Aromayi 3 - Alkawali Woiwoyi

Anabarka Yahudiyi-bye Nya

¹ Mi gye ampanyi nza zhin Yahudiyi nyi? Gyiba manayi ho lo n Shekwoyi aba? Ampanyi ho lo n na Yahudiyi kaciya n ɓa zhin nyi?

² E, ampanyi lo n oza ɓa n wo zhin Yahudiyi, Kmisunyi Shekwoyi ɓei gaɓa owo awyidna. (N nabai ɓa kpe, ɓa zhin wo ɓeye).

³ Gaiciya azaho n ɓa mi to ɓei n aminci yi n, ntuge ɓa ɓei bma alkawali ya n Shekwoyi yi, kwa wu nu ge Shekwoyi ɓa bma wo alkawaliya?

⁴ Aʼa, ko shi kwo nyi aza vinya n na anyi zhin aza kata nu, Shekwoyi to zhin zakatan nun. Ho pa enya lo n litafi n Zaburada n deye tukwo? Shekwoyi ɓeda ta shan don, ci-ci kwo zhin gaiciya nu. Ko nyikadonu nu na nya ɓa ɓo.

⁵ Ama, azaho ci ge, owo ɓeda n yi to shi bwa nyi n, kwo n na ampanyi yilo, eyi alaifi ku ampanyi zhin, ntu ge aza ɓa gye shi Shekwoyi yeye nyi, esa ɓa gye shi yi zhin aɓe nukwoyi zan. Kwo bmiya lo n wo aba wa tayi, esa ya zhin ɓe nikwoyi, eyi alaifi yi bwa wo go bmazhin?

⁶ Shekwo sauka. Kni Shekwoyi pya nu to woi ta laifin ma? Wo ɓa zun oza kni n wu na?

⁷ Ntuge wota mi wa da mi owa, wa zunmi kni ngye laifi da n, ndei omi tna gaiciya ɓe wolo n mwa-mwayi koi wuge wo zhin gaiciya da nun.

⁸ N ha vi kwo lo nu, ha gye shi yi gna ɓenukwoyi zhin nu dudu. Shekwoyi wa gna kwo ye. Amma aza n ɓa da abeye pya knizun kunce lo n ɓa aba. Dudu lonu aza ho gye ge nya nu n mi zhin waʼazi.

⁹ To, eyi a Yahudiyi du aza je lo? Ko fyewyi, ntuge, yi ku luwu ge aza vinya zhin a laifi danu. Ko a Yahudiyi ko aza nɓa to zhin a Yahjudiyin.

¹⁰ She littafi a da, za manayi to lo n, zaknayi to lon nna nyimi n wo to zhin laifi danu n.

¹¹ Ozato lo n wo vi Shekwoyi zokwo cewo ko n wo n cei pma wa vin.

¹² Zaho-zahoi la wonya pmiya, aza vinya nku ɓenukwoyi zhin, oza to lo n bwaho n wo zhin ɓe manayi ko zaknayin.

¹³ Oɓa ɓeda tucegye, n ce asin ngye vingwo nkwo gu-guyi ya gni. Oɓa nyitala nu-nuyi n na katayi. Ɓeda doho-dohoyi nɓa da kwo n mwi nukwoyi fi, n kwo ɓa wu oza.

¹⁴ Oɓa gbe, nu-nuyi n na aknikpe yi n minagyi yi.

¹⁵ Ba pye-pyeyi n za wu, ɓai wun za nu n wo to gwo ɓa ɓedan.

¹⁶ Abaho-bahoi n ɓa lo ɓa fa bugba wun n wahala yi n na azhingye yi.

¹⁷ Ɓa ta kpe enya ye n na yi ge, bugba fun kwo Shekwoyi anabarka m.

¹⁸ Ɓa ta gye ɓa nuwan n Shekwoyi, kwo enya n wo zhin nubo n ɓa tukwon.

¹⁹ Ntucenu Shekwoyi minagyi n wagyi tulo mwa n na Yahudiyi, ntu ge oɓa tnu-tnu nu, ɓa shi Shekwoyi awyidna bwa, ɓace ɓai zhin aɓo nukwoyi, zaknayi n ɓami to n na ɓenayi lo lon. Ɓehin-hin anyi vinya to n na gmiba yi lon n Shekwoyi ikoda abyen.

²⁰ Nsayi ye, hoku gye? Za to lo n naɓa zewo oza manayi n Shekwoyi abam, ntuge wo zhin ɓo n na awyid-na da m. Ntuge yi kpe Shekwoyi awyidnaye, ya gye to yi gna ɓa bwa shin, owo awyidna wu yi ge, yi zhin aɓe nukwoyi zhin yi nu.

^21-23 Amma nsayiye Shekwoyi ku eshe zokwo do wuyi, gbo, n na wyidna bwashi yi, amma n zokwo woyi (ko-daya-ke zokwo woyi nu to n, ntu ge Shekwoyi ɓeda ku gna yi tunyi n sapa). Nsaiye Shekwoyi wa gna ge woɓa gwo yi, wa zeyi a tna laifi da. N ya kpema Yesu Kristi wa zo yi a laifi, wa zhin yi gafara. Aɓa gni yi n zokwo deye n ya ɓe Kristi aba. Ko hoi zhin nyika donuʼa, Ko hoya zhin kni laifi nuʼa. Aza vinya nku laifi zhin ɓai ku gba kpekpe-gye n Shekwoyi mwa-mwa aba,

²⁴ Ama nsayi yi ku ze aza akni-kni-yi, ntu wo alheli ɓo, nɓa ɓe dna n gni-gni n Yesu Kristi aba nyi.

²⁵ Shekwoyi wa tnu n Yesu yi ntu ge, wa ze doshan nya nya ntu oyi alaifi ɓo, ozaho-zahoi nwa ga gaiciya aku gafara zhin wo. Shekwoyi wa shin deye ntu ge wa wu ge wo zhin ɓefyecei nu, nsa avun nya, wo ɓei la bugba bwa n laifi-i, to wa ga aza ta-ta m

²⁶ wa zhin deye nsayi ye ntu ge, wa wu ge wo zhin oza kni-kni-yi nu, woi ɓa mi wa gmi oza ya tu nwa ga Yesu gaiciya, wohin ce wa ze oza kni-kni-yi.

²⁷ Nyaho lo n zanyikwoci ɓa mwa wohin nkwo ɓo? Nge awo. Ntu kniɓehia? Ntu ge yi shi awyidna bwa? Awo, ama ntu gaiciya ga ɓo.

²⁸ Onya gmanyi nu n yi kpe lo, okwo nu ge a ta bwa gni-gni n awyidna bwashi ɓo nu m, ama n gaiciya ga aba.

²⁹ Mi nya ge, Shekwoyi zhin Ayahudiyi Shekwoyi nu gmanyi, Wo to zhin abyedo Shekwoyi nu ce n? Cewo wo zhin ɓa nya nu.

³⁰ Shekwoyi gmanyi nu, owo nu ɓa gni Ayahudiyi ntu ɓa gaiciya ga ɓo, owo nu-i ɓa gni abyedo, ntu ba gaiciya ga ɓo.

³¹ Shi kwo wu lo nu nyi, ta gye yi ɓa ku awyidna ze gboloyi n? Nge awo, awyidna ze gboloyi n? Nge awo, awyidna nɓa apmayi lo.