Luka 1 - Alkawali Woiwoyi

^1-2 Emi nugundo n wo ye Shekwoyi nyi aza ku nabari ka n mwa n Kristi tukwo. Ɓa ɓei bwa a nabari ye n aza nu n ɓa ɓei wo n Yesu abara nyi. Ɓedo n aza n ɓa gye Yesu n ɓa hin tukwoyi.

³ Amma mi cei pma ma dnawye ma gye ko nabari ye zhin gaiciya nu. Nsayi ma kaho gna.

⁴ Nnabai kwa bma ho zhin ha kpe gaiciya ye n na ei wu ho nyi.

Malaika Wa Wu Wohin N Zakariya Aba

⁵ Zaho ɓei nyi ai yiwo ge Zakaria. Wo ɓei zhin malami dnagmayi nu n esa Hiridus ɓei gyibe n cei n Yahudiya nyi. Zakaria ɓei dna n Abija ebye nu. Oɓanu ɓei zhin tnu-tnu nna duwa nyakun n sahi. Ai yi ewo nyiko ge Alizabatu. Wo ɓei zhin prist nu ce. Ntuge wo ɓei zhin Haruna Yawyi nu.

⁶ Zakaria n Alizabatu yi ɓei zhin aza manayi nu. Ɓa ɓei n zafun manayin njesun ɓai zhin aɓo manayi.

⁷ Amma ɓa to ɓei ni yi m, gama Alizabatu ɓei zhin lama nu. Nsayi kwa ɓai ku ze azakwoyi.

^8-9 Nwyihoi Zakaria dna n aduwa nyakun wo zhin tnu-tnu, gama owo gwodo nu ɓei zhin tnu-tnu n mako yi. Kuria ku gyi wo nwo ɓalo woi zhin hadaya nna duwa nyakun ga Shekwoyi.

¹⁰ Nsayi kwa nza zhi laɓa nbmi ɓai zhin aduwa. Shi ɓa ɓei zhin ɓai shin zhin nyi, nsaho-sahoi nza lo ntuge woi zhin hadaya ye pya, wato wo gyi turare na ga Shekwoyi.

^11-12 Esanu wo ɓei dna n cei n haikali to wo dna ce m, wa jeje wa gye malaika gni n wo bwaizhe bwa. Zakaria wa ku jeje.

¹³ Malaika ciwo ge, “Zakaria, to wo dna m, gama maɓe ma gnaho ge Shekwoyi ku eho aduwa wo. Oho nyiko alizabatu ɓa ma eɓi. Hoɓa tu ewoye ge Yohanna.

¹⁴ Eho n Alizabatu yi fyeɓa bwa agmada yakwo esalu n fye ɓei mawo n cei. Aza n mwa be gye ɓei dagma nfyei n jesun.

¹⁵ Gama woɓa zhin Shekwoyi oza nu sosai nya. Fye to yege wo sin ejen ko fyewyi, amma wo ɓa nu n zafun gyi-gyi-yi har ma kafin a ma wo.

¹⁶ Owonu ɓa zhin a Yahudawa n mwa ɓa ɓe Shekwoyi aba.

¹⁷ Owo zafun ɓa wu ngye anabi Iliya nya nu. Wo ɓa ɓe n Kristi abye ntu ge wa zhin aza ɓa zhin shiri ntu Kristi ɓeɓe ɓo. Aza yakwo bugba ɓa wu ngye aɓi nya. Woɓa zhin aza nɓa ta woɓom ɓa kuze aza nɓeyekpe yi.”

¹⁸ Zakaria wa ci malaika ge, “Ai, deye ta ye zhin! Ntuge mila kwo, emi nyikwo jesun, wo la kwo.”

¹⁹ Nsayi malaika ciwo ge, “Emi nu zhin Malaika Jibrailu. Mi gni n Shekwoyi abye nu cici. Ewo nu na tnumi nge ma ɓe eho aba.

²⁰ Amma shi ho to gami ɓeda gaiciya nyi m, ho ta mi ha shan ɓedam, sai eho nyikwo wola eɓi ma. Gama dole emi ɓeda kwa nu.”

²¹ Esa n malaika ɓei da ɓo n woi nyi kwa, azai zhi n bmi ɓai pmi Zakaria to ɓai kpeɓo n kwo zhin woi la mwasa lo nu.

²² Esa n wo ɓei gmiɓe, to ɓa gye woi mi woi daɓo m. Aza ku kpe ge woku ɓewyegye gye gama wo ɓei ku zhin ɓa n nab-wai.

²³ Zakaria kwa wa dna n aduwa nyakun woi zhin tnu-tnu shi ewo anyipyeyi ɓei ku nu wa lo api.

²⁴ Esafyewyi, Alizabatu ewo nyikwo wa gni n nuboi. Alizabatu kwa wa wohin so dna har apya ngu atnu.

