Luka 19 - Alkawali Woiwoyi

Lada Ɓemanayi Zhin Nya

¹ Yesu kwa wa godiya lo Jeriko.

² Esanu wo ɓei diya lo ozaho, gadu gwoyi oɓa su ai yiwo ge Zaka. Wo ɓei zhin agyiwye da nu sosai.

³ Woi cei pma ntuge a gye Yesu wye. Amma wo ɓei bwa sun kpe-kpegye nu to wa mi wa gye wo wye m, ntuge aza ɓei mwabegye.

⁴ Ntuce nu wa busi lo n aza bye, wa gun gbayi shinwan ho ntu ge wa gye Yesu wye, gama Yesu ɓei vi zokwo yi nu.

⁵ Esanu Yesu ɓei si shinwan yi aba, wa kpawye wu n she wa gye Zaka tu wa ciwo ge, “Zaka, kashi ɓe n pye-pye gama n ɓa dna nho puwa nu naiye.”

⁶ Zaka kwa wa kashi n pye-pye wa zhin Yesu amabe. Ɓa lo owo puwa.

⁷ Shi aza ɓei gye lo nu ɓa laɓa ɓai da gnunu-gnunu ɓai cige, “Ai zaye du azhiɓeyi n alaifida puwa.”

⁸ Zaka wa lakala gni wa ci Dagayi ge, “Dna emi nyabwa vinya miɓa la tokunyi ma ga aza n ɓato n nyahoi m. Ngye mila zaho-zahoyi gyifi kwa, miɓa gbawo ta har abwa ngun anyi.”

⁹ Yesu wa ciwo ge, “Gni-gni la ɓe puwaye naiye, gama zeye zhin Ibrahim Yawyi nu ce.

¹⁰ Gama oza Nugun wato Kristi waɓe ntuge wa zan abwi-bwiyi nu shin wa gɓnia njesun.”

Koonci N Zinariya Agyiwye Yi

¹¹ Esanu aza ɓei zhi ɓai wo Yesu ɓeda wa gaɓa misali ye. Wo ɓei wo vivi n Urushelima yi aza zhi ɓai gye ge Shekwoyi ebemi la gaɓe nu.

¹² Nsayi wa ciɓa ge, “Arzikida ho ɓei nyi n wo ɓei lo ezhi ho n kpai ntuge wo gyibe wo zhi.

¹³ Kafin wo lo kwa wa yi owo abara ngun awo, wa ga zaho-zahoi agyiwye, wato ngye ₦1,332 wa ciɓa ge, zaho-zahoi lo wo gni gniko n agyiwye yei, n nabai wa gye gyiba n wo ɓa bwa.

¹⁴ Amma shi wo ɓei lo ezhi yi to aza ye wo m. Ɓa kun aza ya ɓa cige, ‘Yi to cei pma lo zeye wa gyi be tu n-yi tukwo m.’

¹⁵ “Esanu n wo ɓei jeze zhi, wa yi owa abara yi zhi n wo ɓei gaɓa agyiwye nyi, ntuge wa kpe gyiba ye n ɓa ku bwa.

¹⁶ “Oza kmisunyi wa ɓe wa cige, miku gyiba gyi har n sun ngye nya ha gami nyi abwa ngun owo.

¹⁷ “Maigida ciwo ge gezhiya nhoi, ho zhin fyenu manayi nu. Shi kwa nyi ho ku gaiciya zhin n nya fyewyi ye, miɓa gaho begyi tu n azhi awa tukwo.

¹⁸ “Oza bayi wa ɓe wacige miku gyiba gyi har n sun ngye nya ha ga mi nyi abwa ngun atnu.

¹⁹ “Maigida kwa wa ci fyenu ye ge, ho ɓa gyi be tu azhin ngun atnu tukwo.

²⁰ “Ozaho wa ɓe wa cige, oho agyiwye shin nyi. Mi ɓei lo ma kwo so dna n shakun.

²¹ Gama mi ɓei wodna ntuge oho hali dnaɓo. Ho zhin ha la enya nkwoto zhin oho nya m. Ho zhin ha do n aba ho to ɓei bye m.

²² Maigida ci wo ge ho zhin fyenu banza nya nu, Oho ɓeda nu a wu ho. Ho kpe lo ge emi hali ɓo dnaɓo, mi la nya nkwo to zhin emi nya m, mi do aba n mi to bye m.

²³ To, kni nu na zhin to ha ya emi agyiwye fi n banki, n nabai esanu n ma zhi n cei mi gwo n dutun ma?

²⁴ Nsayi wa gna aza nɓa ɓei zhi ɓo nyi ge, fye gwo agyiwye ye n wo cei shi nyi, fya ga oza n wo cei lo ngun awo nyi.

