Luka 22 - Alkawali Woiwoyi

Ai Pa Yesu Kulu

¹ To esa wo vi ntu a Yahudiyi agmada ɓo (nɓa zhin ɓai pa esa n Shekwoyi ɓei knu n ɓai n Masar nyi.) A yikwo ge Idin Paska. Esanu n ɓa ɓei zhin ɓai gyi bredi n koto n yist nyi m.

² Sai pirist dnagmai ɓedo a Yahudiyi malemi ɓa zhin atna ntuge ɓa wu wo, amma ɓa ɓei zhin ɓai wo aza dna.

³ Nsayi Shetam wa lo Yahuda Iskariyoti bugba. Wo ɓei zhin Yesu bara nu.

⁴ Wa lo wa daɓo n prist dnagmai hoi ɓedo n zai n wo zhin wa gu aduwa nyakun nyi, she ɓa ɓa zhin ɓa wan Yesu nwu.

⁵ A daɓa n mwa har ɓaku ye ntuge ɓa gawo agyiwye.

⁶ Yahuda kwa wa ye n agyiwye n ɓa ɓe tuwo nyi. Tunyi sayi wa la ɓa woi dna esa manayi wye n wo ɓa ga Yesu nɓa kun n tna aza kpei.

⁷ Ewyi ka ɓe n ɓa zhin agmada n Bredi ntna yist nya nyi, esayi ɓa zhin ɓa wu a kugya ntu paska yi ɓo.

⁸ Yesu wa tnu Birtus ɓedo n Yohanna yi nge ɓalo ɓo zhin shiri n paska yi ntuge ɓa gyi.

⁹ Ɓa nya wo ge, “Ho cei pma yi zhin ko shiri n kni bwai a?”

¹⁰ Wa ciɓa ge shi fye lofi n zhimi fye ɓo gye ozaho n nuwan shakun shi. Fye viwolo n puwa n wo ɓa lo dna nyi.

¹¹ Fye gna puwa da ge, ma cige wo wufye nyakun n miɓa ɓe ntuge ma gyi paska ɓedo n mi abarai nyi.

¹² Wo ɓa wu fye nyakun dotu ho. To fye zhin shiri ɓo nu.

¹³ Shi ɓa ɓei lo ɓa gye nyaho-nyahoi dai-dai shi Yesu ɓei gna ɓa n wu nyi. Ɓa zhin paska shiri ɓo.

Nyagyi Kmamnayi

¹⁴ Shi ɓa ɓei ku zo esa si n ɓa ɓa gyi paska n cei. Yesu wa sase n wo aba ɓedo n wo abarai.

¹⁵ Wa ciɓa ge, “Awomi pua lo n mwa n nabai ma gyi paska nyagyi ye n fyei, kafin mi gye azhin.

¹⁶ Gama ma gnafye gaiciya mita je kwo gyi n fyei m, sai dai n eshe esanu n kwo ɓei nu daidai nyi.”

¹⁷ Nsayi Yesu wala kap, wato aba n anab nuwan ɓei fi nyi, wa zhin godiya ga Shekwoyi wa cige, “Fye gwo fya sin fyei ce ga je.

¹⁸ Gama ma gnafye mita shan anab nuwan ye sin m, Sai Shekwoyi ebemi la ɓe.”

¹⁹ Nsa yi wa la bredi wa zhin Shekwoyi godiya wa gnakwo ajeya wa gaɓa wa cige, “Deye, kwo nu zhin omi nayi (n Shekwoyi n cei ga ntu fyeɓo nyi.) Fye zhin ko lonu ci-ci fyei pa mi ɓo.”

²⁰ Njesun lonu wa gaɓa kap ɓai ku nyagyi gyi wa cige, “Kap ye n kohin kwo nu zhin Shekwoyi alkawali woi-woi n wo kwoi tuze n mi ami n a cei zeya ntu fye ɓo nyi.)

²¹ Amma fye wo ɓoho oza n wo ɓa gami n a Yahudiyi akun nyi wo tulo woi gyi nyagyi n gnisun n miyi.

²² Gama oza Nugun ɓa fi shi Shekwoyi n cei katu lo, amma ayya oza yi n wo ɓa gami n ɓa akun nyi.”

²³ Nsayi ɓa zhi cei wo ɓa ko nyikadonu n ɓa woi ye wa zhin ɓo lo nu.

²⁴ Esanu n ɓa ɓei ku paska zo zhin ɓai zhi n abaho, Yesu abara ɓa naɓo naje yi, ko nyikadonu ɓo zhin oza dnagmai n (Shekwoyi ebe mi).

