Atasalunikayi I 3 - Alkawali Woiwoyi

Nabari Manayi N Timatawus Aba

¹ Esa n yi to ɓei shan min, ya pmin ya zun shaula ya ge kwo bmiya lo ya ku cefi n Atina.

^2-3 Ya tnu n Timatawus yi, eyi zado n tnutnu kunzhin-yi, Shekwoyi tnu-tnu yi wa ɓe efye aba, wa ɓe fye gaiciya ga kala n bugba kalai, n nabai to fya zun fi ko fya bma bugba ya ntu wahala ɓo n fye sin nyin. (Ama fye kpelo wahala ye pya dna n Shekwoyi shiri ntu n yi ɓo.)

⁴ Ko esa n yi ɓei kunsun n fyeyi nyi, yi ɓei ku gna fye ge safyewyi wahala ɓa ɓe, kwoi la ku ɓe.

⁵ Shimi ɓei danyi, esa n mi to ɓei shan mi to mi yi gye fye wyen, ma tnu n Timatawus yi wa kpe kwo efye gaiciya ga ye n kalayi lo, mi ɓo wodna kwo shetan ku nasara gyi tu n ofye tukwo, eyi tnu-tnu kwoi la ze gbeloyi.

⁶ Nsaiye Timatawus la jeze ɓe, woi gna mi ge, of ye gaiciya ga, n ye-ye yi ɓa gyi abye lo. Fyei pa eyi ziyara ɓo n bugba bui buyi shi fye n cei pma fya gye yi wye, shi yihin cei pma ya gye fye wye nyi.

⁷ Ntu cenu omi azaje bugba kuyi fu, dna n yi wahala n yi sin n ya nyi, tunda yi kpelo ge fye mi zhi lo n Dagayi nyi.

⁸ Yi ɓa mizhi dna nyaho-nyahoyi ndei yi kpelo ge fye kpema Dagayi lo.

⁹ Yi ta mi ya sa Shekwoyi ami n kunce, ntu fye ɓon! Ntu bugba buibui ɓo n fye gayi ngye shi Shekwoyi wo yi aduwa ntu fye ɓo nyin.

¹⁰ Nsukwoyi n nyipyei yi zhin aduwa ntu nfye ɓo, yi gyi Shekwoyi wye, ya gye fye njesun ya nu enya n kwo ce yalo n fye gaiciya ga.

¹¹ Fa Shekwoyi eyi Dada nwohin tukwo, n yi Dagayi Yesu yi, wa tnu n yi, nfye aba njesun.

¹² Fa Dagayi wa zhin ofye yeye kwa mwa lo abye-abye, kwa nu, kwoi gyiya ga efye azaje n na azayi vinya, shi eyi ye-ye ɓe fye aba nyi.

¹³ Deye ɓa zhin ofye abugba ɓa bwa kala, n tna laifi, n Gyi-gyi-yi n Shekwoyi eyi Dada yi. N na bai fya gni-gni zhi n wa abye n tna laifi, ewyi n eyi Dagayi Yesu Kristi ɓei jezeɓe n gnisun n na azayi n ɓa zhin owo anya nyi.