Luka 21 - Alkawali Woiwoyi

¹ Nsayi Yesu wa shi awye wa gye agyi-wye da zhi ɓai zhin sadaka n adduwa nyakun.

² Njesun wa gye nyigbayi ho n wo to ɓei n nyahoi m, woi ya a sisin-kwobo fi ngun aba.

³ Yesu wa cige, “Ma gnafye, Nyigbayi ye n wo to n nyahoi lo nyi m, wo ku agyiwye ga n du Arzllida ye.

⁴ Gama azaye n ɓa ɓei ga sadaka ɓai kni-kni ɓai ceyafi nu. Amma owoi da wo ga nyaho-nyahoi vinya n wo cei lo nu.”

⁵ Azaho n wo abara mi ɓa zhi ɓai da shi adduwa nyakun ɓei bmiya gni n wu. Nkwo akutayi kpaje daidai ɓedo n nyigun yi n kwo ɓei zhin kpe n nyakun pa. Yesu wa ciɓa ge,

⁶ “Duk anyaye n fye gye vinya nyi esa ɓelo n kuta gmanyi to ɓei ce tu n do m. A ɓei la ɓa kmaya vinya n na je.”

⁷ Nsayi ɓa nyawo ge, “Malami kwo ɓei zhin lonu n knisayi ya? Kni nu ɓei zhin n nabai yi kpe ge esa lasi nkoɓo zhin lo nuʼa?”

⁸ Yesu wa ci ɓa ge, “Fye zhin peceiye, Fye to ku ze aza gbeloi, gama aza nmwa ɓa ɓe dna n mi ye, ɓai cige eminu zhin Kristi. Esa lasi, amma fyeto vi ɓa m.

⁹ Fye to wo dna esanu fya wo ge a sun akun lo, ko kwa ai shan asu do. Gama ko zhin dole nu aɓoye pya ɓa zhin kpa, amma kwo to wu ge esa kmaknayi la ga m.”

¹⁰ Wa godiya wa ciɓa ge, “Akni gbo-gbo ɓei sunkun n ɓa jei, Asu ɓei kun kpe aje.

¹¹ A ɓei woge ekni shan-shan lo laɓa, koi saya koi wu aza, mikun ɓei la lakpe ɓedo n anyasan yi gbo-gbo, fye ɓei gye aɓo nukwoyi ɓai ga atuze n she.

¹² “Amma kafin anyagye ɓa zhin a ɓei wan fye, ai zhin fye zamba, ai lo n fyei n na aduwa nyakun ntuge a dafye owa, ai gufye fi n purusuna, ai lo n fyei n asu abye gbo-gbo ntu mi ɓo.

¹³ Nsayi kwa okwonu ɓe zhin ofye sa, fyei da nabari manayi ye.

¹⁴ Fye ku shiri zhin esa ye nyi to fyei sa aɓo n amsai n fye ɓa gna ɓa m.

¹⁵ Ntuge mi ɓei ga fye ɓeda n ɓeyekpe yi nfya nuwuyi to ɓei mi ɓai na ofye ɓeda aɓo m.

¹⁶ Ofya dada, nfya dnagmai, n fya zai, n fya nugundo yi, ɓa ɓei gafye n tukwoda aba har ɓo wu azaho n fye.

¹⁷ Zaho-zahoi ɓei la ze ofye nuwuyi ntu mi ɓo.

¹⁸ Amma tukwoyi gmanyi nfye tukwo to ɓei kaya kwa bwi m.

¹⁹ “Fye ku zhi dai-dai ntuge fye ɓei gni fyehin n lonu nu.

²⁰ “Esanu fye ɓei gye Urushelima shekna gni n na soja yi, to, fye ɓei kpe ge esa la si a la kwo ya.

²¹ To aza nɓa fi n Yahudiya kwa ɓo busi lo ape. Aza nɓa filo n zhimi kwa ɓo kun ya. Aza n ɓa lo n fwa to ɓo zhi api m.

²² Gama anyipyei ye ɓanu zhin anyipye yi ta-ta nya, n nabai lit-tafi ɓeda kwa nu.

²³ Ayya n anyikwo aba nɓa zhi lo n nuboyi ɓedo n aɓiya dai n ɓa na aɓi shilo nakun. Esa nukwoi ɓa ɓe da ekni ye. Shekwoyi minagyi ɓei tu n aza.

²⁴ Aɓei wu azaho n abeyakwoyi. Aɓei lo n azahoi n knido ɓaku ze oɓa fyenu. Aza nɓa ta kpe Shekwoyi ye m, ɓa ɓei zhin Urushelima chaka chaka har oɓa sa kwa nu.

²⁵ “Aɓei gye tuze nyipyei n apyai har du na kpasu yi. Dna n anyi akni vinya ɓei zhi ɓai wo dna laɓa, ɓai wo aɓeci dna n ko kun n ɓela nyi.

²⁶ Aza ɓei zunfi laɓa, shi ɓa zhi ɓai pmi nya nkwo ɓelo n nabye, gama eshe to ɓei shan sun n kwohin wan shi m.

²⁷ N anya deye avun vinya nsayi oza Nugun wato Kristi wo ɓe dna n anyi n iko yi.

²⁸ “Esanu nfya gye aɓoye ɓai zhin, to, fya ku zhi n shiri zhin sosai ntuge ofye gni-gni la wo vi-vi yi.”

²⁹ Nsayi Yesu wa gnaɓa misali ye wa cige, “Fye pa shinwan ɓo n na yikwo ge gbayi nyi, ɓedo n ashiriwan aje yi.

³⁰ “Esanu nfya gye ɓai ci afintolo, wa gu aduwa nyakun nyi, shi.

³¹ To kwo wu lonu she fye ɓei gye aɓoye vinya ɓai zhin, to, fye ɓei kpe ge Shekwoyi bemi kola ga ɓe.

³² “Fye pa ge anya ye vinya ɓa zhin kafin aza nɓa fi n anyi ye nyi ɓa fi vinya.

³³ Eshe ɓedo n kni ɓa ɓa duya, amma omi ɓeda kwo ta duya m kpe-kpe.

³⁴ “Fye zhin peceiye, Fye to fa agmada n jesin yi har ɓedo n damuwa anyi nya ɓa ku fye gnagna m, kada nyipye yi ɓei ɓe to fyei dna ce m.

³⁵ Gama kwo ɓei ɓe shi agam zhin kwa wan za nyi nu, koye ɓe da aza n anyi ye.

³⁶ Fye zhin peceiye, fyei zhin aduwa n nabai n fye ɓa bwa akala fyei kunya n aɓoye vinya n lafiya yi. N nabai fye zhi n oza Nugun aba dai-dai.”

³⁷ Yesu ɓe zo owo anyipyei kmaknayi lonu woi wunya dna aduwa nyakun. Esanu wyeshe a she wo ɓei zhin wa gmiya wa lo Zaitun pe, har labmi.

³⁸ Aza kwa ɓalo haikali n labmi-labmi ntuge ɓa wo owo ɓeda.