²⁵ Yesu wa ciɓa ge, “Asu anyi nya ɓa n ikoi lo tu n oɓa aza tukwo, Aza n ɓa gyibe kwa a yiɓa ge aza nugun-do.

²⁶ Amma deye to wulo lonu n fyei m. Amma oza n wo zhin zad-nagmai lo nfye, to, wu ngye oɓi nawyi. Oza n wo zhin gnabyelo kwa, to, wola ze ngye fyenu.

²⁷ Nyikadonu du loʼa? Oza n wo saseshi woi gyi nyagyi nyi, ko oza n wo ga nyagyi ga-ga nyiʼa? Ai ozanu n wo sase shi nyi. Amma mi dna n fya tantasi ngye oza nu n wo ku nyagyi ga nyi.

²⁸ Fye ku kunsun n mi vinya n mi anyipyei jaraba nya.

²⁹ Njesun shi omi dada la iko gami nge mi gyibe nyi, to miɓa zhin alkawali ye n fyei.

³⁰ Fye ɓei gyi fyei sin dna n omi ebemi. Fye ɓei kpe n abegyi ashinkpegye fyei da a Islailayi vinya owa.

³¹ “N sa dohoi Yesu wa ci Siman ge, ‘Siman, Siman, kna tnubua ha wo shetam la izini gwo, ntuge wa zhin fye jaraba nfye vinya shi fanuyi zhin wa kun osin ya n awyi-byegye nyi.

³² Amma miku adduwa zhin ga ho, Siman n nabai n ho gaiciyaga ta shan-shan m. Amma esanu ho ɓei jezeɓe dami, to, mi cei pma hoi mi oho azaje zhi.’ ”

³³ Bitrus wa cige, “Dagayi, mi la ye ntuge malo purusuna ngnisun n hoi, har ma ma fi ngnisun n hoi.”

Ala Yesu Wan

³⁴ Amma Yesu wa ciwo ge, “Bitrus, Pise nugba ta cheku n naiye m, Sai dai hola mi aɓo na har abwa ngun ata.”

³⁵ Nsayi Yesu wa ciɓa ge, “Esanu n mi ɓei tnu n fyei ntna agyiwye ko pwakun, ko kwa ntna abuadanyi, fye ɓei ku gyi nyaho san a?” Ɓa cige, “awo.”

³⁶ Yesu wa ciɓa ge, “To, nsaiye dai zaho-zahoi n wo n agyiwyei lo kwo kwa apwakun, wola la. Oza n wo to n ebeyakwoi lo m, to, wo kun owo eje ntuge wa si, ebeyakwo.

³⁷ Gama ma gnafye, dole ɓeda kwa nu n acei kafi n Littafi ge, Aɓei ɓewo do n alaifi dayi. Gama ɓeda n kwo kafi n mi tukwo nyi kola wo vi-vi kwa nu.”

³⁸ Owo abara ɓa ciwo ge, “To ai yi n abeyakwoi shi nyi ngun aba.” Yesu wa cige ɓaku kun lonu.

³⁹ Yesu wa fa zhimi shi wo ɓei zhin woi zhin ci-ci, wa lo Zaitun pe. Owo abara ɓa kun lo ngnisun n woi.

⁴⁰ Esanu wo ɓei si aba n wo zhin wa shi nyi wa ciɓa ge, “Fye zhin aduwa n nabai to fya kayafi n jaraba m.”

⁴¹ Nsayi wa lo n kpai fyewyi wa ce akwo-kwo, wa zhin aduwa wacige,

⁴² “Dada, n haye fa wahala ye kwa dumi ya, to kwa ɓe ma ba m. Amma to vi omi ɓemwi sai-dai oho nya.”

⁴³ Malaika gmi n she nsayi wa ɓe wa mi wo gni;

⁴⁴ Dna n wahalayi Yesu wa zhin aduwa n gaiciya, har amisa ɓa kpe ngye ami kolo kawai, ɓai kunya zhi nkni.

⁴⁵ Esanu n wo ɓei laka n aduwa zhin ɓa wa lo wa gye owo abara zhi ɓai wan gye. Ai ku ɓa ɓe ce n wahalai.

⁴⁶ Wa nyaɓa ge, “Kni nu zhin fyei wan gyeʼa? Fye kukala fya zhin aduwa n nabai to fya kayafi n jara ba m.”

⁴⁷ Esanu Yesu ɓei ye gni wo daɓo, aza n mwa ɓa ɓe, Yahuda Yesu bara yi owo nu ɓei gyi ɓe nabye, wa ɓe wa zhin Yesu sumba, ngye nugun-do.

