Aromayi 16 - Alkawali Woiwoyi

Gnaɓi Vinya

^1-2 Fibi nyikoza Yesu viyi n Kankriya zhimi ɓelo wa gye fye wye safyewyi. Woku tnu-tnu zhin n mwa n ikklisiya ye. Fye gwo wo n gye mapui dna n Dagayi. Fyawu wo a Yesu viyi yeye. Fye bma wo zhin n zokwo doho-dohoi n fye ɓami ntuge wo ku bma aza zhin n mwa dna n ɓa sangyi n mihin ɓe.

³ Gna Biriska n Akilayi nge mi ɓiɓa gnaio, Ɓa zhin omi atnu-tnu kun zhin yi nu dna Kristi Yesu.

⁴ Ɓehin-hin, har oɓa wye-wyei ye kwa bwi n miɓo. Omi gmayin nu ta saɓa amin, har n abyedo n ikklisiya yi.

⁵ Suku-suku fye ɓi aza gna n ɓa yezhi ɓa ci Shekwoyi n ɓa puwa. Fye ɓi omi nugundo manayi gna Abainatus. Owonu ɓei kmi Yesu vi n Asiya.

⁶ Fye ɓi Maryamu gna n wa zhin tnu-tnu n mwa n na bai wa bma yi zhin nyi.

⁷ Fye ɓi Andarinikus n Yunuyas yi gna, omi bye n ɓa ɓei kunsun n miyi fi n kurkuku nyi. Amanzani gaɓa mwa-mwa. Ɓa ɓei ku vi Yesu n mi abye.

⁸ Fya ɓi Ambiliyatus gna, oza n mi ye ngye Shekwoyi ɓi.

⁹ N Urbanus yi eyi tnutnu kunzhin yi, n Istakiyi oza yeye yi.

¹⁰ Fye ɓi Abalis gna gami oza n Dagayi ye, fya ɓi aza gna n ɓa fi ɓai zhin tnu-tnu n Aristo bulus puwa nyi.

¹¹ Fye ɓi Harodiyana omi bye gna, fya ɓi a Yesuviyi gna n ɓa zhin afyenu fi n Narkissus puwa nyi.

¹² Fye ɓi Tarifaina gna n Tarifusayi Dagayi a tnu-tnuyi, n Barsisa yi n wa zhin tnu-tnu mwa ga Dagayi nyi.

¹³ Fye ɓi Rufus gna gami oza n Dagayi a kni ga Wohin, wa ze wonya, n wo iya yeyeyi, n wo la ze omi iya yeyeyi nyi.

¹⁴ Suku-suku fya ɓi Asinkiritus gna n Filiguna, n Harmisayi n Batrubas yi n Harmasayi n na aza jeyi n ɓa kusun n ɓayi.

¹⁵ Fye ɓi Flubugusa gna n Juliya yi n Niriyus yi, n wo mapuiyi n Ulumbasayi, aza gyi-gyi-yi n ɓa kunsun n ɓai nyi.

¹⁶ Fye dna aje abwado, ikklisiya n ya vinya tnu fye n ɓa gnaɓiyi.

¹⁷ Nsaiye, ɓeda gmanyi n mi cei lo ma da kafin mi zo n wasika ye yi. Fye la pmiya n na aza n ɓaɓe n na ajegnayi ɓai shan aza gaiciya ga a shan. Ɓai ɓe n wuwuyi nkwo wu gbo, n doyi n aku wu fye.

¹⁸ A zayi pya ta zhin tnu-tnu ga eyi Dagayi Yesu nun, ama ɓaye gyiba ga ɓahin nu. Ɓa zhin a ɓeda kpedayi nu, aza nɓato ceceyin, ɓata wo ɓa kwoce dnan.

¹⁹ Ama zaho-zahoi kpelo nge fye gni-a-gni lo cewo dna n gaiciya. Deye dami a gmalo. Miye fya sase cewo dna n nya n kwo bmiya, fya abwa kunya n nya n kwo to bmiyan.

²⁰ Safyewyi, Shekwoyi bugbafu nya wo ɓa bma shaitan ya n fya pita sin ta. Anaɓarka nɓa kun n yi Dagayi Yesu Kristi aba ɓa kun-sun n fyei.

²¹ Timatawus omi tnu-tnu kun zhinyi, n Lukiyus yi, n Yasunayi, n Susibatrus yi, omi ebye ɓa tnu fye n ɓa gna ɓiyi.

²² Omi Tartiyus n mi ka Bulus wasikaye nyi, mi tnu fye n mi gnaɓiyi ce n gye Yesu viyi do.

²³ Gayus wa gna nge mi ɓi fye gna ga wo, mi zhin wo zhiɓeyi nu, ikklisiya yezhi lo nwo puwa nu n ya. Arastus maʼaji, tnu fye n wo gnaɓiyi n lonu Kawartus eyi zado.

²⁴ Sai n wyihoi, Alheri Dagayi Yesu Kristi nya kwo kunsun n fyei vinya.

^25-27 Mi fi fye n Shekwoyi akun, n wo ɓa mi wa ga fye kala, fya mizhi n Dagayi nyi shi Nabari Manayi da. Shi ma gna fye n wu nyi. Shekwoyi gni-gni shiri nyi ntu n fye ɓo abyedo n soshi tnuyi n sapa. Ama shi anabi ɓei ku pmada shi Shekwoyi wa gbe, a zhin Nabari ye waʼazi lo n na abaho-bahoi, n na bai aza vinya n na anyi, ɓa ga Kristi gaiciya ɓa vi wo ɓo. Shekwoyi gmanyi n cece wum wo nu nyi, mwa-mwa kunsun n woi ntu n Yesu Kristi ɓo. Har nyalo-nyalo Amin.