ɓa bwa vinya, mi to bma doho ya n ɓa min.”

²¹ Yesu wa wo yeye dnagmai ho tu wo ɓo, Wa ci wo ge, “Nya gmanyi n hoi celo. Lo ho knu ho nyabwa vinya, ha ca gyiwye ha gna a wyekwoyi, ha so ho nyabwa dna n ʼshe, ha ɓe ha vi Mi.”

²² Owa wyeba shando n sayi-sayi, wa lo wo nya to cei dawom, ntuge wo ɓei zhin nyabwayi dnagmai nu.

²³ Yesu wa shiwo awye shi wo lo, Wa bmiya wye Wa ci Wa bara ge, “Kwo po ɓedna lo nyabwayi wa lo Shekwoyi bemi.”

²⁴ Ca woɓa mwa. Yesu wa je ɓa gna: “Ema ɓi yeyeyi, kwo dnaɓo lo eza nwo bugbai shi n nyabwa ba, wa lo Shekwoyi bemi.

²⁵ Kwo gna dulo n sauci lakumi kwa Idu na ci buawye, aya cige nyabwai wo lo Shekwoyi bemi.”

²⁶ To Wa bara ga ɓedayi gaiciyam, ɓa nya Wo ge, “Ngye nlonu, nyikado nu ɓa shan pwo na nyi ye nto na nyabwai yi nun ma?”

²⁷ Yesu wa shiɓa wye zun, Wa ci ɓa ge, “Ntna Shekwoyi, ko ta wo zhin m. Ama n Shewoyi aba, nyahonyahoi to dna ɓom.”

²⁸ Bitrus wa ya anya yeyi n wo, n woabara jeyi nku ya ntu Wo ɓo wa cige, “Yi ku anya fa vinya n nabai ya vi Ho.”

²⁹ Yesu wa ci ɓa ge, “Wuye Ma gna fye ɓehin-hin eza to lo n wa fa nyaho-nyahoi kwo apyi, owaje, owoamapwi, owoʼya, owo dada, owo aɓi, kwo owo akaya ntu Mi yeye ɓo, har wa gna azaje nabari manayi

³⁰ Nwo ta gwo gyiba abwa tagyim, tu nwo puwa, owo aje, owo amapwi, owo ya, owo aɓi, owo kni, nwahala sin yi. Anya deye vinya ɓa zhin wo nya nu, dna na ʼnyi ye n anyi ɓa ɓe lo nyi, njesun wo ɓa bwa wye-wyei nyalo-nyalo nya.

³¹ Ama nmwa begye na gye ge ɓa zhin aza yakwo nsaiye, ɓa ɓei ku ze aza gbagbayi n bwayi. Aza na gye ge, ɓa to zhin nyaho nu yam, ɓanu ɓei zhin aza yakwo n bwayi.”

Yesu Wa Da Wo Fi Bo

³² Ɓa pmi ɓa lo Urushelima Yesu yi gyi n ɓa bye. Owo abara yi viwo navun, edna ku wan ɓa, Wa lo n ɓai n sepa gmanyi, Wa ya ɓa gna nya n kwo ɓa bwa Wo sanu ɓa si Urushelima.

³³ Wa gna ɓa ge “Esa yi si ɓo, Emi, Kristi, aɓa wan Mi alo n Miyi n Pirist tukwoda ba wa da Mi efyi wa, wa ga Mi n na Romawayi a knu ɓa wu Mi.

³⁴ Ɓa ɓa kpema gye, ɓa kni akni kpe Mi, ɓa gbe Mi ya n ɓa knarufin yi, ɓa wu Mi. Ama n na nyipyei gnu ata avun, Mi ɓa lakala n vingwo.”

³⁵ Yakubu, n Yohana yi, Zabedi aɓi, a ɓe ɓa daɓo Woi san-san ɓa ci Wo ge, “yi ye Ha bmayi zhin.”

^36-37 Yesu wa nya ɓa ge, “Kni do na?” Ɓa ci ge, “Yi cei pmalo yi ye sase viviyi n Hoi n Ho bemi. Zaknayi n Ho bwai-zhe, zaknayi n Ho bwapmi.”

³⁸ Yesu wa ciɓa ge, “Fye takpe nya ye lo nfye nyam. Fye ɓa mi fya sin dna Mi kofi liliyi wahala nya n Mi ye Ma sin nyi? Ko a zhin fye batisma n batisma azhin nya yi nkwo zhin tilas Ma zhin nyi?”

³⁹ Ɓa ci ge, “yi ɓami.” Yesu wa ci ɓa ge, “Fye ɓa sin dna n Mi kofi azhin fye batisma n Mi batisma yi,

⁴⁰ ama Mito iko yi lo Ma kpe fye viviyi n Ma sese bayi m, n Mi bemi m. A ku ko shiri lu zhin.”

⁴¹ Sanu Wo abara je ɓei kpe ɓe ye n Yakubu n, Yohanna yi ɓei nya, ɓa gyi minagyi.

⁴² Yesu wa yiɓa Wa gnaɓa ge, “Fye kpelo ge asu n na ʼza yakwoyi na nyi, ɓa wan za sun,

⁴³ Ama kwo wulo gbo n fya ba. Zanu n wo ye wa zhin zayakwo n fye mi, tile wa zhin fye bara.

⁴⁴ Eza n wo ye wa zhin zayakwo vinya, dole wa zhin aza bara vinya.

⁴⁵ Ntuge kwo Emi hin, Kristi, Mi to ɓe a zhin Mi bauta num, ama Ma bma aza zhin Ma gami wye-wyei ntu na za gni-gni ɓo.”

⁴⁶ Ɓa ku si Jeriko. Ɓai knuya nu n ʼzhi, aza n mwa begye ɓai viɓa. Nyaɓai ho wyebuayi, ai yiwo ge Batimawus (Timawus ɓi) ɓei sase shi n zokwo gbe, Yesu yi diya.

⁴⁷ Sanu Batimawus ɓei wo ge Yesu diya lo, wa ya wyi ɓe, “Yesu, Dawuda Nugun, gye mi sun-sun.”

⁴⁸ Aza ciwo ge, “La ce pyi!” Ama wa gna wyi ɓe-ɓe. “Aya, Dawuda Nugun, gye mi sun-sun!”

⁴⁹ Sanu n Yesu ɓei wo, Wapi gni n zokwo, Wa ci ge Gna wo ge wo ɓe ya. “Laka ha dagma, wo yi ho lo.”

⁵⁰ Batimawus wa she wo je kwokwoyi ya, wa gmigna, wa lo Yesu aba.

⁵¹ Yesu wa nyawo ge, “ho ye Ma zhin ho kninya?” Wyebuayi wa ciwo ge, “Aya, Male, miye ma gye wyeba.”

⁵² Yesu wa ciwo ge, “Oho gaiciya ga la ho kagna.” Nsayi-sayi yi, wyebuayi wa gye wyeba, wa vi Yesu lo n Zokwo yi.