⁴⁸ Yesu wa ci ge, “Yahuda ho ga Oza Nugun n sumbai nu?”

⁴⁹ Amma Yesu abara n ɓaɓei zhi n woi nyi, ɓai gye enya nkwoye kwa zhin ɓa, “Dagayi, yi zhin ampanyi n abeyakwoi ya ce ɓa ya?”

⁵⁰ Zaknayi nɓa mi wa zun prist dnagmayi fyenu tnubua bwaizhe nya ya.

⁵¹ Amma Yesu wa ciwo ge, “To zhin aɓoye pya m.” Wa to zayi tnubua bwa kwa wo kagna.

⁵² Nsayi Yesu wa ci a prist dnagmai, ɓedo n adan-doka aduwa nyakun nya yi, har ɓedo n atukwodai n ɓa ɓei ɓe ntuge ɓa wan wo nyi ge, “fye ɓe zhi n abeyakwoi n abusi shi ge na? Fye ye fya wan evi nu?

⁵³ Ai mi ɓei gnisun n fyei n aduwa nyakun fyegyi-fyegyi, amma to fya wan mi m. Amma deye kwonu zhin efye sa, esanu n shetan iko zhin tnu-tnu lo.”

Bitrus Wa Na Yesu Yekpa Bo

⁵⁴ Nsayi ɓa wan Yesu ɓa lo n woi n pirist dnagmai puwa. Bitrus wa viwo n kpai.

⁵⁵ Ena ɓei fin zhi n puwayi a tan-tansin, ɓai sase zhi ɓai wye. Bitrus wa ɓe wa sase shi n gnisun n ɓai.

⁵⁶ Esanu oɓi nyikoi ho n wo zhin tnu-tnu n puwa yi, ɓei gye Bitrus shi n ena ba. Wa shi Bitrus awye zu uuu wa cige, “Ai zeye kunsun lo n woi nu.”

⁵⁷ Amma Bitrus wa naɓo wa cige, “Aʼa mita kpewo ye lo m.”

⁵⁸ Esa fyewyi ozaho wa gye Bitrus njesun wa ciwo ge, “Ai ho zhin gmanyi nu n gnisun n ɓai.” Amma Bitrus wa cige, “Sam.”

⁵⁹ Ngye awa-gmanyi avun, zaho wa gyitu, woi cige, “Ai ata mi a naɓo ge zeye kunsun lo n woi ntuge wo zhin Galili yi zanu.”

⁶⁰ Amma Bitrus wa cige, “Kai ozaye, mita kpe oɓoye lo n ho gni hoi da m, Sam, sam.” Esanu wo ɓei gni woi daɓo n cei nyi, pise-nugba kwa cekwu.

⁶¹ Yesu wa shi Bitrus awye, nsayi Bitrus wa pa Dagayi ɓeda shi wo ɓei da ge, “Kafin pise kwo cheku n naiye ho ɓei na ma ɓo har abwa ngun ata.”

⁶² Bitrus wa gmiya, wa cibwi n wyei kana.

⁶³ Aza n ɓa ɓei zhi ɓai gu Yesu nyi, ɓa kpe wo agye, ɓa luwo.

⁶⁴ Ɓa guwo awye ɓa luwo, ɓa ciwo ge, “Nyikado nu na lu hoʼa?”

⁶⁵ Har ɓa gnawo aɓeda nukwoyi laɓa.

⁶⁶ Shi of ye ɓei gyi, a prist dnagmai ɓedo n amalami attaurat nyai ɓedo n atukwodayi ɓa yezhi a ɓe n Yesu n ɓa tan-tasin.

⁶⁷ Ɓa nyawo ge, “Gna yi, ho zhin Masifu nu?” Wa ciɓa ge, N ma gnafye, fyeta gami gaiciya m.

⁶⁸ Nma nyafye ɓeda fyeta gami amsa m.

⁶⁹ Amma daga nsaiye, Oza N ugun ɓa sase tu n Shekwoyi bwai-zhe-bwa iko da.

⁷⁰ Ɓa nyawo n oɓogmanyi ge, “Ho zhin Shekwoyi nugun nu?” Wa dnaoɓgbe wa cige, “Fyeku da ge mi zhin wo nu.”

⁷¹ Nsayi ɓa cige, “Ai yita shan seida ho ye lo m. Gama yiku wo n yi a tnubuai woi da n wo gbei. Yiku wo n yi a tnubuai woi da n wo gbei.”