Luka 23 - Alkawali Woiwoyi

Yesu Wada Nwo Knizun-yi

¹ Oɓa vinya n ɓa ɓei yezhi ɓo, nyi ɓa la Yesu ɓa lo n woi n Bilatus aba.

² Ɓa lo ɓai tuwo ɓo, ɓai cige, “Ya wan zeye woi dna aza koche woi gna ɓa ge ɓa to gba esu Roma nya gadun. Njesun woi cige wo zhin Kristi nu. Wato Esu nu.”

³ Bilatus wa nyawo ge, “Ohonu zhin A Yahudiyi esu?” Yesu wa dnaɓo gbe wa cige, “Ho ku da n ho gbei.”

⁴ Nsayi Bilatus wa ci a pirist dnagmai ɓedo n amalemi attaurat nyai ge, “Mi to gye wo n laifi hoi, n kola kunce ma wu wo m.”

⁵ Amma ɓa du-du ɓa gyitu ge, “wo zhin aza lo ɓai kpe akala. Enya n kwa laka n Yahudiya koi lo Galili. Ga shi wo la ɓe ya woi zhin ɓa lo nu.”

⁶ Shi Bilatus ɓei wo lonu wa nya ge, “Zeye gmi n Galili nu?”

⁷ Shewo ɓei wo ge Yesu gmi n ekni nu n Hiridus gyibe tu nkwo nyi, wa I tnu n woi n Hiridus aba. Hiridus ɓo dna n Urushelima n sayi.

⁸ Shi Hiridus ɓei gye Yesu a dawo n mwa, gama wo ɓei ku aɓo wo n mwa n Yesu tukwo har ma woi ye ntuge wa gye Yesu wye, amma to wa min. To wo ɓei gye ge Yesu ɓa zhin aɓo wo-woyi nsayi Bilatus ɓei tnu n woi n wo aba nyi.

⁹ Ntucenu Hiridus wa nya Yesu aɓo n mwabegye amma to Yesu wa dnawo ɓogbe m.

¹⁰ A pirist dnagmai ɓedo n amalemi attaurat nya yi ɓa kun zhi ɓai tu Yesu ɓo n Hiridus aba.

¹¹ Hiridus ɓedo n wo a sojai ɓa zhin Yesu zamba. Ɓa kpewo esuje, nsayi ɓa jezelo n woi n Bilatus aba.

¹² Nwyiyi Bilatus n Hiridus yi ɓaku ze anugundo. Amma ɓaɓei zhin aje Inuwuyi nu kafin n wyi yi.

¹³ Bilatus wa yi a pirist dnagmai zhi ɓedo n a Yahudiyi atukwodayi.

¹⁴ Wa ciɓa ge, “Fya ɓe mi n zaye yi, fyei cige wo dna aza kwoce lo. To mi ku owa dawo fyei gye, amma mi to gye wo n laifi hoi dna n anya, vinya n fya ɓe n cei nyi m.

¹⁵ “Hiridus ce to bwa laifi ho n wo m, gama wola Yesu jezeya gayi, zeye to zhin nyaho nukwoi m, n ko kunce lo a wuwo m.

¹⁶ Mi ga gbe ge a zhin wo bulala nsayi ma yawo wa lo kawai.”

¹⁷ Dna n paska doho-dohoi sa, Bilatus zhin wa lo Purusuna da ho ya gmanyi.

¹⁸ Doji vinya n ɓa ɓei yezhi ɓo nyi ɓa la begye tu ɓa cige, “A wu wo, lo Barabas ya ga yi.”

¹⁹ (Aɓei n Barabas yi dna n purusuna ntu tashin hankali ɓo nu njesun n zawu tukwo.)

²⁰ Bilatus ɓei cei pma ntuge wa fa Yesu. Ntucenu wa gna aza ge ɓa ku ce pi.

²¹ Amma ɓa gna ewyi ɓe-ɓe nu. Ɓa cige, “a zun wo du! A zunwo du!”

²² Bilatus wa ciɓa, ʼbwa tahi ge, “Amma wo ku kni ɓei nu zhiʼa? Mi to gye enya n wa zhin n kunce n fi m. Mi ɓa da a zhin wo bulala a yawo kawai.”

²³ Amma ɓa ɓewyi n gaiciyai ɓai cige a zun Yesu du. Ɓa ku nasara gyi.

²⁴ Har Bilatus wa efi ta-ta zuntu Yesu, shi aza ɓei ye n wu.

²⁵ Wa lo Barabas ya n ɓa ɓei ye nyi, n aɓei wo dna n purusuna ntu tashin hankali ɓo nyi ɓedo n zawu ɓo njesun. Wa la Yesu wa gaɓa ntuge ɓa zhin n woi shi ɓa ncei pma.

²⁶ Ɓa gwo Yesu ɓa lo n cei. Shi ɓa ɓei lo n zokwo ɓa gye zaho ai yi wo ge Simon, woi gmi n ezhi ho ai yi kwo ge Sirene, wo ɓei zhi kauye ho n sayi. Ɓa wan wo ɓa tuwo tile ge wo la Yesu zundu wa vi Yesu ɓe n navun.

²⁷ Doji n mwa ɓei viwo ɓe, Nɓami anyikwo ho ɓei ɓe ɓai cibwi ntu Yesu ɓo.

²⁸ Amma Yesu wa pi gni wa ciɓa ge, “A Urushelimayi anyikwo, fyeto cibwi n mi ɓo m, amma fye cibwi n fyehin tukwo ɓo n fya i yi.