²⁵ Wa cige, “Shekwoyi zhin eza sun-sungye nyanu. Gama Wola vinyikwo shin miya har woi la eɓi gami.”

Alkawali Oɓi Nya

²⁶ Dna n epya tnanyihi Shekwoyi wa tnu n malaika yi, ai yi wo ge Jibrailu, n Nazarat nkwo dna n Galili nyi.

²⁷ N nabai walo ɓinyikwoi ho aba n wo to shin gyewa n zaho-zahoyi m. Ai yiwo ge Maryamu. Ayi owo nugunyi ge Yusufu. Wo ɓei zhin Dawuda Yawyi nu.

²⁸ Jibrailu kwa wa lo Maryamu aba wa sawa mi wa cige, “Ho zhin oza ye-yehi nu. Shekwoyi kunsun lo n hoi.”

²⁹ Maryamu wa jeje to wa bwa awyega n nyayi n malaika ɓei gna wo m.

³⁰ Amma Malaika ciwo ge, “Maryamu to wo dna m, gama Shekwoyi la tuge ho ɓa bwa anabarka n mwa.

³¹ Esa fyewyi hoɓa gni n nuboi ha ma eɓi-nugbayi. Ha tuwoye ge Yesu.

³² Eɓi hi ɓa zhin eza dnagmayi nu har aɓa yiwo ge Shekwoyi ɓi. Shekwoyi kwa woɓa ga eɓiye ewo dada ʼbe wato woɓa tuwo n Dawuda shinkpegye.

³³ Woɓa gyibe tu n Israila tukwo. Ewo begyi kwa kwo ta shan zo m.”

³⁴ Maryamu wa nya malaika ge, “Amma deye ɓa yezhin n wuna? Gama mito shin gyewan n zanugbayi doho-dohoyi m.”

³⁵ Malaika ciwo ge, “Zafun Gyi-gyi-yi ɓa ɓe daho (Shekwoyi iko kwa- kwo ɓa zekpe ho. Ntucenu eɓi nho ɓa ma nyi, wo ɓa zhin oza gyi-gyi-yi nu. Wo ɓa zhin Shekwoyi eɓi nu.

³⁶ Nsaiye kwa eho dnawun wato Alizabatu wo gnilo n nuboi apya ngnu tnanyi. Wola bwa woi la kwo. A ɓei zhin ai cige wota maɓi m.

³⁷ Gama Shekwoyi alkawali doho-dohoyi dole kwa nu.”

³⁸ Nsayi Maryamu wa cige, “Mi zhin Shekwoyi fyenu nu. Milaye ge wo zhin n miyi shi wo cei pma. Shekwoyi wo zhin eho ɓeda vinya n ha gnami nyi kwa nu.” Nsayi malaika bwi wye. To Maryamu wa shan wo wye gye m.

^39-40 N anyipyei fyewyi avun, Maryamu wa lo azhiɓeyi n ape kni n Yahudiya, aba n Zakaria ɓedo n Alizabatu ɓei fi nyi.

⁴¹ Sanu Maryamu ɓei ɓi ɓa gna eɓi n ko ɓei dna n Alizabatu nubo nyi kwa shan-shan dna mi. Alizabatu kwa wa nu n zafun yi.

⁴² Wa ci Maryamu ge, “Shekwoyi ku alheri wu ho n anyikwo aje vinya. Eho ɓi kwa wo ɓa zhin a ga Shekwoyi mwa-mwa n dudu.

⁴³ Ai mi to shin esa ye pya bwa m, gama eza n woɓa ma emi Dagayi nyi wola ɓemi gnaɓi.

⁴⁴ Esanu n ha ɓe hoi ɓi mi gna nyi, shi mawo oho begye eɓi nkwo dna n mi nubo nyi, kwoyi shan-shan ntu agmada ɓo.

⁴⁵ Ai hola gaiciya ga nge nya n Shekwoyi da kwo ɓa nu. Cenu na zhin woi tu ho anabarka ye pya.”

⁴⁶ Nsayi Maryamu wa cige, “Ma gode n Shekwoyi.

⁴⁷ Mi dagma lo dna n Shekwoyi n wo gni mi nyi.

⁴⁸ Gama wa shi ewo nyigun awye n wo to zhin nyaho nyi m. Nsai ye kwa aza ɓa yi mige anabarka da har nyalo-nyalo.

⁴⁹ Gama Shekwoyi iko da nwo gyi-gyi-yi nyi wo ku oɓo wo-woyi zhin ga mi.

⁵⁰ Wo gye aza sun-sun vinya n saho-sahoi, aza vinya nba gawo mwa-mwa nyi.

⁵¹ “Ewo atnu-tnu zhin aɓo wo-woyi nu. Wo zhin wa zun aɓoko da ɓedo n atuko-gnana-kwoyi anyigyi ya.

