Luka 14 - Alkawali Woiwoyi

^1-2 Nwyihoi n Satiwyi woi dna n Ayahudiyi zadnagmayi puwa a Farisiyi zhi ɓai shi wa wye, ɓa gye kwo wa ka za gna n wo ɓo dna n kpo-kpo nyasan yi nyi.

³ Yesu kwa wa ciɓa ge, “Owa ku da ge a kaza gna n Satiwyi ko kwo to da ma?”

⁴ To ɓa dna wo ɓe gbe m. Nsayi Yesu wa shi nyasayi n bwa wa kawo gna wa ciwo ge wo lo.

⁵ Nsayi wa je ɓa nya ge, “Nyika lo n fye n wo ta zhin tnu-tnu n Satiwyi ma?”

⁶ To ɓa dna wo ɓe gbe m.

Fye To Zan Mwa-Mwa Shin M

⁷ Sanu wo ɓei gye aza ye ɓa sase kpe n aba dnagmai n anyagyi ʼba wa gaɓa shawara ye.

⁸ “N ʼza yi fye na mula ba, ko to bmiya lo fya sase n aba nɓa gna bmiya m. Ntuge n za ɓe nwo du ho,

⁹ to wo ɓei shan ho aba wo tu zayi. Oho kwa hoi lo buzu-buzu n vinyi-kwoyi.

¹⁰ “Amma ko bmiya lo n ya ɓe dina ba ha kni akujera nukwoyi ha sase. Sanu mula ɓa gye ho tu lo nu, sai wa ɓe wa gaho akujera manayi. To nsayi nu n ho ɓei lo n mwa-mwa kpe.

¹¹ Gama zaho-zahoyi n wo cei pma wa mwa wohin, to, aɓa gba wo. Amma zaho-zahoyi nwa gba wohin, to, a ɓa gawo mwa-mwa.”

¹² Nsayi wa ci oza n wa yi aza nyagyi nyi ge, “Sanu ha yi aza nyagyi to yi a nugundo n amado yi n ho abye yi n agyiwye-dayi nu kadai m. Gama ɓa ɓei kaho yi ce.

¹³ “Maimako ho zhin lo nu, yi aza nu n ɓa to n agyiwyei m, azagmazhi n na wyebuayi.

¹⁴ Nnabai wyi yi n Shekwoyi ɓei ku azafi kala nyi, woi gaho lada ntu aza ɓo n ɓa to mi ɓa gbaho nyi m.”

¹⁵ Ozaho n wo ɓei tu woi wo Yesu ɓeda wa ci Yesu ge, “Ai oza wa lo Shekwoyi bemi wo ku saʼa dnagmayi zhin.”

¹⁶ Yesu wa gawo amsa n misali yeyi “Oza ho ɓei zhin agmada dnagmai har wa yi aza mwa n na nyagyi ba.

¹⁷ Sanu wo ɓei ku ɓoho-ɓohoi zo zhin, wa tnu owo bara woi gna aza ge esa la si.

¹⁸ Amma ɓa gawo a dalili gbo-gbo. Za knayi wa cige, ‘Mi la ofwasi n ha ye mi cei pma mi gyekwo. Ntuce nu, mi tami ma ɓe anyagyi ba m.’

¹⁹ Zaho wa cige, ‘Mila anakwo si ngun awo n fwanu ɓo, Mi cei pma mi gye ɓa.’

²⁰ Zaho wa cige, woi bwa nyikwo la nu, ntu ce nu wo tami wa ɓe m.

²¹ “Bara yi wajeze lo wa da nya ɓa gna wo vinya. Owo maigida gyi minagyi wa cige, lo bwaho-bwahoi ho yi a nyaɓai na zabmazhi yi ɓedo na wyebuai.

²² Amma shi azaye pya ɓei ku ɓe aba dudu ɓa ce.

²³ Nsayi owo maigida ciwo ge, ‘Lo hoi dnawye vinya aba ha gye oza gni ha gna wo ge wo ɓe, n nabai puwa ye kwa nu.

²⁴ Gama aza ma yiɓa na bye nyi, ɓa tabwa enya n mila shirya ntu ɓa ɓo m.’ ”

²⁵ Aza ɓo viwo n mwa. Wa zegni wa ci ɓa ge:

²⁶ “Oza wo cei pma wa vimi dole wa yemi n du owo dada, owo ya, owo nyikwo, owo aɓi, owo amaje, owo amapwi, Har ndu wohin wye-wyeyi. Nto lo num, wo ta mi wa vi mi m.

²⁷ Njesun oza nwo to la wohin zundu wa vi mi m, wo ta mi wa ze emi bara m.

²⁸ “Amma oza wo cei pma wa vi mi, To, sai wa zhin nubo kpa sosai, gama zaho-zahoi wo cei pma wa mi nyakun, wo zhin wa shi wa kpa agyiwye zhi wa gye she kwo ɓa la nsun, kafin wo ya nyakun mi.

²⁹ Kada wo bwa nyakun nu shi kawai, nsayi agyiwye zowo har ha gye aza ɓai mawo san.

³⁰ Ɓo cige, ‘Fye gye zayi n wo nu, wo to mi woi zo nyakun mi m, ntuge agyiwye ku wo zo.’

³¹ “Ko kwa kni esu yi nu ɓa lo okun, to woi zhin shawara n wa azai ko owo asoa 10,000, ɓa mi ɓa sukun n azai 20,000?

³² “Nwo tamin, sai wa tnu na zai ɓa gyi esu deyi wye, tunyi woye nyin nkpayi, kadawo ɓe wa wu owo aza vinya.

³³ Ntuce nu zaho-zaho ta mi wa ze mi bara m, akpege wa shi wa zhin nubo kpa, wa gye wahala n wo ɓa sin n anabarka yi n wo ɓa gwo, n sayi wa gye kwo wo ɓa mi wa vi mi.

³⁴ “Sankpegye n ampani yi, kvoi la dada gmiya?

³⁵ Sankpegye nkwo to da m, ko to n ampani hoi m, atalni a zhin taki n koi ma. Azhin a ze koya aza kpe ko apita kawai. Fye kna tnubua sosai ngye fye cei pma fya gane nɓei n mi da nyi.”