Bitrus I 2 - Alkawali Woiwoyi

Shekwoyi Aza

¹ Ntu cenu fye la nuwun gmiya n bugba. Fye to zhin aɓo n gye fye zhin aza manayi n munaficiyi gwo dna n mim, Fye ku tna-gaiciya ya, n eshei, n na za ɓedai n ɓa vun.

^2-3 Nsaiye shi fye kpelo shi Dagayi ye fye nsunyi, fye ku ɓenukwoyi ya vinya, kwocedna, eshe, n na katai. Fye zhin atna fya mwa fi n fye gnigni, fyei zan madara zafun nya shi n bwi-ci yi, she oɓi zhin wa cibwi woi zan ɓeɓe shin nyi.

⁴ Fye ɓe Kristi aba, owo nu zhin Nyakun shishiyi Apma nya n Shekwoyi mi nya tu nyi. Koda shike aza la wo ciwyegba wo na pmailo n latui njesun n Shekwoyi aba n wa kni wo tu naza she nyi.

⁵ Nsaiye fye ku ze akuta awyewyeyi, Shekwoyi wa zhin apma cei wa mi nyakun, kniyi du lo ɓoʼa? Fye ɓe Wa ba, (ofye n fye ku zhin anya go-go yi nwa ba ntu Yesu Kristi ɓo nyi,) fya ga wo anya n ɓa dawo.

⁶ Shi littafi ada, “Shawye, mi tnu n Kristi yi wa ze kuta kni-kniyi nyakun-bwakonu nya omi ikklisiya nya, mi ta dna aza vinyikwo n ɓa kpema won.”

⁷ E, wo n latu yi lo n fya ba n fye ku gaiciya ga nyi, n na zaba n ɓa la wa ɓo na nyi, To, “Kuta ho n na a nyakunmiyi la kwa ɓo nanyi, kwo la ze kuta nyakun-bwakonu nya nkwo du n mwa-mwa n na pmai dna nyakun mi nyi.”

⁸ Littafi a je ci ge, “Wo zhin kuta bonyi-ce nya nu n na zaho aba. Apma n kwo ɓei zhin ɓa miya.” Ɓa ɓei kni a bonyi ntuge ɓata ye ɓa wo Shekwoyi Ɓeda, kwo ɓa vi wo ɓeyem, ntu cenu tata ye mimiya nya, ɓei vi ɓa.

⁹ Ama fye to wulo lonun, ntuge Shekwoyi la fye kni n wohin yi, fye zhin Esu a pirist nu, fye gyi-gyiyi lo n bmiya, fye zhin Shekwoyi anyanu, aɓeye vinya ntu ge fya wu aza shi Shekwoyi wa yi fye n wyegmaa mi woi lo fye fi n wo buzangna ɓewowoyi nya.

¹⁰ Nsapai fye to ɓei zhin nyaho nun, nsaiye fye zhin Shekwoyi anya nu, nsapai fye to ɓei kpe Shekwoyi alheri ye n mwan, nsaiye okwo nu la fya wye-wyeyi shando.

¹¹ Oma zaje, fye zhin azhiɓeyi nu ya. Shikwonyi ofya yi hin-hin lo n ʼshe mi nu, mi gyi fye wye fya bui anyi dada nukwoyi ye nya si, ɓa to zhin ofye nun, ntuge ɓa sunkun n ʼfya wye-wyeyi.

¹² Fye zhin peceiye shi fye sase n fya knuzhiyi n ɓa zhin atnaviyi nyi, ntuge ɓa gye fye ngye aɓo nukwoyi zhin yi, shi ɓa gye fye ɓemana ɓa ɓei ci Shekwoyi ntu fya tnu-tnu manayi ɓo esa n Kristi ɓa jezeɓe cei.

¹³ Ntu Dagayi ɓo, fye vi gwannati doka doho-dohoyi ɓo kwo esu anya nu ngye ekni tukwoda.

¹⁴ N esu abmazhinyi yi, ntuge wa tnu n ɓai ɓata abenukwoi zhinyi yi nu, ɓa ci aza n ɓa zhi ɓemanai ce.

¹⁵ Shekwoyi nufi nu efya sese manayi ɓa kun aza gbe n ɓa ci Nabari Manayi aɓenya to ɓai kpe oɓoye n kwo ɓa mi kwa zhin ɓa nyim, ntuge ɓa to shin kwo iko towom.

¹⁶ Fye ku pwo owa, ama kwo to wu nu ge fye zhin ɓenukwoyim, fye sase n gye aza nɓa ku pwo, ɓa zhin Shekwoyi ɓeye nu gmanyi n saho-sahoi yi.

¹⁷ Ga zaho-zahoi mwa-mwa, Ye n na Yesu-viyi yi nbwaho-bwahoi vinya, wo Shekwoyi dna, ha ga gwamnati mwa-mwa.

¹⁸ Afyenu, fye ga fya dagayi mwamwa fya zhin oɓo ɓa gna fye vinya to ge sai ɓai nsunsun gyei nu kwo ye-yem, ama kwo ɓai zhin aza nukwoyi nu.

¹⁹ Fye zhin Shekwoyi godiya n na ga fye wahala ntu ɓemanai zhin ɓo.

²⁰ Gaiciya, gyiba to lon, n na ga fye wahala ntu ɓe nukwoyi zhin ɓom, ama n fya zhin ɓemanayi fya sin wahala ntu ce har fya zhin hakuri dna n na zhin-hi mi, kwo zhin kwa da Shekwoyi n mwa.

²¹ Wahala ye pya dna lo n tnu-tnu mi n Shekwoyi wa ga fye. Kristi nwo ɓei sin wahala n fye ɓo nyi, wonu zhin fye e-fye, fye vi wa pita ʼbwi.

²² Wo to ɓei zhin laifim, to wa ca katam.

²³ A kni wo akmi, to wa gba akmi tam, esa na ɓei gawo wahala wo to ɓei kun akalam, ama wa wohin fa dna n Shekwoyi akun n wo da owa ntna awyekwo nyi.

²⁴ Wonu ɓei la eyi alaifi kaya n wohin nayi, esa n wo ɓei fi tu n zundu nyi, n na bai ya ze afifiyi n laifi aba, ya se ase gyi-gyi-yi nsayi. Ntuge ntu wo aci ɓonu yi-i bwa kagna.

²⁵ Ngye akni fye ɓei ku bwi Shekwoyi zokwo, ama nsaiye fye la jezeɓe da fye ʼkniknayi ofye awye-wyeyi guyi n wo gu fye n nanya kasayi nyi.