Filimon 1 - Alkawali Woiwoyi

¹ Wasika ye gmi n mi aba nu Nabari manayi Yesu Kristi nya ɓo, ɓedo Omi zadoyi, Timatawus.

² Kwoi lo Filimon aba, eyi tnu-tnu kun-zhinyi, oza ye-yeyi, n ikklisiya yi n kwo zhin kwa yezhi n eho puwa nyi, n Abfiya eyi mapui ɓedo n Arkibbusa yi n wo zhin Yesu soja n gye mi nyi.

³ Fa Shekwoyi eyi Dada n Dagayi Yesu Kristi yi wa ga fye owo anabarka n bugba-fuyi.

Bulus Wyegyi

⁴ Mi zhin Shekwoyi godiya cici esa n ma zhin aduwa ntu ho ɓo, Filimon, omi ʼza ye-yeyi.

⁵ Gama mi wo oho ye-ye n kpemayi ɓo lo n Dagayi Yesu n wo aza yi.

⁶ Mi zhin aduwa mi gna aza oho gaiciya ga ɓo, kwo ɓa shi ɓa wye-wyeyi ce, shi ɓa gye anya a manayi n ho, n ɓa kun n Kristi Yesu aba nyi.

⁷ Omi n mihin mila gyiba bwa, bugba buyi nya n emi fuyi n ho ye-yeɓo, emi zado, ntuge oho ɓemana-zhin, bma Shekwoyi aza bugba zhin lo.

^8-9 Nsaiye, miye ma nyaho bmazhin gmanyi. Mi ɓa mi ma nya ho ce dna n Kristi, gama nya manayi nu, n kwo kunce ha zhin. Ama mi ye ho lo, mi gnaye ma nya ho. Omi, Bulus, zakwoyi n saiye dna n kurkuku ntu Yesu Kristi ɓo.

¹⁰ Omi wyegyi, nge, ha wu Onisumus alheri, n na gniwo ga Yesu dna n ya, mi yi dna n na agmanyi.

¹¹ Onisumus nwo maʼana ge, (“Apma”) wo to ɓei n na apma yin n sapain, ama nsaiye wo n na apma hin-hin yi lo, n yi aba vinya.

¹² Mi tnu n woi n ho aba njesun, emi bugba gnisun lo n woi.

¹³ Mi ɓei n cei pma ma wo shi n ya, esa n mi dna n cei n ya n na agma, ntu Nabari manayi waʼazi zhin ɓo, owo bmazhin ɓei ɓa ze ngye oho nu bma mi zhin.

¹⁴ Ama mi to ɓei n cei pma ma zhin ce n tna ho ayen. Mi to ɓei n cei pma ha zhin ɓemana tilas nun, ama n ho bugba yei.

¹⁵ Kpekni ho ɓa zhin kwo nubo n lai, nge wa busi n ha aba esa fyewyi ntuge wa ze oho nya nyalonyalo.

¹⁶ Wo to ye zhin fyenu nu, ama nyaho n du ɓo, Madoyi ye-yei, tun baga n mi aba ba, nsaiye wo ɓa gna sun n na pmayi n ho aba, ntuge wo to zhin fyenu nun gmanyin, ama oho mado dna n Kristi.

¹⁷ Nmi zhin ho nugundo hin-hin yi nu, gwo wo n na agmadai, shi ho ɓa gwo mi nyi, emi yi nu a ɓe ho aba.

¹⁸ Ngye wo ku ɓenukwoyi nu zhin ho, kwo wa wyi ho vi nu, ɓi mi nu ta, mi ɓa gba ho.

¹⁹ Mi ɓa gba ho kwo ta, (“emi Bulus mi la ye mi ɓa gaho, cenu zhin mi yi kakwo fi n ya n mi abwayi,”) Mita wu ho shi ho n tayi shi mi lon, Ɓehin-hin ho n hohin wye-wyeyi tainu shi mi.

²⁰ E, emi zado ye-yei, gami agmada dna n ye-ye n na bai emi bugba ɓa ci Dagayi.

²¹ Mika wasika ye ntuge mi kpelo ho ɓa zhin oɓo n ma gna ho, har n diya ɓo.

²² La a zhiɓei nyakun zhin aba gami, gama mi n na wyetuyi lo Shekwoyi ɓa wo fye aduwa ma ɓe fye aba esa fyewyi.

²³ Abafros emi kurkuku kun zhinyi, n wo dnalo n ya, ntu n Kristi Yesu waʼazi zhin ɓo nyi, wo tnu fye lo n gnaviyi.

²⁴ N Markus yi, Aristakus yi, n Dimas yi n Luka yi, emi atnu-tnu kun zhin yi.

²⁵ Anabarka eyi Dagayi Yesu Kristi nya ɓa kunsun n ho zafunyi.