⁵² Wo la begyi gmi n asu akun woi la ga azagbayi.

⁵³ Wo ku anya manayi ga awyekwo yi, amma anyabwayi wa ku ɓa gnami ntna nyaho.

⁵⁴ Njesun n saiye wola owo fyenu ɓo pa, wato Israila. Woto ze owo alkawali amwi n wo ɓei zhin ge wa gyeɓa sun-sun.

⁵⁵ Gama woɓo zhin eyi dada Ibrahim ɓedo n wo aɓiyi, alkawali nge woɓa gyeɓa sun-sun har nyalo-nyalo.”

⁵⁶ Maryamu kwa wa dna n Alizabatu yi har apya ngnu ata. Shi apya ngnu ata ɓei ku wo nu nsahi, wa ieze lo owo zhi.

Ala Yohanna Bapizma Zhinyi Ma

⁵⁷ Nsayi kwa esai la Alizabatu nu n woɓa kagna n cei, wa ma eɓi nugbayi.

⁵⁸ Nabari ewo kagna nya kwa gnami laɓa n wo aje vinya, ɓai da shi Shekwoyi wa gyewo sun-sun n wu. Ai da zaho-zahoi laɓa.

⁵⁹ Shi anyipyei ɓei ku nu ngun nyimwa-nyimwa, owo anugundo ɓaɓe ntu ge ɓa dagma n kaciya zhin sa. Ɓai gye ge aɓa yi eɓi ge Zakaria nu, wato owo dada ye nu.

⁶⁰ Amma Alizabatu wa cige awo. “Aɓa yiwo ge Yohanna nu.”

⁶¹ Aza ciwo ge, “Eh! Ho shingye ai yi nyikadonu n yei pyayi n fye bye a?”

⁶² Nsayi ɓa nya eɓi da, ɓai zhin wo n nabwai.

⁶³ Wa gna ge agawo takarda n nabai wa ka ɓeda kpe. She a ɓei gawo, wa katu ge, “Aɓa yiwo ge Yohanna.” Deye ca wo aza vinya.

⁶⁴ Nsayi-sayi kwa Zakaria wa ya ɓeda njesun, wa ga Shekwoyi mwa-mwa.

⁶⁵ Ca wo aza laɓa n ɓa ɓei zhi ɓo nyi. Nabari yi kwa gakpe laɓa n Yahudiya ape kni.

⁶⁶ Zaho-zahoi n wo ɓei wo ɓeye kwa, wa zhin tunani n mwa wa cige, “Ai mita kpelo shi eɓi ye ɓa ze m?” Gama Shekwoyi kun-sun lo n woi n zokwo do gbo.

⁶⁷ Zakaria owo dada kwa wa nu n Zafun Gyi-gyi-yi wa zhin anabci ye, wa cige,

⁶⁸ “Fye ga Dagayi, Shekwoyi Israila nya mwa-mwa, Gama wola ɓe ntu ge wa gye ewo aza, woi la gni-gni gaɓa njesun.

⁶⁹ Wo ɓa tnuyi, Eza dnagmai n wo ɓa gni yi nyi. Wo ɓa gmi n Esu Dawuda Shekwoyi fyenu puwa nu.

⁷⁰ Zagni yi ɓa ɓe shi Shekwoyi ɓei zhin alkawali, n wo anabi gyi-gyi-yi gbe.

⁷¹ Oza n wo ɓa gniyi n yi anuwun yi aknu, n na zayi vinya n ɓa wun yi nu nyi.

^72-73 Shekwoyi ku sun-sun gye eya dada. Wo ku sun-sun gye Ibrahim gama wola owo alkawali ɓo pa, n wo ɓei zhin Ibrahim nyi.

⁷⁴ Har woi gayi iko ya ci wo n tna edna. Eyi anuwun yi dna ta shan yiwo lo m.

⁷⁵ Woi kuyi ze aza gyi-gyi-yi n Shekwoyi ɓami wa goyi, har ya zhi n wo aba n tna edna.

⁷⁶ “Oho, emi ɓi kwa aɓa yiho ge anabi Shekwoyi anabarkada nya.

⁷⁷ Ho ɓa wu ewo aza shi ɓa-ɓa bwa gni-gni n wo. Wato a zhan ɓa ya n ɓa laifi.

⁷⁸ Anya deye ɓa zhin vinya ntuge Shekwoyi sun-sun gye sa to diya m. Woɓa gayi buzangna gni-gni nya.

⁷⁹ Wa ga aza buzangna n ɓa filo n wyegma ɓedo n efi nyi. Njesun wa zhin yi fi n zokwo bugba fu nya.”

⁸⁰ Eɓi hi wa ye Shekwoyi n mwa. Osa n wo ɓei mwa n cei kwa, wo ɓei dna n zhabui n wo gmanyi yi har osa n wo ɓei ya aza waʼazi zhin laɓa n Israila nyi.