²⁹ Gama esa ɓelo n aza ɓei cige anabarka danu n anyikwozai nɓato ma aɓi m, nɓa to bwa aɓi m, n ɓa to zhin ɓa atna m.

³⁰ Esayi nu n aza ɓei ci ape ge, Fye miya kpe yi, ɓei ci ape ɓi-ɓiyi ge fye bi yi fi.”

³¹ Gama shi ɓa zhin aɓoye pya kpemi omi n mi zhin Shiwan wye-wyei nya, ɓa ɓei kafye zhin-zhin n wuna?

Ala Yesu Zundu

³² Ɓa ku avi ngun aba n nabai ɓa wu ɓa ngnisun n Yesu yi.

³³ Esanu n ɓa ɓei si aba n na yi ge Kwaluwa nyi, ɓa zun Yesu du tu ɓo. Ɓa ku avi yi ngun aba, ɓa zun ɓa du gmanyi n wo bwaizhe gmanyi n wo bwapmi bwa.

³⁴ Yesu wa cige, “Dada, zhin ɓa gafara gama ɓata kpe oɓoye lo n ɓa zhin m.” Ɓa gna owo aje n kuriya yi.

³⁵ Aza zhi ɓo ɓai shi wo awye. A Yahudiyi yi tukwoda ɓai kpewo agye ɓai cige, Wo gni aza, to, wo gni ewohin tukwo mana, ngye wonu zhin Masifu n Shekwoyi wa tnu n woi nyi.

³⁶ A soja n ɓahin ɓa kpewo agye. Ɓa ɓe ɓa gawo anab nuwan mamayi.

³⁷ Ɓa cige, “Gni ohohin ngye honu zhin Kristi a Yahudiyi esu.”

³⁸ Rubutu ɓei ka kpe nwo zundu ge “ayahudiyi esu nu nyi.”

³⁹ Evi gmanyi n na ɓei zunwo du ngnisun n Yesu nyi, wa ci wo ge, “Ohonu to zhin Masifu m? To, gni hohin tukwo n gnisun nyi mana.”

⁴⁰ Amma oza bayi wa ci eviyi ge, “Haba, emi zado. Hota wo Shekwoyi dna m? Yi gnifilo n ta-ta gmanyi nu.

⁴¹ Amma eyi tat-ta wulo dai-dai, gma yi gwo eyi lada nu bisaga enya n ya zhin. Amma owoi da to zhin laifi ho m.”

⁴² Nsayi wa ci Yesu ge, “Yesu, pami ɓo dna n ho ebe mi.”

⁴³ Yesu wa ciwo ge, “Ma gnaho gaiciya, Nnaiye, ho kunsun lo n mi-i n Paradisi.”

⁴⁴ Esanu nyipyei ɓei la gun atukwo to kwa shan buzangna ga m. Wyegma kwa dna duruum har nyipyeyi kwa bmaya ngye sunkna ngu ata.

⁴⁵ Labule n kwo ɓei gyi n aduwa nyakun nyi, kwa ngajeya ngun aba.

⁴⁶ Yesu wa la begyetu wa cige, “Dada, n ho akun nu mi ga mi wye-wyeyi.” Shi wo ɓei zoda lonu wa fi.

⁴⁷ Asoja tukwoda ho n wo ɓei gni ɓo, shi wo ɓei gy lo nu wa ci Shekwoyi wa cige, “Lalle, zaye ɓei zhin oza manayi nu.”

⁴⁸ Shi aza nɓa ɓei yezhi ɓo ɓai gye nya nkwa zhin vinya, ɓa jeze lo api n bugba wun yi.

⁴⁹ Aza n ɓa ɓei kpe Yesu ye nyi, ɓedo n Anyikwozai n ɓa ɓei kun n Galili ɓai viwo nyi, ɓa ku zhi n kpai ɓai gye aɓoye vinya.

^50-51 To, zaho ɓei nyi ai yiwo ge Yusufu, woi gmi n Ezhi ho ai yikwo ge Arimatiya. Wo ɓei zhin oza manayi nu n hankali yi sosai woi pmi Shekwoyi ebemi, ɓe-be ɓo. Ko shiko nyi wo ɓei dna n aza n ɓa ɓei zhin shawara ge a wu Yesu nyi wo to ɓei vi n ɓanya m.

⁵² Yusufu yi wa lo Bilatus aba wa nya ge, a fawo wa la Yesu nayi.

⁵³ Nsayi wa shin wo shi, wa kmi wo dna n aje manayi walo wa yawodna n vingwo n a ɓei ji kwo nkuta dnagmai ho. Zaho-zahoi toɓei shin ampanyi zhin n vingwo yi m.

⁵⁴ Jumawyi nu ɓei gni nwyi Esa la wo vi-vi n a Yahudiyi sun-sun nyipyei ɓa ɓe n cei wato Satiwyi nu. (Ɓa ɓei zhin ɓai ya oɓa nyipyei n wyeshei nu.)

⁵⁵ Anyikwoza n ɓa ɓei kun ngnisun n Yesu n Galili nyi, ɓalo ngnisun n Yusufu yi, ɓa gye vingwo yi njesun ɓa gye shi wo ɓei ya Yesu dna n wu.

⁵⁶ Nsayi azaho ɓa jezelo api ɓa zhin shiri n emi asinda nyai ntu owo nayi ɓo. Nsatiwyi ɓaku sun shi owa ɓai zuntuba nwu. Wato Musa owa nu.