²⁵ “Ɓa ciwo ge, Dagayi, ai wo ceilo ngun awo.

²⁶ “Amma wa ciɓa ge mɓa gnafye, ozaho-zahoi n wo n cei lo, to, aɓa ɓewo ɓe-ɓe nu. Amma oza n wo to n cei lo m, ko odo n wo cei bwasun lo ciwyi nyi ma a ɓei la kwo gwo wo.

²⁷ To, emi anuwuyi ye nɓa to cei pma ge ma gyibe tu nɓa tukwo nyi m, fye ɓe n ɓai fya wu ɓa zhiya.”

Vivi N Urushelima Yi

²⁸ She Yesu ɓei zo misali ye da wa go duya lo Urushelima.

²⁹ Shi wo ɓei wo vi-vi n Baitafaji ɓedo n Baitanya azhi ho n ɓa zhi vi-vi n epe hoi ai yi kwo ge Zaitun wa tnu owo abara ngun aba n wa bye.

³⁰ Wa ciɓa ge, “Fye lo ezhi ye n kwo zhi n fya bye nyi, fye ɓo gye jaki ɓi ho gniɓo n ozaho-zaho to shin kwo gun, fya loko ɓe n cei.

³¹ N ozaho-zahoi nwa nya fye ɓo ge kwo zhin wuna fyei lokwo a? Fya ciwo ge, ‘Dagayi n kwo ɓoyi pma lo.’ ”

³² Abara yi ɓalo ɓa gye nyaho-nyahoi vinya shi Yesu ɓei gnaɓa nyi.

³³ Shi ɓa ɓei lo jaki yi ya, anyada nyaɓa ge, “Kninu zhin fyei lo kwo a?”

³⁴ Ɓa cige, “Dagayi nu n kwo ɓei pma.”

³⁵ Ɓa lo Yesu n Jaki yi. Nsayi ɓa zhi ko sildi n ɓa aje yi, ɓa gun Yesu tu n kwo.

³⁶ Shi wo ɓei gun kwo ɓe, ɓa kma oɓa je ɓai tazhi n kni.

³⁷ Shi wo ɓei wu vi-viyi n Urushelima yi n zokwo, nkwo lo Zaitun pe nyi, aza nɓa ɓei viwo ɓe vinya ɓa la ɓai gode n Shekwoyi ɓai ga mwa-mwa bmana-bmana ntu aɓo wo-woi ɓo vinya n ɓa ɓei gye nyi.

³⁸ Ɓai cige, “Shekwoyi wo tu esu ye anabarka n wo ɓe dna n Dagayi eye nyi. Bugbafu lo n she ɓedo n mwa-mwai n Shekwoyi aba.”

³⁹ Nsayi A farisiyi ho ɓa daɓo n Yesu yi ɓa cige, “Malam, gna oha zeye n ɓa nyi nge ɓaku ce pi.”

⁴⁰ Yesu kwa wa ciɓa ge, “Mɓa gnafye, n a zaye ɓa ce pi akutaye ɓa lamitu nsa.”

⁴¹ Yesu kwa wa ɓe vi-viyi n Urushelima yi. Esa nu wo ɓei gye ko wa cibwi kpe kwo.

⁴² Wa cige, “Bugbafu nyalo-nyalo nya ɓei la wo vi-viyi nfyei, ammato fya ye ko m. N saiye kwa esa la lu diya.

⁴³ Esa ɓelo esanu ofye anuwuyi ɓei ye kpe n fye ganuwa ɓei she fye kna ɓai gufye fi n mi.

⁴⁴ Ɓa ɓei vi fyeya du nfya ɓi ɓe, nɓa fi nfye mi nyi. Ofya nuwuyi to ɓei fa kuta gmanyi ganuwa nya kwa cetu n do m. Gama fye to ɓei zhin ampani n gni-gni n Shekwoyi ɓei gafye nyi m.”

Yesu Dna Nna Duwa-Nyakun

⁴⁵ Yesu kwa wa lodna n aduwa nyakun wa nya aza ya n ɓa ɓei fi ɓai kun anya fi ɓo nyi.

⁴⁶ Wa ciɓa ge, “Akafilo n littafi ge aɓa yi emi puwa ge aduwa nyakun. Amma fye la kwo ze aba n avi bwifi.”

⁴⁷ Yesu kwa wawu ɓa nya dna n aduwa nyakun fyegyi-fyegyi. A prist dnagmayi kwa ɓedo n amalemi a Yahudawa nyai ɓedo n na tukwoda yi ɓeye ntuge ɓa wu wo.

⁴⁸ Amma to ɓa kpe shi ɓa ɓa zhin-zhin n wu m, ntuge aza ɓei kna owo ɓeda tnubua sosai, har to ɓai ye ge owo ɓeda gmanyi kwo zun ɓa tnubua gnana m.