Atasalunikayi I 4 - Alkawali Woiwoyi

Fye Ku Ze Aza Gyi-gyi-yi

^1-2 Omi azaje fye kpelo, shi fye ɓa da Shekwoyi bugba, dna n fye asese fyegyi-fyegyi, gama fye kpe wyidna ye lo n yi ɓei ga fye dna n Dagayi Yesu, Nsaiye yi gyi fye wye dna n Dagayi Yesu, nge fye zan-zan shi ya wu fye.

^3-4 Cama Shekwoyi n cei pmalo fya ze aza Gyi-gyi-yi, ntna cegye, Fya bui anagbayi si n na abai zaho-zahoi wa pa mula n gyi-gyi-yi.

⁵ To ge n shakpe yin, shi abyedo zhin nyin, ntu n tna Shekwoyi yekpe ɓo n wo azokwoyi nyin.

⁶ Deye kwonu zhin Shekwoyi ɓeye, nge fye to gyi efye zado fi fya a ezado nyikwon, ntuge Dagayi ɓa ta fye n mwa, shi yi ɓei shin fye gna nyi.

⁷ Gama Shekwoyi to yi yi, ya ze aza nu nɓa bugbayi nu-nuyi n cegye yi nun, n nu-nuyi n shakpe yin, ama ya ze aza agyi-gyi-yi.

⁸ Oza n wo to vi wyidna yen, wo ta zun aza ɓeda nu gnan, ama Shekwoyi nya n wo ga fye owo Zafun Gyi-gyi-yi nyi.

⁹ Ama ntu n na azaye n cei ɓo, n kwo kunce a bwa kwo n na Shekwoyi aza ba nyi, mi to n na apma yi lo ma da ɓeho tu n kwo tukwon, Gama Shekwoyi n wohin wo wu fye lo, shi fye ɓa ye najeyi.

¹⁰ Ɓehin-hin ofye ye-ye n kalai lo nfye a Yesu-viyi aba, n fye kni vinya. Har nsaiye yi gyi fye wye fye ye ɓa lo na bye.

¹¹ Fye fa deye kwa ze fye ɓemwi, fya sase n lafiyai, fyei zhin fyehin tnu-tnu, shi yi ɓei shin fye gna nyi.

¹² Nnabai aza nɓata vi Yesun ɓa ga fye gaiciya ɓa ga fye mwa-mwa, n fye ta zhin akma fya kpema aza ntu fye bukata ɓom.

Yesu-viyi Fi

¹³ Nsaiye, omi azaje, mi n cei pmalo fya kpe oɓo n kwo bwa Yesu viyi, esa n wa fi n cei. N na abai n kwa bwa fye, fyeta wun bugba n duwyin, ngye aza n ɓato n na awyetu yin.

¹⁴ Shi yi ku gaiciya ga nge Yesu la fi, wa lakala n vingwo n jesun nyi, yi ga gaiciya n jesun n ge esa n Yesu ɓa jezeɓe, Shekwoyi ɓei jezeɓe n na a Yesu-viyi, n ɓaku fi n gnisun n woi nyi.

¹⁵ Nɓa gna fye deye Dagayi wu-wu nu, nge eyi n yi n wye-wyeyi, esa n Dagayi ɓei jezeɓe nyi, yi to ɓei kukala ya gyi aza apye-apye n ɓa fi n vingwo nyin.

¹⁶ Gama Dagayi nu ɓei kashi ɓe n eshe, n wyisa kalai, wyisa a malayika esu ɓegye nya, n Shekwoyi mwayi yi. A Yesu-viyi n ɓa ku fi, ɓanu ɓei kukala n na abye ɓa sun n Dagayi.

¹⁷ N na avun, eyi n yi cezhi n wye-wyeyi n fi n na anyi nyi, a ɓei ku yi ya shegun Dagayi n ʼshe bmana, elonu yi ɓei kunsun n woi nyalo-nyalo.

¹⁸ Ntucenu fye fu aje bugba, fya ga aje kala n ɓeda ye yi.